Judith Estrada-Larino

Pagpapaigting ng testing, tracing at quarantine.

Ito, ayon kay Metropolitan Manila Development Authority (MMDA) Chairman Benhur Abalos ang pinakamahahalagang hakbangin para maresolba ang pagsirit ng kaso ng coronavirus disease 2019 (COVID-19) sa bansa partikular sa Metro Manila.

Sinabi sa DWIZ ni Abalos na nagpasaklolo na siya kay testing czar Vince Dizon para ma-test ang mga nasa National Capital Region (NCR) sa pamamagitan ng Philippine Red Cross.

Nakisuyo rin aniya sya kay Department of the Interior and Local Government  (DILG) Undersecretary Benny Florece para naman sa tracing aspect kung saan itatalaga sa mga LGU ang mga desk officers ng Philippine National Police (PNP).

Ipinabatid pa ni Abalos na puspusan na rin ang paghanap nila ng mga quarantine facilities tulad ng mga hotel.

Bukod sa tatlong ‘to, nire-review pa namin ang policy, kaya siguro these coming days magmi-meeting kami, kasi tatlo lang ‘yan, ang sabi ng DOH at DILG —number 1 ang komunidad mo, bahay mo; number 2 ang trabaho mo, kung saan ka nagtatrabaho; at pangatlo ‘yung tinatawag na transportasyon, kung papunta ka, kung saan ka pupunta. Ito ‘yung tatlo na napakaimportante. Of course may iba pa, baka pumunta ka pang palengke, mamasyal ka pa… pero ‘yung binabanggit ko, itong tatlo ang pinaka-essential na dapat ireview ulit maigi, ang regulasyon, ang protocols nito, nasusunod ba o hindi,” ani Abalos. —sa panayam ng IZ sa Alas Sais

Kumokonti na ang mga Pilipinong sumusunod sa minimum health protocols tulad nang pagsusuot ng face mask at face shield at pag-obserba sa physical distancing.

Batay ito sa resulta ng tugon ng nasa survey ng OCTA Research group kung saan 67% ang sumusunod sa physical distancing na mas mababa sa 91% na nagsusuot ng face mask at 82% na naka-face shield naman.

Ayon pa sa researchers, 68% ng adult Pinoys ang regular na nag-oobserba sa physical distancing kapag may kakausapin sa labas ng kanilang mga bahay, 64% naman ang regular na nagsusuot ng face shield kapag lalabas at 89% naman ang nagsasabing palagi sila nakaface mask kapag lalabas ng bahay.

Ang survey ay isinagawa ng OCTA Research, gamit ang face-to-face interviews sa 1, 200 respondents na may edad 18 pataas.

Kukuha ng mas marami pang contact tracers ang Metropolitan Manila Development Authority (MMDA) sa gitna na rin nang patuloy na pagsirit ng kaso ng coronavirus disease 2019 (COVID-19) sa bansa.

Ayon kay MMDA Chairman Benhur Abalos, sila mismo ang kukuha ng contact tracers na ilalagay nila sa mga local government units sa Metro Manila.

Inihayag ni Abalos na sakaling matukoy bilang contact, kaagad nilang ihihiwalay ang mga ito at kailangan aniya nilang matutukan ang mga bahay, hanay ng transportasyon at ikatlo ang workplace.

Sinabi ni Abalos na magpupulong ang Metro Manila Council ngayong linggo para talakayin ang pagtaas ng kaso ng COVID-19 lalo na sa rehiyon.

Inaasahang papalo sa 5,000 ang arawan at mga bagong kaso ng coronavirus disease 2019 (COVID-19) sa Metro Manila hanggang sa katapusan ng Marso.

Ayon ito kay Dr. Guido David ng OCTA Research group dahil sa tinataya nilang pagtaas ng reproduction rate na nasa 1.8.

Sinabi ni David na tila natatalo na ng mga aktuwal na kaso ang kanilang pagtaya.

Kung ang reproduction rate ay nasa 1.8, ipinabatid ni David na asahan na ang mahigit 4,000 kaso hanggang ika-31 ng Marso sa Metro Manila.

