Judith Estrada-Larino

Ibinunyag ni Senador Panfilo Lacson ang tig P1-M alokasyon sa 2021 national budget ang 42 distrito sa bansa.

Sinabi ni Lacson na nakita nila ang magkakaparehong alokasyon sa mga nasabing distrito sa gitna ng patuloy na pagbusisi ng senado sa panukalang 2021 national budget.

Malinaw ito aniyang insertion na isiningit sa national expenditure program kung saan ay atrasadong nakapagsumite ng proposed budget ng DPWH.

Ayon kay Lacson may mga kongresista ang nagsabing matindi ang pakikipag-haggle o tawaran sa pagitan ng ilang kongresista at DPWH kaya’t atrasado ang pagsusumite ng DPWH ng breakdown sa kanilang panukalang budget.

Una nang isiniwalat ni Lacson na mayroong P396-B na lump sum appropriations sa budget ng DPWH na isinumite ang breakdown 12 araw marapos ang 30 day required period.

Nakatakdang mamahagi ng bisikleta ang Department of Labor and Employment (DOLE) sa mga nawalan ng trabaho at nais maging delivery service riders sa gitna ng COVID-19 pandemic.

Ayon kay Karina Perida-Trayvilla Director ng Bureau of Workers with Special Concerns ilulunsad sa susunod na linggo ang nasabing programa na naglalayong magkaloob ng paunang 900 bisikleta sa mga beneficiary na sasailalim sa training kaugnay sa traffic regulations at financial literacy gayundin sa occupational safety and health standards.

Ang mga beneficiary aniya ay tatanggap din ng insulation bag, protective helmet, reflective vest, bike rack, cellphone at load wallet.

Sinabi pa ni Trayvilla na nakipag-partner ang DOLE sa Grab at Lala Food at Lala Move para sa naturang programa.

Ang naturang programa aniya ay gugulong muna sa Mandaluyong, Pasig, Muntinlupa , Maynila at iba pang lugar sa susunod na linggo.

Umakyat nasa 363,888 ang kabuuang kumpirmadong kaso ng COVID-19 matapos madagdag ang 1,664 na bagong infection.

Ayon sa DOH, 843 pang pasyente ang gumaling sa COVID-19 kaya’t pumapalo na sa 312,333 ang total recoveries.

Samantala umakyat sa 6,783 ang death toll nang maitala ang 38 bagong nasawi sa naturang virus.

Naitala ang active cases sa 44,772 na sumasailalim sa gamutan o quarantine kung saan 83.6% ang mild, 11.2% ang asymptomatic, 1.9% ang severe at 3.3% ang critical condition.

Mahigit 4.2 milyong indibidwal na ang naisailalim sa COVID-19 test ng 149 licensed laboratories ng bansa samantalang okupado na ang 45% ng COVID-19 ICU beds at 22% naman ng mechanical ventilators ang nagamit.

Una nang inihayag ni Health Undersecretary Maria Rosario Vergeire na nakaapekto sa kapasidad nilang ma detect at mai-report ang mga kaso nang suspensyon ng COVID-19 testing ng Philippine Red Cross.

Mahigit P12-B ang pondong inilaan ng Department of Health (DOH) para sa pagbili ng COVID-19 vaccines sa susunod na taon.

Gayunman nasa P2.5-B lamang ang inaprubahan ng Department of Budget and Management (DBM) sa ilalim ng national expenditure program.

Binigyang diin ng DOH na hindi sasapat ang mahigit P2-B alokasyon kung target ng gobyerno na mabakunahan ang 20% ng populasyon sa Pilipinas.

Ang Pilipinas ay sumali sa Covax facility na isang inisyatibo na nangangako ng patas na distribusyon nang madidiskubreng epekto at ligtas na bakuha laban sa COVID-19 kung saan 20% ng bawat populasyon ng mga sumaling bansa ay tiyak nang mabibigyan ng bakuna.

Sinabi ni Health Undersecretary Maria Rosario Vergeire na posibleng maabot ng estado ang tinatawag na herd immunity o proteksyon mula sa impeksyon ng sakit kung higit 60% ng mga Pilipino ang mababakunahan.

Kaya’t patuloy aniya ang apela nilang madagdagan pa ang budget para sa pagbili ng COVID-19 vaccines.

Nilinaw ni Vergeire na hindi naman naka depende sa herd immunity ang gobyerno subalit mahalaga ring ikunsider ito ng gobyerno para mabigyan ng proteksyon sa sakit ang buong populasyon.

Pinabaklas ni Manila Mayor Isko Moreno ang tarpaulin na nagdedeklara sa Communist Party of the Philippines-New People’s Army-National Democratic Front (CPP-NPA-NDF) bilang persona non grata sa National Capital Region.

Ang tarpaulin ay na-spottan sa bakal ng isang footbridge malapit sa U.S. Embassy sa Roxas Boulevard.

Sinabi ni Moreno na dapat magpakalat ng pag-ibig at hindi galit sa gitna na rin ng coronavirus disease 2019 (COVID-19) pandemic at dapat magkaisa ang mga Pilipino.

Manila City Mayor @IskoMoreno on the removal of “persona non grata” tarpaulins: “Spread love, not hate, in the midst of this pandemic. Filipino kapwa Filipino magkaisa muna.”#AlertoManileno pic.twitter.com/ySel5tkCZa

— Manila Public Information Office (@ManilaPIO) October 21, 2020

Makikipagpulong si Department of the Interior and Local Government (DILG) Secretary Eduardo Año sa mga opisyal ng Facebook sa susunod na linggo.

Ito ay para pag-usapan ang isyu  nang pagbura ng Facebook sa mga pages at accounts na umano’y may kaugnayan sa security forces ng bansa.

Sinabi ni Año na nais niyang matalakay sa Facebook kung paano nito ginagamit ang content-based restrictions at tiwala siyang makakabuo sila ng mga panuntunan kung paano makakatulong ang social media sa gobyerno para labanan ang pagkalatng mga pekeng balita at impormasyon.

Binigyang diin ni Año na mabibigyan ng kapangyarihan ang taumbayan sa pamamagitan ng mga tamang impormasyon para makiisa sa nation building tulad ng mga efforts ng gobyerno para kontrolin ang coronavirus disease 2019 (COVID-19).

Sinamantala na aniya ng mga kriminal at extremist groups ang pandemya para isabotahe ang pagbibigay ng serbisyo ng gobyerno.

Ayon pa kay Año, hindi naging transparent ang Facebook sa imbestigasyon nito sa mga account at pages na inalis ng social media platform kabilang ang sa militar.