Judith Estrada-Larino

Labing limang (15) araw lamang ang ibinigay ng Pangulong Rodrigo Duterte sa Department of Foreign Affairs para mag-update sa imbestigasyon nito kay Philippine Ambassador to Brazil Marichu Mauro na nanakit ng kaniyang kasambahay.

Ayon ito kay Foreign Affairs Secretary Teodoro Locsin Jr., matapos matanggap ang presidential directive na nag-aatas sa DFA na imbestigahan ang pang aabuso ni Mauro.

Sinabi ni Locsin na kaagad naman siyang bumuo ng fact finding team para tutukan ang usaping kinasasangkutan ni Mauro.

Ang team ay binubuo nina Consul General Ezzedin Tago, Jaime Ledda, Narciso Castanieda at Atty. Ihna Alyssa Marie Santos.

Ipinabatid ni Locsin na nagpapatuloy na ang administrative proceeding.

Hindi na matutuloy ang naunang inanunsyong pagpapatupad ng temporary shutdown sa operasyon ng MRT 3 simula bukas, Oktubre 31 hanggang Nobyembre 2.

Ayon sa abiso ng MRT 3 pinaboran ni Transportation Secretary Arthur Tugade na suspindihin ang naka-schedule na weekend shutdown bilang pag-iingat sa posibleng pananalasa ng Bagyong Rolly.

Sinabi ng DOTr-MRT 3 na mahalagang ma protektahan ang mga manggagawa na magiging bahagi ng mga aktibidad sa mga naturang petsa.

Nakatakda sanang isaayos ang 34.5 kilovolt alternating current switch gear sa depot at mga turnout sa Taft Avenue station.

Magbibigay na lamang ng anunsyo ang pamunuan ng MRT 3 kung kailan matutuloy ang weekend shutdown.

ANUNSYO PUBLIKO

Bilang pag-iingat sa posibleng land fall ni Typhoon Rolly, pinayagan ni DOTr Secretary Arthur Tugade ang rekomendasyon ng MRT-3 na pansamantala munang iurong ang scheduled weekend shutdown nito simula ika-31 ng Oktubre hanggang ika-2 ng Nobyembre 2020. pic.twitter.com/b8k80xCuEC

— DOTr MRT-3 (@dotrmrt3) October 30, 2020

Mahigpit na pinag-iingat ng NDRRMC ang mga residente sa mga lugar na daraanan ng Bagyong Rolly.

Babala ito ni NDRRMC Spokesman Mark Timbal kasunod nang pagpasok sa bansa ng panibagong bagyo na tatahakin ang mga lugar na dinaanan nang naunang Bagyong Quinta.

Dahil dito pinayuhan ni Timbol ang mga taga Bicol Region, Eastern Visayas, katimugang Luzon maging ang taga-Metro Manila na huwag nang lumabas ng bahay kung hindi importante ang kanilang mga lakad at manatiling updated sa lagay ng panahon.

Half day lang nag-operate ang mga korte sa buong bansa ngayong araw na ito.

Nakasaad sa direktibang inisyu ni Supreme Court Chief Justice Diosdado Peralta na hanggang kaninang alas-12 lamang ng tanghali ang trabaho sa High Tribunal Court of Appeals, Sandiganbayan, Court of Tax Appeals, Presidential Electoral Tribunal at lahat ng first at second level courts.

Ito ay para magkaruon ng panahon ang mga empleyado ng korte na makauwi sa kani kanilang mga lalawigan kaugnay sa paggunita sa araw ng mga patay bagama’t sarado muna mula kahapon hanggang sa Nobyembre 4 ang lahat ng mga pampubliko at pampribadong sementeryo sa buong bansa.

Pumalag sa aniya’y ipit budget si Budget Secretary Wendell Avisado sa pondo ng ilang ahensya ng gobyerno para sa pagtugon sa mga naapektuhan ng COVID-19 pandemic.

Ayon kay Avisado dumadaan sa proseso ang mga request para sa pondo ng mga ahensya at walang problema sa pagre-release ng pondo.

Batid aniya ng mga cabinet secretary ang proseso gaya ng pagsusumite ng special budget request, budget execution document kasama na ang justification kung bakit kailangan ang budget bago ito i-evaluate.

Sinabi ni Avisado na hindi maaaring ibigay ang lahat ng pera kung mayroon pang nagagamit dahil ito aniya ang mandato nila sa aspeto ng budget management.