Judith Estrada-Larino

Sapat ang suplay ng noche buena items ngayong kapaskuhan.

Tiniyak ito ni Agriculture Secretary William Dar matapos makausap ang food manufacturers na sinigurong hindi kakapusin ang suplay ng hamon at chicken products sa holiday season.

Sinabi ni Dar na kulangin man ang suplay ng baboy dahil sa African Swine Fever, uubra namang maging source ng protina ang karne ng manok na bultu-bulto ngayon ang supply sa bansa.

Ipinabatid muli ni Dar na nasa 260% ang inventory nila ng suplay ng manok kumpara sa parehong panahon noong isang taon dahil naipon ang supply matapos magsara ang maraming establishment tulad ng restaurants at fast food centers.

Naharang sa Subic Bay International Terminal ang ilang container vans na naglalaman ng basura mula sa Amerika.

Ipinabatid ng Bureau of Customs (BOC) na nakapangalan ang mga container vans sa Bataan 2020 Incorporated at idineklarang American ‘old corrugated cartons for repulping’.

Subalit natuklasang mga basura ang laman ng mga nasabing container vans nang isailalim sa full examination ang mga kargamento.

Tinutukoy pa ng BOC ang dami ng mga nasabing basura.

Mahaharap sa kasong paglabag sa republic act 10863 o customs modernization and tariff act at environmental laws ang nasa likod ng naturang kargamento.

Balik-China na ang 1,000 Chinese nationals na nagtatrabaho sa Philippine Offshore Gaming Operations (POGO) sa Subic Bay Freeport matapos magsara ang kanilang kumpanya.

Ipinabatid ni Subic Bay Metropolitan Authority (SBMA) Chair Wilma Eisma na mahigit P100-milyon ang nalugi sa Great Empire Gaming and Amusement Corporation kaya’t minabuti nitong pabalikin ng China ang kanilang mga empleyado.

Naiwan pa aniya ang 500 iba pang Chinese workers.

Una nang ibinunyag nina Senador Richard Gordon at Senadora Nancy Binay na mayroong halos 28 Chinese mainlanders ang nag-avail ng special resident retiree’s visa.

Muling nadagdagan ang tubig sa Angat Dam at iba pang dam sa Luzon sa nakalipas na magdamag.

Ayon sa PAGASA Hydrometeorology Division, nasa 191.57meters ang antas ng tubig ng Angat Dam kaninang alas-6 ng umaga, o mas mataas sa 190.17meters na naitala kahapon.

Nadagdagan din ang water level sa Ambuklao, Binga, San Roque, Pantabangan at Magat dams.

Samantala, nabawasan ang tubig sa Caliraya Dam, Ipo at La Mesa dam.

Umalma ang Makati City government sa findings ng UP OCTA Research team na kabilang ang lungsod sa mayroong mataas na kaso ng hawahan ng coronavirus.

Ayon kay Atty. Michael Don Camina, tagapagsalita ng Makati City government, nagulat sila sa pagkakasama ng OCTA team sa lungsod bilang areas of concern sa coronavirus disease 2019 (COVID-19).

Taliwas ito aniya sa report ng Department of Health (DOH) na mababa ang attack rate ng Makati City o nasa 6.21 lamang at maituturing na low risk.

Nasa 561 ang aktibong kaso ng COVID-19 sa Makati City kung saan nasa 6,793 ang gumaling na at 284 ang nasawi.

Pumapalo na sa 7,000 ang mga Overseas Filipino Workers (OFWs) na natengga sa mahigit 100 quarantine hotels.

Ito, ayon kay Labor Secretary Silvestre Bello III, ay matapos itigil ng Philippine Red Cross (PRC) ang pagproseso sa swab test ng mga umuuwing overseas Filipinos.

Sinabi sa DWIZ ni Bello na matagal lamang maproseso sa iba ang swab test ng overseas Pinoys gayung sa PRC ay inaabot lamang ng isa hanggang tatlong araw ay nailalabas na ang resulta kaya’t napapauwi na rin kaagad sa mga lalawigan ang mga ito.

Lumalaki rin aniya ang gastusin ng Overseas Workers Welfare Administration (OWWA) sa bayarin sa accommodation at pagkain ng mga umuuwing Pinoy.

Kawawa naman ‘yung ating mga kababayan na natetengga na, baka dumami pa, matetengga na naman ‘yung ating mga kababayan. 126 na hotels na ang napupuno namin dito sa Metro Manila. Meron na kaming pinapunta sa Tagaytay, puno na ang ating mga hotel dito,” ani Bello sa panayam ng Balitang Todong Lakas.

Dahil dito, nakiusap si Bello kay Senador Richard Gordon, chairman ng PRC, na kung maaari ay ibalik na ang pagproseso sa swab test ng overseas Pinoys lalo na’t ang Pangulong Rodrigo Duterte naman aniya ang nangakong babayaran ang utang ng PhilHealth sa PRC.

Umalma ang Department of Agriculture (DA) sa pagsisi sa importasyon ng bigas kaya’t bumaba ang presyo ng palay sa bansa.

Ayon kay Agriculture Spokesman Assistant Secretary Noel Reyes, nagmura ang bentahan ng palay dahil basa ang ilan sa mga inaning butil.

Wala aniyang gustong bumili ng basang palay kaya’t napipilitan ang mga magsasaka na ibenta na lamang ang kanilang ani sa P12 hanggang P19 kada kilo.

Kasabay nito, hinimok ng DA ang mga importer na itigil muna ang pag-aangkat ng bigas tuwing panahon ng anihan para matulungan ang mga magsasaka.

Una nang iginiit ni Senate President Pro Tempore Ralph Recto ang imbestigasyon sa reklamo ng mga magsasaka matapos lumagapak sa P12 na lamang ang presyo kada kilo ng mga bagong aning palay.