Naghahanap ang Department Of Tourism (DOT) ng alternatibo sa RT-PCR swab test na mas abot-kaya para sa mga turista.
Ayon ito kay Tourism Secretary Bernadette Romulo-Puyat na nagsabi ring sa pagharap niya sa senate hearing na 77% ng mga turista ay nais bumiyahe kahit walang bakuna.
Sinabi ni Puyat na nagsasagawa sila ng pilot testing sa pagdetect ng COVID-19 gamit ang antigen tests, ang susunod aniya nilang ikakasa ay saliva testing.
Sumirit na sa 359, 169 ang kabuuang kaso na ngayon ng COVID-19 sa bansa matapos maitala ang 2, 638 na bagong infection.
Ayon sa Department Of Health (DOH) nangunguna ang Quezon City sa nakapagtala ng pinakamataas na bagong kaso ng COVID-19 sa 141 sumunod ang Cavite – 140, Laguna – 128, Batangas -120 at Rizal – 108.
Pumapalo naman sa 310, 303 ang total recoveries nang madagdag ang 226 na mga bagong gumaling sa sakit samantalang umakyat na sa 6,675 ang death toll nang maitala ang 26 na mga bagong nasawi sa virus.
Rumehistro naman sa 42, 191 ang active cases na ginagamot o naka quarantine kung saan 83. 1 % ang mild, 11. 3% ang asymptomatic, 2.1% ang severe at 3.6% ang critical condition.
Hanggang nitong nakalipas na Oktubre 18 ang 147 licensed laboratories ng bansa ay nakapagtest na ng mahigit 4 na milyon katao samantalang 46% ng COVID-19 ICU beds sa buong bansa ang okupado at 22% ng mechanical ventilators ang nagamit na.
Ang Pilipinas ay nasa ika-20 puwesto pa rin sa nakapagtala ng pinakamataas na kaso ng COVID-19 sa buong mundo.
Isinulong mismo ng mga alkalde sa Metro Manila ang pagpapalawig ng general community quarantine status sa kani -anilang mga teritoryo hanggang Disyembre.
Ayon ito kay MMDA General Manager Jojo Garcia na nagsabi ring tina-target ng Metro mayors ang unti unti nang pagluluwag ng restrictions sa gitna pa rin ng coronavirus disease 2019 (COVID-19) pandemic.
Sinabi ni Garcia na tutol din ang mga alkalde sa kalakhang Maynila sa pagbubukas muli ng mga sinehan, pagbabalik ng concerts at pagsdaraos ng christmas parties sa pribadong sektor.
Kasabay nito ipinabatid ni Garcia na ipapatupad na sa Metro Manila ang bagong schedule ng curfew o alas-12 ng hatinggabi hanggang alas-4 ng madaling araw subalit posibleng maging hanggang alas-3 ng madaling araw kapag nagsimula na ang Simbang Gabi.
Gayunman mananatili ang curfew hours sa Navotas na alas-8 ng gabi hanggang alas-5 ng madaling araw dahil mas malaki ang residential areas ng lungsod kaysa industrial sites.
Pursigido si reigning WBC at IBF World Welterweight Champion Errol Spence, Jr. na makatapat si WBA World Welterweight Champion Manny Pacquiao.
Si Spence ay nakatakdang i-depensa ang kaniyang title belts laban kay dating Light Welterweight at Welterweight champion Danny Garcia sa December 5 sa Texas.
Ayon kay Spence matapos si Garcia puntirya yang pabagsakin si Pacman na aniya’y palaos na kaya’t nais niyang siya ang huling makalaban ng Pambansang kamao.
Ipinagmamalaki ni Spence na isang living legend si Pacman at hindi pa siya nakasagupa ng parehong kalibre ng senador.
Hindi lamang aniya boxing star si Pacquiao kundi isang icon at megastar.
Sinabi ni Spence na dadalhin siya sa kakaibang popularidad nang pakikipag basagan niya ng mukha sa fighting senator.
Ni-raid ng French Police ang bahay ng mga hinihinalang Islamist militants tatlong araw matapos pugutan ng ulo ang isang gurong nagpakita sa kaniyang mga estudyante ng Cartons ni Propetang Mohammed.
Sa gitna na rin ito nang pakikisa sa mga rally sa buong bansa ng libu-libo katao para parangalan ang gurong si Samuel Paty at pag depensa na rin sa freedom of expression.
Ayon kay Gerald Darmanin, isang French politician at nagsisilbing minister of the interior ng French government.
Ang pag atake sa mga Islamist networks ay nagpapahatid ng mensaheng hindi papayag ang mga kaaway ng estado na makapagpahinga kahit saglit lamang.
Sinabi pa ni Darmanin na mahigit 80 imbestigasyon na ang isinagawa para sa online hate speech matapos ang pag atake na itinutulad sa 2015 massacre ng Charlie Hebdo Satirical Magazine kung saan 12 katao ang pinagbabaril dahil sa paglalabs ng mohammed cartoons.
