Judith Estrada-Larino

Tapos na ang boksing.

Ito ang kinumpirma ni Presidential Spokesman Harry Roque matapos maayos na ang gusot sa pagka-speaker sa pagitan nina Congressmen Lord Allan Velasco at Alan Peter Cayetano.

Sinabi ni Roque na malinaw na naiparating ng Pangulong Rodrigo Duterte kina Velasco at Cayetano ang pagsasantabi sa pulitika at atupagin ang agarang pagpasa sa 2021 national budget.

Maaari aniyang mayroon pa ring agawan sa puwesto sa kamara kung hindi pinulong ng Pangulong Duterte ang dalawang kongresista.

Iginiit ni Roque ang paninindigan ng pagulo na hindi maaaring maantala ang pagpasa sa 2021 budget dahil dito nakasalalay ang pondo para sa recovery at rehabilitation plan ng gobyerno kaugnay sa coronavirus disease 2019 (COVID-19) pandemic.

Pinaikli ng korte ang naunang ibinigay nitong panahon sa isang political detainee para makabisita sa burol hanggang libing ng nasawing sanggol nito.

Mula sa tatlong araw, ginawa na lamang ni Manila Regional Trial Court (RTC) Judge Paulino Gallegos na dalawang araw ang ipinagkaloob na furlough kay Reina Mae Nasino o ika-14 at ika-16 ng Oktubre na lamang mula ala-1 hanggang alas-4 ng hapon kada araw.

Una nang nagpatawag ng hearing si Gallegos matapos tutulan ng Warden ng Manila City Jail Female Dormitory ang paglabas ng bilangguan ni Nasino dahil sa kakulangan ng tauhan nilang mag-eescort kay Nasino patungo sa burol at libing ng anak na si Baby River bukod pa sa health reasons.

Tinawag namang ‘injustice’ ng Grupong KAPATID ang desisyon ng korte dahil ang ibang preso na kilala lalo na sa mundo ng pulitika ay nakakasama pa ang kanilang pamilya sa mga family events na dapat ding ibigay kay Nasino.

Dapat naman anilang mabigyan ng laya si Nasino na makapiling pa at masilayan sa huling pagkakataon ang kaniyang sanggol  na ililibing na si ika-16 ng Oktubre. —ulat mula kay Aya Yupangco (Pat 5)

Natapos na nitong nakalipas na weekend ang 17. 93 kilometer  Metro Manila Skyway Stage 3 Project

Ang nasabing Skyway ayon kay San Miguel Corporation President at COO Ramon ang ay ma-uugnay sa Southern at Northern Luzon bagama’t hindi muna bubuksan sa publiko dahil may mga kailangan pang ayusin dito na bahagyang naantala dahil sa mga pagulan.

Dahil sa Skyway Stage 3 ang biyahe mula sa South Luzon Expressway (SLEX) patungong North Luzon Expressway (NLEX) ay tatagal na lamang ng dalawampung minuto mula sa dating tatlong oras.

Ang biyahe mula Magallanes hanggang Balintawak ay magiging 15 minutos na lamang gayundin mula Balintawak patungong naia at 10 minuto mula Valenzuela pa Makati.

Ang skyway stage 3 ay kabilang sa 23 proyekto sa ilalim ng EDSA decongestion program ng Duterte administration.

Ibinunyag ng Commission on Audit (COA) ang iligal na pagkakaloob ng PhilHealth na P291 million na halaga ng hazard pay para sa mga empleyado nito.

Sa kanilang 2019 annual audit report hinggil sa PhilHealth ipinabatid ng COA na P236 million ang ibinigay na hazard pay sa regular employees ng ahensya at P55 million naman sa casual employees mula la 2016 hanggang 2019 kahit na paglabag ito sa Republic Act 7305 o Magna Carta for Public Health Workers bukod pa sa ibang mga panuntunan at regulasyon.

Binigyang diin ng COA na bagama’t tinutukoy sa Universal Health Care Law ang mga empleyado ng PhilHealth bilang health workers at uubrang mabigyan ng mga benepisyo at allowance kabilang ang hazard pay sa ilalim ng Magna Carta hindi ito maituturing na absolute dahil naka-depende ito sa mga mahahalagang probisyon at regulasyon.

Malinaw anito sa section 21 ng Magna Carta for Public Health Workers na obligadong mabigyan ng hazard pay ang  lahat ng public health workers kung sila ay naka expose sa high risk o low risk hazards sa halos 50% ng kanilang duty depende sa pagtingin at pag apruba ng kalihim ng Department of Health o mga otorisadong kinatawan nito.

Lumarga na ang pagre-assign sa iba’t ibang rehiyon ng 2k pulis na boluntaryong nagpalipat sa ilalim ng localization program ng PNP.

Sinabi ni PNP Chief General Camilo Cascolan na ang paunang rigodon ay inter-regional re-assignment ng mga tauhan patungo sa kanilang mga hometown o kung saan sila permanenteng residente.

Nilinaw naman ni Cascolan na 1 is to 1 swapping ang gagawin kung saan papalitan din ang mga ililipat na pulis ng mga pulis na nais magpare-assign sa mga lugar na kanilang iiwanan.

Subalit ang NCRPO at PRO 4A o CALABARZON aniya ay may kailangan pang plantsahing mga detalye sa kanilang staffing at deployment bago makumpleto ang kanilang localization upang hindi magkaroon ng vacuum o kakulangan ng mga tauhan sa mga lugar na ito.

Ginawang priority ni Cascolan ang localization para mapataas ang Morale ng mga pulis at maging mas epektibo sa kanilang trabaho.

Ang mga pulis aniya na nagta trabaho sa lugar kung saan sila residente ay magkakaroon ng sense of ownership at mas magmamalasakit sa kanilang komunidad.

34 na mali na ang namonitor ng Department of Education sa self-learning modules na ipinapagamit sa mga mag-aaral ngayong school year.

Ayon kay Education Undersecretary Diosdado San Antonio magkakaiba ang naispatan niyang mali sa mga naturang module na ilan ay maling pagpipilian sa multiple choice, kulay sa printing, paggamit ng mga salita at mga imaheng na overstretch.

Sinabi ni San Antonio na nakatakda silang mag-isyu ng erratum kaugnay sa mga pagkakamali sa materials.

Bukod pa rito, tiniyak ni San Antonio na naka-monitor din sila ng errors sa mga module na dinisenyo ng kanilang field units na ginamit lamang sa mga piling lugar.

Sa ngayon aniya nasa proseso pa sila ng pagtukoy sa pinagmulan ng mga modules na may mali na posibleng ginagamit sa mga pribadong paaralan.

Mataas pa rin ang tensyon sa loob ng New Bilibid Prison (NBP)  matapos ang riot sa pagitan ng magkalabang grupo nuong Biyernes na ikinasawi ng siyam katao at ikinasugat ng pitong iba pang preso.

Ayon ito kay Justice Secretary Menardo Guevarra kaya’t todo bantay ang mga tauhan ng Bureau of Corrections.

Sinabi ni Guevarra na may mga report na posibleng balikan ng isang grupo ang nakabanggang grupo bagamat kontrolado na rin nila ang sitwasyon.

Magugunitang nagpangabot ang Sigue Sigue Sputnik gang at Sigue Sigue Commando ala-una ng madaling araw na tumagal ng tatlong oras bago naawat ang dalawang grupo.