Judith Estrada-Larino

Nanindigan si Philippine National Police (PNP) Chief General Camilo Cascolan na ginawa lamang ng mga pulis ang kanilang trabaho sa burol ng anak ni political detainee Reina Mae Nasino.

Sinabi ni Cascolan na tumutupad lamang sa kanilang tungkulin ang mga pulis na reresponde depende sa sitwasyon kaya’t walang masama sa naging pagbabantay ng mga ito sa burol ni Baby River.

Una nang binatikos ang mga otoridad na nagbantay kay Nasino sa pagpunta nito sa burol at maging sa libing ng kaniyang anak dahil sa umano’y overkill na puwersa ng mga otoridad.

Bukod sa naka-personal protective equipment, nakaposas din si Nasino nang magtungo sa burol at libing ni Baby River habang napapalibutan ng puwersa ng jail guards at pulis.

Binalaan ng National Privacy Commission (NPC) ang mga online lending companies.

Kasunod na rin ito ng direktibang ipinalabas ng NPC na papayagan lamang ang online companies na kumuha ng personal data ng kanilang kliyente para gamitin kung papasa ang mga ito para makautang.

Nakasaad din sa kautusan ng npc ang pagbabawal sa pagkuha ng contact details tulad ng phone contacts at mga email list.

Una nang ipinasara ang halos 30 online lending companies dahil sa pamamahiya at pananakot sa mga kliyente nilang hindi nakakapagbayad ng utang sa tamang oras.

Modus ng mga naturang kumpanya ang pagte-text sa mga kakilala at kamag-anak ng mga nagrereklamo at ipaalam ang kanilang hindi nababayarang utang.

Umaapela si Supreme Court Chief Justice Diosdado Peralta sa mga otoridad na imbestigahan ang pamamaril ka Camarines Sur Regional Trial Court (RTC) Judge Jeaneth Gamilde at staff nito.

Sinabi ni Peralta na dapat kaagad maaresto ang nasa likod ng nasabing pananambang.

Binigyang diin pa ni Peralta na walang puwang sa bansa ang pag-atake sa mga hukom at mga abogado.

Nagpakawala ng tubig ang ilang dam sa Luzon sa gitna na rin ng buhos ng malakas na ulan dulot ng Bagyong Pepito.

Alas-6 ng umaga nang buksan ang Gate 1 ng Ipo Dam sa Bulacan at maging ang Ambuklao Dam sa Benguet.

Samantala, mamayang ala-1 ng hapon naman nakatakdang magpalabas ng tubig ang Magat Dam.

Ito, ayon sa National Irrigation Administration (NIA), ay para mapanatiling ligtas ang water level ng Magat Dam.

Mahigit 200 cubic meters per second ang pakakawalang dami ng tubig mula sa Magat dam sa gitna na rin ng patuloy na buhos ng ulan dulot ng Bagyong Pepito.

Tinukoy ng UP-OCTA Research Team ang apat na lungsod sa bansa na itinuturing na top high risk areas para sa coronavirus disease 2019 (COVID-19).

Ito ayon sa OCTA report ay dahil nakakapagtala ang Makati City, Baguio City, Mandaluyong City at Lucena City ng mataas na average new cases ng COVID-19 kada araw at critical care occupancy ng hanggang 69%  pataas.

Ipinabatid ng OCTA research team na nangunguna ang Makati City sa listahan ng high risk ares matapos makapagtala ng average na 59 coronavirus, 19 cases kada araw at 10% attack rate mula October 11 hanggang 17 at critical care occupancy sa 79%  hanggang nitong October 16 samantala ang safe level ng attack rate ay nasa 7%.

Ikalawa naman sa listahan ang Baguio City na bubuksan na sa mas maraming turista ngayong linggo na nakapagtala ng average na 39 new coronavirus,  19 cases kada araw samantalang ang attack rate ay 11% at hospital capacity ay nasa 69%.

Nasa 39 covid, 19 cases kada araw naman ang naitatala sa Mandaluyong City bagamat mababa ang attack rate nito na nasa 8%at hospital capacity sa 75%.

Ika apat sa listahan ang Lucena City sa lalawigan ng Quezon sa naitalang average na 24 covid 19 cases kada araw at 8 % na attack rate bagama’t pumapalo sa 95% ang hospital capacity nito.

Pasok din sa top 10 high risk areas ng OCTA research team ang Pasig City, Iloilo City, Pasay City, Marikina City, Ilagan, Isabela at Batangas City.

Samantala ipinabatid ng OCTA team na bumababa na ang naitatalang kaso ng COVID-19 sa Metro Manila na ang positivity rate ay nasa 6% at ang reproduction rate ay .7 o mas mababa sa national reproduction rate na .8%.

Kinumpirma ng Westmincom Western Mindanao Command ang pagkakapatay sa engkuwentro ng 2 takas na preso ng Basilan Provincial Jail.

Ito’y matapos magkasa ng hot pursut operations ang 4th Special Forces Battalion ng Philippine Army sa Barangay Cabunbata sa Isabela City.

Nakilala ang mga nasawing pugante na sina Nurhassan Lahaman na nahaharap sa kasong murder at Battuh Kusain Murag na nahaharap naman sa kasong frustrated murder at sangkot din sa lamitan bomnbing noong 2018.

Unang nagpaputok ang mga pugante kaya’t gumanti lamang ng putok ang mga sundalo at nagkapalitan ng putok na tumagal ng 5 minuto na nag resulta sa pagkasawi ng 2.

Nakuha sa pinangyarihan ng engkuwentro ang isang M653 rifle, 1 caliber 45 pistol at mga bala.

Samantala nahuli na ang isa pang preso na si Mahad Hassan sa Barangay Calvario noong nakalipas na linggo.

Magugunitang nagsagawa ng jailbreak ang mga preso sa Basilan Provincial Jail matapos patayin ang jailguard na si Florencio Asbi.—ulat mula kay Jaymark Dagala (Patrol 9)

Nagpaabot ng pakikiramay ang AFP sa pagpanaw ni MNLF Chairman Yisop Jikiri.

Ayon kay AFP Chief Of Staff General Gilbert Gapay si Jikiri ay naging instrumento para makamit ang pagtutulungan ng AFP at MNLF kaya’t humantong aniya sa pagbuo ng peace agreement ang gobyerno at MNLF.

Kinikilala rin ng AFP si Jikiri bilang isa sa mga haligi ng peace and development sa Sulu na lumaganap naman hanggang sa buong rehiyon ng Bangsamoro.

Tiwala si Gapay na magsisilbing inspirasyon si Jikiri ng mga Pilipino sa mga magaganda niyang simulain sa pagsusulong ng ganap na kapayapaan sa buong bansa. —ulat mula kay Jaymark Dagala (Patrol 9)

Tinatayang P1. 7 milyon na halaga ng ecstasy tablets ang nasabat ng mga otoridad sa isang buy bust operation sa Malate,Manila.

Dinampot din ng mga otoridad ang 6 katao na kinilalang sina Chia Alona, Jose Dianses, Matthew Golar, Michelle Sato, Barbie Dizon at Julius Emprado.

Ang mga suspek ay hawak na ng PNP- DEG Drug Enforcement Group habang inihahanda na ang kasong paglabag sa Republic Act 9165 ng mga ito.