Ang nasabing pag atake na una sa serye ng mga paglusob na kumitil sa mahigit 240 katao sa France ay nagdala sa milyon katao sa mga lansangan sa Paris para igiit ang pagbasura sa extremism.
Umaapela ng 1% hanggang 3% dagdag-presyo ang manufacturers ng ilang brand ng Noche Buena items at mga delata.
Ayon ito kay Department of Trade and Industry (DTI) Secretary Ramon Lopez na nagsabing ang posibleng pagtaas ng presyo ay kasunod na rin ng pagtaas ng production cost ng mga naturang brand.
Sinabi ni Lopez na pinag-aaralan na ng consumer protection group ng DTI kung makatuwiran ang pagtataas ng presyo o kung uubra namang bawasan ang hinihinging price increase ng manufacturers.
Sa mga Noche Buena items inihayag ni Lopez na lima lamang mula sa 20 brand ang naggigiit ng dagdag-presyo kaya’t dapat na bilhin ang may magandang kalidad sa tamang presyo.
Kasabay nito ipinabatid ni Lopez na available na ang mga promo sa mga grocery stores at palengke sa panahon ng Kapaskuhan.
Ipinauubaya na ng Malakanyang sa Ombudsman ang pagpapalabas ng kopya ng State of Assets, Liabilities and Networth (SALN) ng Pangulong Rodrigo Duterte para sa mga taong 2018 at 2019.
Ito ayon kay Presidential Spokesman Harry Roque ay dahil mayruong bagong guidelines na sinusunod ang Ombudsman sa paglalabas ng SALN.
Batay sa panuntunan ng Ombudsman kailangang may permiso muna sa subject ng SALN para magbigay ito ng go signal sa isang nagre-request o nais makakuha ng kaniyang SALN.
Nabawasan ng 60% hanggang 90% ng panganib sa coronavirus ang paggamit sa coconut at virgin coconut oil.
Ito ayon sa Department of Science and Technology (DOST) ang isa sa mga resulta ng pag aaral na pinondohan ng Philippine Council for Health Research and Development (PCHRD) at pinanungunahan ng Ateneo de Manila University hinggil sa anti-viral effects ng coconut oil compounds.
Sinabi ng researchers na na obserbahan nilang ang mga nasabing compound ay nakatulong sa pagpapalakas ng cell survival.
Gayunman inihayag ng researchers na kailangan pa ang mas maraming experiment para makita kung ang mas mataas na concentration ng coconut oil compound ay makapagpapababa sa replication rate ng virus na nagdudulot ng coronavirus disease 2019 (COVID-19).
Inihayag ni PCHRD Chief Dr Jaime Montoya na nakapagbibigay ng malaking pagasa ang nasabing resulta dahil hindi lamang nito ipinapakita na ang VCO ay makakabuwag sa virus kundi mayruon din itong pangunahing mekanismo para sa pag-regulate ng immune response laban sa COVID-19.
Binigyang diin naman ni DOST Secretary Fortunato Dela Peña na mayrung alternatibong solusyon laban sa COVID-19 maliban sa bakuna bagama’t kailangang magkaruon ng imbestigasyon sa posibleng prevention o treatment option misyon nilang mabigyan ng pag asa ang mga Pilipino sa pamamagitan ng patuloy na local research initiatives.
Hinimok ni House Assistant Majority Floorleader at ACT-CIS Representative Niña Taduran ang private media networks na magpalabas ng mga educational show.
Ayon kay Taduran batay sa Broadcast Code of 2007 ng Kapisanan ng mga Brodkaster ng Pilipinas (KBP) obligasyon ng media members na lumikha at magpalabas ng mga programang pambata at educational programs bilang tulong na rin sa distance learning ng pamahalaan.
Sa ilalim ng nasabing code 15% ng mga programa sa radyo at telebisyon ay dapat na para sa mga bata lalot responsibilidad ng TV at radio stations na isulong ang mental, physical, social at emotional development ng mga kabataan sa pamamagitan ng kanilang mga palatuntunan.
Partikular na isinusulong ni Taduran sa lahat ng radio at television stations ang pagpapalabas muli ng mga programang pambata na makakatulong sa pagpapalawak ng kanilang bokabularyo, kaalaman at pagsusulong ng kagandang asal.
Hinikayat din ni Taduran ang media networks na makipag tulungan sa Department of Education (DepEd) sa posibleng production ng mga bagong educational shows na makakatulong sa mga estudyante.
Walong sasakyan ang impounded at pito ang natikitan dahil sa iba’t ibang traffic violations sa ikinasang special operations ng Inter-Agency Council for Traffic sa bahagi ng SM Fairview sa Regalado Avenue sa Quezon City.
Layon ng hakbang na mabatid kung nasusunod ang binuong 7 transportation commandments sa mga pampublikong sasakyan.
Ang mga colorum na sasakyan ay dinala sa impounding area na kinabibilangan ng pitong illegal shuttle service at isang pribadong sasakyan.
Pito naman ang nahuli at naisyuhan ng temporary operator’s permit matapos lumabag sa pagmamaneho ng sasakyan kabilang ang kabiguang gumamit ng seatbelt at standard helmet sa motorsiklo.