Judith Estrada-Larino

Nananatiling buo ang tiwala ng Pangulong Rodrigo Duterte kay DPWH Secretary Mark Villar.

Ayon ito kay Presidential Spokesman Harry Roque kahit pa sinabi ng Pangulo na talamak ang korupsyon sa DPWH lalo na sa hanay ng project engineers.

Sinabi ni Roque na hindi naniniwala ang Pangulo na sangkot sa katiwalian si Villar kundi ang ibang tauhan lamang ng DPWH.

Hindi na aniya kailangang mangurakot ni Villar dahil mas marami pang pera ang pamilya nito kaysa budget ng DPWH bukod sa nakita naman ng Pangulo na nakapag-deliver ang kalihim ng mga inaasahang trabaho nito.

Inihayag pa ni Roque na kung nakapagbitiw man ang Pangulo ng naturang mensahe nangangahulugan lamang ito na hindi dapat na magpakampante ang mga opisyal ng gobyerno dahil gugugulin niya ang natitira niyang panahon ng termino para linisin ang korupsyon sa gobyerno.

Kaugnay nito ipinabatid ni Roque na hindi malayong paimbestigahan ng Pangulo ang korupsyon sa DPWH.

Pinayuhan ng Department of Health (DOH) ang mga may-ari ng establishments at gusali na tiyaking may sapat na ventilation ang maliliit na espasyo ng kanilang mga lugar para laban ang posibleng COVID-19 infection.

Magugunitang binawi ng Centers for Disease Control and Prevention ng Amerika ang naunang pahayag hinggil sa airborne transmission ng coronavirus.

Nagpalabas ng memorandum ang DOH kung saan inaatasan ang administrator, employers, may-ari ng public buildings gayundin ang mga homeowners na magpatupad na ng bagong control measure sa kanilang nasasakupan.

Ipinagbabawal ng DOH ang anumang uri ng aktibidad sa masisikip at maliliit na lugar subalit kung hindi maiwasan ay dapat matiyak na  nakabukas ang mga pintuan at bintana.

Pinaiiwas din ng DOH ang mga indibidwal sa pagdistansa o lumayo sa tapat ng electric fan at air conditioners dahil posibleng mapabilis nito ang paglalakbay ng virus kung totoong airborne ang nature nito.

Hindi rin muna pupuwedeng gamitin ang mga device na naglalabas ng recirculated air o hangin na umiikot lang sa isang lugar tulad sa loob ng mga sasakyan.

Pagdating sa mga palikuran dapat na nakabukas palagi ang exhaust fans samantalang ang inidoro ay dapat nakasarado kapag pina-flush para hindi humalo sa hangin ang tilamsik ng tubig.

Magbubukas ang LTRFB ng dagdag na mga ruta sa probinsya na sumasakop sa Metro Manila.

Ipinabatid ni LTFRB Chairman Martin Delgra na kabilang sa mga dagdag ruta ang Davao City at Mabalacat, Pampanga.

Sinabi ni Delgra na nakikipag-ugnayan na sila sa iba pang local government units para mapayagang mabuksan ang kanilang borders para sa provincial trips.

Una nang binuksan ng LTFRB ang 12 modified provincial bus routes para sa mga pasaherong manggagaling at patungo sa Metro Manila at Regions 3A at 4A.

Tatapatan ni Pangulong Rodrigo Duterte ang mga riding-in-tandem sa bansa.

Sa gitna na rin ito nang tumataas na kaso ng kriminalidad na kinasasangkutan ng riding in tandem o mga gumagawa ng krimen na karaniwang magka-angkas sa motorsiklo.

Sinabi ng pangulo na tumaas ang kaso ng hold-up at street crimes nang buksan ang ekonomiya ng bansa na unang nalugmok dahil sa coronavirus disease 2019 (COVID-19).

Malaya na kasi aniyang nakagagalaw at nakabibiyahe ang mga tao na sinasamantala naman ng mga kriminal.

Ayon pa sa pangulo, multo para sa mga pulis kung paano habulin ang mga kriminal na madaling nakakatakas sakay lamang ng motorsiklo kaya pababantayan niya ito at pananagutin sa pamamagitan ng mga pulis ding naka-motorsiklo.

Pinayuhan ng World Bank ang Pilipinas na mag-invest sa telco infrastructure para sa mas mabilis na internet service.

Ito’y habang patuloy na tinataasan ng telecom companies ang kanilang capital expenditures upang mapaghusay ang kani-kanilang networks

Sa gitna na rin ito, ayon sa World Bank, ng patuloy na pagsusumikap ng telecom companies na taasan ang kanilang capital expenditures para mapahusay ang kani-kanilang networks.

Batay sa ulat ng World Bank Economist na si Kevin Chua na “A Better Normal Under COVID-19: Digitalizing the Philippine Economy Now” sinabi nito:

“In a society-wide digital transformation, the government itself must lead by example,”

Kabilang sa inirekomendang hakbang na tinukoy sa report na ipinalabas ng World Bank at ng National Economic Development Authority (NEDA) ay ang pag-upgrade sa digital infrastructure, pagsusulong sa digital payments, pagpapahusay sa kakayahan ng logistics system at pagpapayaman sa conducive business environment.

Una nang sinabi ng Pamahalaan na gumawa na ito ng hakbang upang matugunan ang kawalan ng imprastraktura, kabilang ang pagtatalaga ng ‘third telco’, ang Dito Telecommunity.

Gayunman ayon sa ilang Industry at media analysts, maaaring lumikha ang gobyerno ng mas maraming problema dahil sa umano’y iregularidad sa pagwawagi ng Dito sa bid, delays at rollout issues, gayundin sa posibleng banta sa pambansang seguridad.

“The biggest concern is that China will be able to listen in on our communications,” wika ni Dr. Renato De Castro, professor sa International Studies Department sa De La Salle University sa Manila.

Binigyang diin ng World Bank na dapat manguna ang Pilipinas sa pag-transform ng ekonomiya sa digital habang nahaharap sa public health crisis ang mundo kung saan napipilitan nang isagawa online ang mga pang-araw-araw na gawain.

Aprubado na ng vaccine expert panel (VEP) ng Department of Science and Technology (DOST) ang clinical trial sa bansa ng anti-coronavirus disease 2019 (COVID-19) vaccine na Sinovac mula sa China.

Gayunman, ayon kay Food and Drug Administration (FDA) Director General Eric Domingo, kailangan pang kumuha ng approval mula sa ethics board ang Sinovac makers bago makapag-apply sa FDA clearance para tuluyang magamit sa clinic trials.

Sinabi ni Domingo na VEP ang magrerepaso sa phase 1 at 2 ng clinical trial samantalang ang ethics board ang mag-eevaluate sa mga napiling kasali sa clinical trials at iba pang safeguards na ibinigay ng vaccine manufacturer sa mga participants.

Patuloy pa aniya ang pag review ng ethics board sa Sinovac at hihintayin muna ang resulta dahil hindi maaaring makapagsimila ang FDA ng anumang pag-aaral hinggil sa bakuna ng walang approval ng ethics board.

Ayon pa kay Domingo, tatakbo ng dalawa hanggang tatlong linggo ang FDA evaluation sa Sinovac para sa clinic trial kapag nakakuha na ito ng green light mula sa ethics board.