Tiniyak ni House Speaker Lord Allan Velasco na ipapasa nila ang mga amiyenda para palakasin ang ngipin ng Anti-Money Laundering Act of 2021.
Sinabi ni Velasco na aaprubahan nila sa pagbabalik ng sesyon ng kamara sa ika-16 ng Nobyembre ang House Bill 6174.
Sa ilalim ng mga amiyenda sa nasabing batas, ipinabatid ni Velasco na dapat masiguro na maiibsan ang pahirap sa financial transactions lalo na ng mga Overseas Filipino Workers (OFWs) at mga nasa business sector.
Paluluwagin ni Manila Mayor Isko Moreno ang limitasyon sa pagpapapasok sa mga simbahan sa lungsod.
Sinabi ni Moreno na mayroon nang executive order na magtataas sa 30% sa kapasidad sa mga simbahan mula sa kasalukuyang 10% lamang.
Layon nang pagtataas ng kapasidad na madagdagan ang bilang ng mga taong maaaring payagang makapasok sa mga simbahan o bahay sambahan.
Ayon kay Moreno, dapat lamang na matiyak na masusunod ng mga mananampalataya ang health protocols para maiwasan ang pagkalat ng coronavirus disease 2019 (COVID-19) tulad nang pagsusuot ng face mask at face shield at social distancing.
Bahagyang bumilis ang kilos ng Tropical Depression Pepito.
Ayon sa PAGASA, ang sentro ng Bagyong Pepito ay pinakahuling namataan sa layong 475 kilometro, silangan ng Virac, Catanduanes.
Taglay ng Bagyong Pepito ang pinakamalakas na hanging umaabot sa 45 kilometro bawat oras malapit sa gitna at may pagbugsong umaabot sa 55 kilometro kada oras.
Ang Bagyong Pepito ay kumikilos sa bilis na 30 kilometro bawat oras sa pa-kanlurang direksyon.
Dahil dito, nakataas ang Signal Number 1 sa eastern portion ng Isabela tulad ng Palanan, Dinapigue at Eastern Portion ng San Mariano.
Nasa Signal Number 1 din ang northern portion ng Aurora partikular ang Dinalungan, Casiguran at Dilasag.
Ipinabatid ng PAGASA na dadaan sa northern Luzon-central Luzon area ang bagyo at inaasahang tatama sa eastern coast ng northern Luzon-central Luzon area bukas ng gabi o sa Miyerkules ng umaga.
Posibleng lumakas pa ang Bagyong Pepito at maging tropical storm ito bago ang landfall.
Matapos ang pagtama sa landmass ng Luzon, lalo pang lalakas ang bagyo at aabot sa severe tropical storm category sa Huwebes.
Tanging ang mga may edad 18 hanggang 65 lamang ang papayagang lumabas ng kanilang mga bahay sa Metro Manila.
Ito, ayon kay Parañaque City Mayor Edwin Olivarez, chairman ng Metro Manila Council (MMC), ang napagkasunduan ng mga alkalde sa Kalakhang Maynila.
Ang 15 hanggang 65 taong gulang aniya na pinayagan ng Inter-Agency Task Force ang iiral sa iba pang rehiyon.
Pinagso-sorry ng isa pang grupo si Metropolitan Manila Development Authority (MMDA) Spokesperson Celine Pialago dahil sa kontrobersyal na komento nito kaugnay sa pagkamatay ni Baby River Nasino na anak ni political detainee Reina Mae Nasino.
Ayon sa Salinlahi Alliance for Children’s Concerns, dapat magpublic apology si Pialago sa naging pahayag nitong itigil na ng sympathizers ang drama-serye sa pagkamatay ng sanggol na anila’y insensitive at kawalan ng puso.
Ang naturang pahayag anila ni Pialago ay pagpapakita lamang ng sistematiko at patuloy na effort ng Duterte administration na saktan at pahirapan pa si Nasino at mga nagluluksa sa pakamatay ng sanggol nito.
Samantala, binalikan naman ng National Union of Peoples’ Lawyers si Pialago at umaasang hindi nito danasin ang dinanas ni Nasino.
Subalit sinabi ni NUPL Secretary General Edre Olalia na tutulungan din nila si Pialago sakaling mangyari rito ang nangyari sa ina ni Baby River.
Nakauwi na sa bansa ang 260 na estudyante na na-stranded sa Israel.
Ang mga naturang estudyante ay mula sa 30 State Universities and Colleges (SUCs) na sumailalim sa Student Internship Abroad Program (SIAP) sa Israel at naabutan na doon ng pandemya.
Ayon sa Commission on Higher Education (CHED), katuwang nila ang Department of Foreign Affairs at Department of Transportation para makauwi na ng bansa ang mga nasabing estudyante.