Patay ang isang ginang na una nang napaulat na nawawala sa sunog sa residential area sa Pablo Ocampo Street sa Malate, Maynila.

Ayon sa Bureau of Fire Protection (BFP), natagpuan ang labi ng 69-anyos na biktimang si Lydia Mondero-Bernal sa loob ng banyo nang nasunog nitong bahay.

Ipinabatid ni Lilibeth Bernal, anak ng biktima, na una nilang tinulungang makalikas ang matanda na ring ama subalit nagulat sila nang hindi pala nakasunod ang kanilang ina.

Ilang oras aniya nilang sinuyod ang buong bahay hanggang alas-8 na ng umaga nang makita ang labi ng kanyang ina.

Pasado alas-3 ng madaling araw nang sumiklab ang apoy sa Malate na umabot sa ikatlong alarma bago tuluyang idineklarang fire out matapos ang mahigit tatlong oras. —ulat mula kay Aya Yupangco (Patrol 5)

Umakyat pa sa 1.6-milyon ang mga Pilipinong walang trabaho sa Enero ng taong ito.

Ayon kay national statistician Claire Dennis Mapa, nasa 8.7% ang unemployment rate sa unang buwan ng 2021 at ito aniya ay katumbas ng 4-milyong Pilipino may edad 15-pataas na walang trabaho.

Sinabi ni Mapa na ang unemployment rate sa taong ito ay mas mataas sa 2.4-milyong mga Pinoy na walang trabaho noong Enero 2020 at bahagyang mataas din kumpara sa October labor force survey na nasa 3.8-milyon.

Samantala, batay sa labor force survey ng Philippine Statistics Authority, nananatili sa 91.3% o katumbas ng 41.2-milyong Pinoy adults na may trabaho nitong Enero.

Inaasahang darating sa bansa sa ika-17 ng Marso ang 105 Pilipino mula sa Myanmar.

Kasunod na rin ito nang pagsuyod ng Philippine Embassy sa Myanmar sa mga Pilipinong nasa naturang bansa para mai-iwas sa mga protesta rito.

Tiniyak ni Philippine Ambassador to Myanmar Eduardo Kapunan, Jr. ang paghahanap sa mga Pilipino sa Myanmar lalo na ‘yung malalapit sa protest sites para mailipat muna ng tinutuluyan ang mga ito.

Ayon sa United Nations, 54 na ang nasasawi at nasa 1,700 na ang naaaresto sa mga pagkilos sa Myanmar.

Pitumpu’t tatlong porsyento (73%) ng mga Pilipino ang naniniwalang naging malapit o close sila sa kanilang mga kapamilya dahil sa coronavirus disease 2019 (COVID-19) pandemic na dahilan kaya’t marami ang nanatili sa bahay para makaiwas sa impeksyon.

Gayunman, lumalabas din sa tugon ng nasa survey ng OCTA Research na 50% ng 1, 200 respondents pataas ang nawalan ng trabaho o pinagkakakitaan at 28% naman ang nakaranas ng stress o matinding pagkalungkot.

Sa mga nakaranas ng closer ties sa kanilang pamilya, ang pinakamataas na porsyento ay naitala sa National Capital Region (NCR) – 80%,  Luzon – 82%, Visayas – 56% at Mindanao – 63%.

Sa epekto naman ng pandemya sa ekonomiya, pinakamalaking bilang mula sa 50% ng mga respondents na nawalan ng trabaho ay mula sa NCR na naitala sa 60% at pinakamababa naman ay sa Visayas na may 45%.

Ang face-to-face survey ay isinagawa mula ika-26 ng Enero hanggang ika-1 ng Pebrero.

Binalaan na ng Philippine Atmospheric, Geophysical and Astronomical Services Administration (PAGASA) ang mga residente sa Visayas at Mindanao kaugnay sa panibagong Low Pressure Area (LPA) na papalapit sa bansa.

Ipinabatid ng PAGASA na huling namataan ang nasabing LPA sa layong mahigit 1,000 kilometro silangan, timog-silangan ng Hinatuan, Surigao Del Sur.

Hindi naman inaasahang magiging malakas na bagyo ay magdudulot naman ng mga pag-ulan  sa ilang bahagi ng bansa ang naturang LPA.