Judith Estrada-Larino

Kinuwestyon ni Senador Panfilo Lacson ang malaking budget ng Department of Public Works and Highways (DPWH) sa right of way ng mga infrastructure projects nito para sa susunod na taon.

Duda si Lacson kung talagang magagamit ang P36-bilyon na hinihingi ng DPWH para sa right of way.

Ito aniya ay dahil walang record na nagamit ang P11.4-bilyon na budget ng DPWH para sa right of way sa kasalukuyang taon samantalang P3.2-bilyon mula sa P10.8-bilyon lamang na budget ng ahensya para sa right of way noong 2019 ang nagamit.

Binigyang diin naman ni DPWH Secretary Mark Villar na malaki ang hinihingi nilang budget para sa right of way dahil maraming infrastructure projects ang nasa advanced stage na.

Bukod dito, sinabi ni Villar na mayroon din silang babayaran na dating claimants na nasa listahan nila. —ulat mula kay Cely Ortega-Bueno (Patrol 19)

Nagsimula nang magtrabaho ang mahigit 34,000 contact tracers.

Kasunod na rin ito, ayon sa Department of the Interior and Local Government (DILG), nang pagde-deploy sa mga naturang contact tracers sa iba’t ibang bahagi ng bansa.

Una nang ipinabatid ni DILG Secretary Eduardo Año na nasa mahigit 64,000 ang natanggap nilang application para maging contact tracer kung saan nasa 41,000 ang nagqualify at 34,000 ang nagsimula nang magtrabaho.

Binigyang diin ni Año na target nilang makumpleto ngayong buwan ang kinakailangang bilang ng contact tracers sa buong bansa.

Sa ilalim ng Bayanihan to Recover as One act (Bayanihan 2), P5-bilyon ang inilaang pondo para ipansuweldo sa mga kukuning contact tracers.

May bakuna na sa kontra coronavirus disease 2019 (COVID-19) sa Abril ng susunod na taon.

Ayon ito sa Pangulong Rodrigo Duterte batay sa kaniyang pakikipag-usap kay health Secretary Francisco Duque III kung masusunod anito ang mga panuntunan hinggil dito.

Ipinabatid din ng pangulo na nakausap niya si Russian Ambassador Igor Khovaev na nagsabing malapit nang maging available ang kanilang bakuna, kasabay ang pagpapaalala sa pagnanais ng Russia na magtayo ng planta ng pharmaceutical sa Pilipinas.

Binigyang diin ng pangulo na wala siyang pakialam kung saan gawa ang bakuna —Russia, China o Amerika man, basta’t ang mahalaga aniya ay magkaroon ng bakuna kontra COVID-19.

Una nang inihayag ng pangulo na mayroon na siyang perang ipambili ng bakuna para sa 20-milyong mahihirap na Pilipino, bagamat patuloy ang paghahanap niya ng pondo para mabakunahan din ang 113-milyong Pinoy pa.

Pinag-aaralan ng Philippine Amusement and Gaming Corporation (PAGCOR) na i-regulate para maging legal na ang online sabong.

Ito, ayon kay PAGCOR Chief Andrea Domingo, ay para madagdagan ang kita ng gobyerno.

Sinabi ni Domingo na kabilang sa posibleng panuntunan hinggil sa online sabong ay pagkuha ng kaukulang permit ng mga operator sa local government units (LGUs).

Una nang napaulat na naglipang mga ilegal na e-sabong dahil ipinagbabawal pa rin ng gobyerno ang sabong mula nang ipatupad ang lockdown.

Tila malamig ang ilang alkalde sa Metro Manila sa rekomendasyon ng gabinete na paikliin ang curfew hours.

Ayon kay Navotas City Mayor Toby Tiangco, dapat panatilihin ang nasabing curfew dahil epektibo naman ito lalo pa’t tumataas pa rin naman ang kaso ng coronavirus disease 2019 (COVID-19) sa bansa, partikular sa Metro Manila.

Local government units (LGUs) din aniya ang mananagot sakaling tumaas muli ang kaso ng COVID-19 dahil sa pagpapaluwag ng curfew.

Sinabi naman ni San Juan City Mayor Francis Zamora na nagbawas na rin sila ng oras ng curfew bagamat suportado niya ang katuwirang dapat na tuluyang pababain ang kaso ng virus bago tuluyang luwagan ang curfew.

Bigo ang kauna-unahang antigen test na isinagawa sa Baguio City  matapos hindi pumasa sa standards ng Department of Health (DOH).

Ipinabatid ito ni Retired Major General Restituto Padilla, spokesman ng National Task Force Against coronavirus disease 2019 (COVID-19), kaya’t patuloy na humahanap aniya ang gobyerno ng iba pang testing measures para sa COVID-19.

Ayon kay Padilla, mahigit kalahati ng resulta ng antigen test ay compatible sa resulta ng RT-PCR test subalit nasa ilalim ng kinakailangang parameter at nais ng DOH na maging 85% compatible ito.

Sinabi ni Padilla na tinututukan nila ang saliva o breath tests para sa COVID-19 bukod pa sa RT-PCR na itinuturing pa ring gold standard ng COVID-19 test.

Makakatulong aniya sa pagbawi ng ekonomiya kabilang ang industriya ng turismo kung ang mga test ay makapagpapalabas ng resulta sa mas maikling panahon.

Nagkausap na kagabi sina Senate President Vicente Tito Sotto III at bagong House Speaker Lord Allan Velasco.

Sinabi ni Sotto na tinawagan siya ni Velasco at nagkasundo silang magpulong para tutukan ang mga panukalang batas na kanilang gagawing prayoridad.

Nangako aniya si Velasco na ipapasa nila sa ikatlo at huling pagbasa ang 2021 national budget hanggang sa Biyernes —huling araw ng special session na ipinatawag ng Pangulong Rodrigo Duterte.

Ayon kay Sotto, pagkatapos ipasa ng kamara ang budget ay kaagad silang magpupulong ni Velasco.

Kasabay nito, ipinabatid ni Sotto na binati niya si Velasco sa pagkakaluklok nito bilang pinuno ng kamara.

I said, congratulations, God bless and good luck!” ani Sotto.

Binigyang diin ni Sotto na umaasa siyang magiging maganda ang working relation ng senado at ni Velasco tulad nang nangyari sa mga nakalipas na liderato ng Mababang Kapulungan.

I hope so. We had good relationships with the past leadership,” ani Sotto. —ulat mula kay Cely Ortega-Bueno (Patrol 19)

Hindi na nagtaka si political analyst Professor Ramon Casiple sa pagpapalit ng pinuno sa kamara.

Subalit sinabi sa DWIZ ni Casiple na mayroong implikasyon ito na higit pa sa pagpapalit ng House Speaker lalo na’t mag-e-eleksyon.

Kabilang, ayon kay Casiple, sa mga implikasyong ito ay kung sinu-sino ang mga tatakbo sa 2022 presidential elections o pasok pa rin ba sa kampo ng Pangulong Rodrigo Duterte si Cayetano.

Matter of time lang ‘yan. Nagkaroon ng special session, nagkaroon ng botohan, so, hindi ako nagtataka, kaya lang, syempre, may mga implikasyon ‘yan, kaya ‘yun ‘yung dapat nating bantayan kasi may eleksyon na parating,” ani Casiple. —sa panayam ng Balitang Todong Lakas