CHED: 260 stranded student interns in Israel safely arrived in PH
Read more: pic.twitter.com/NGO8ZwMPSg
— Commission on Higher Education (CHED) (@PhCHED) October 19, 2020
Ipinabatid ng CHED na mayroon pang mahigit 300 mag-aaral sa Israel ang kanilang naiuwi sa bansa matapos sumailalim sa 11 international internship/training sa study program ng Israel.
Ang mga nakauwing estudyante ay nasa university pad sa Maynila para sa mandatory quarantine habang hinihintay ang resulta ng kanilang swab test.
Ipoproseso muna sa mga government laboratory ang PCR specimen ng mga dumarating na Overseas Filipino Workers (OFWs) sa Ninoy Aquino International Ariport (NAIA).
Ayon ito sa Overseas Workers Welfare Administration (OWWA) sa gitna na rin ng usapin ng hindi pagbabayad ng PhilHealth sa Philippine Red Cross (PRC) sa pagproseso nito sa PCR testing ng mga umuuwing Pinoy.
Sinabi ni OWWA Administrator Hans Leo Cacdac na inatasan na ng Inter-Agency Task Force (IATF) ang mga government laboratory na iproseso ang PCR specimen ng mga OFW.
Kasabay nito, nanawagan ang OWWA sa returning OFWs na magparehistro sa quarantinecertificate.com ng Bureau of Quarantine na pansamantalang gagamitin para sa pagre-release ng resulta ng PCR test.
Humingi ng pang-unawa ang OWWA sa mga umuuwing Pinoy.
Tiniyak din ng OWWA na patuloy na babantayan at ibibigay ang pangangailangan ng mga Pinoy habang nasa kanilang hotel quarantine facilities at naghihintay ng resulta.
Inayos na ang markings sa mga tren ng MRT-3 kasunod nang pagpapatupad ng mas mataas na passenger capacity simula ngayong araw na ito.
Mula sa dating kapasidad na 13% o 51 pasahero kada bagon o 153 pasahero kada train set, itinaas ang passenger capacity ng mga tren ng MRT-3 sa 30% o katumbas ng 124 na pasahero kada bagon o 372 na pasahero kada train set.
Patuloy din ang ginagawang pagbabantay ng mga train marshall sa loob ng mga bagon ng tren para matiyak na maipapatupad ang mga health at safety protocols para sa mga pasahero.
TINGNAN: Nagsimula nang ipatupad ng pamununan ng MRT-3 ang mas mataas na passenger capacity sa mga tren nito ngayong araw, ika-19 ng Oktubre 2020. pic.twitter.com/8qkJhuae9q
— DOTr MRT-3 (@dotrmrt3) October 18, 2020
Para matiyak ang kaligtasan ng mga pasahero, mahigpit na ipinatutupad ang ‘7 commandants’ sa loob ng mga tren na kinabibilangan ng laging pagsusuot ng face mask at face shield, bawal magsalita at makipag-usap sa telepono, bawal kumain, laging panatilihin ang maayos at sapat na ventilation sa mga PUV, laging magsagawa ng disinfection, bawal sumakay ang mga pasaherong may sintomas ng coronavirus disease 2019 (COVID-19) sa pampublikong transportasyon at laging sundan ang panuntunan sa physical distancing o one-seat-apart rule.
Nakadepende sa local government units (LGUs) ang pagtugon ng Task Force COVID-19 Shield sa mga pasaway o lalabag sa age restrictions sa gitna ng coronavirus disease 2019 (COVID-19) pandemic.
Ayon ito kay Task Force Commander Guillermo Eleazar matapos aprubahan ng Inter-Agency Task Force (IATF) ang 15-taong gulang hanggang 65-taong gulang na maaari nang lumabas ng kanilang mga bahay.
Sinabi sa DWIZ ni Eleazar na mahalagang magkaroon sila ng maayos na ugnayan sa LGUs dahil may kani-kaniyang polisiya ang mga ito hinggil sa area restrictions.
Depende po ‘yan sa kanilang mga magiging assessment. Pwedeng sabihin na maraming lalabag dito, pero sa ngayon naman kasi kung titignan natin ‘yung dating lumalabag na bata pa o matanda, e, ngayon allowed na, hindi na sila maco-consider na violator,” ani Eleazar. —sa panayam ng Balitang Todong Lakas
Pinagmulta ng Korte Suprema ang isang Justice ng Court of Appeals ng katumbas ng 1 taong sahod nito.
Ito ay matapos mabigo si Justice Marilyn Lagura-Yap na desisyunan ang 160 kaso sa loob ng reglementary period sa panahon ng kaniyang panunungkulan bilang Regional Trial Court Judge.
Sa per curiam decision ng high tribunal si Yap ay guilty sa gross inefficiency noong siya ay Presiding Judge pa ng branch 28 ng RTC Mandaue City.
Nabatid na hindi nagsumite si Yap ng certification ng case load sa Judicial and Bar Council nang mag-apply ito sa paglilinis sa hudikatura.