Judith Estrada-Larino

Muling nagkasa ng balasahan ang liderato ng kamara.

Sa sesyon kahapon, tinanggal si Anakalusugan Congressman Mike Defensor bilang Vice Chair ng House Committee on Legislative Franchises at ipinalit si Zambonga Sibugay Congressman Walter Palma.

Naalis din si Quezon City Congressman Anthony Peter Crisologo bilang Assistant Majority Leader at pinalitan ni Palawan Congressman Gil Acosta.

Gayunman, si Crisologo ay inilagay bilang Vice Chair ng Committee on Games and Amusements.

Si Defensor na kilalang kaalyado ni dating House Speaker Alan Peter Cayetano ay una nang sinibak bilang Chairman ng House Committee on Public Accounts bukod pa sa pagkakatanggap sa iba pang Vice Chairmanship post mula nang maupo si House Speaker Lord Allan Velasco.

Bawal munang tumanggap ang mga residente ng Tagaytay City ng evacuees mula sa mga maaapektuhang bayan nang pagsambulat ng bulkang Taal kahit pa kaanak nila ang mga ito.

Kasunod na rin ito nang inisyung paalala ni Tagaytay City Mayor Agnes Tolentino kung saan nakasaad ang itinakdang drop areas para sa mga evacuee kaugnay sa kanilang COVID-19 testing at pagdala sa itinakda ring evacuation areas sa iba’t ibang bayan sa Cavite.

Subalit pinaghahanda ni Tolentino ang mga Punong Barangay sakaling dumagsa ang mga ililikas mula sa Batangas.

Sinasabing galing kay Cavite Governor Jonvic Remulla ang naturan direktiba at ang provincial government ang sasagot sa antigen test ng mga lilikas sa lalawigan.

Kasabay nito, muling pinaalalahanan ang mga residente na manatili sa bahay at isara ang mga bintana at pintuan para hindi makalanghap ng abo.

Idineklara ng House Committee on Housing and Urban Development ang pagkakaroon ng housing crisis sa bansa.

Kasunod na rin ito nang pag-apruba ng komite sa isang substitute resolution na nagdedeklara ng housing crisis matapos lumobo sa 67 milyong bahay pa ang kailangan hanggang sa susunod na taon.

Binigyang diin ni Committee Chair Francisco Benitez na ipinasa nila ang resolusyon para mahimok ang housing agencies na mag streamline at padaliin ang housing production.

Kabilang aniya sa malaking hamong kinakaharap ng sektor ng pabahay ang inefficiencies at red tape sa pamahalaan kung saan bago makapagtayo ng socialized housing ay kakailanganin pang dumaan sa 27 tanggapan, 78  permits, 146 na lagda at halos 400 dokumento kaya’t tumatagal ng apat na taon bago masimulan ang isang proyekto.

Kasabay nito, ipinabatid ni Committee Vice Chair  Florida Robes na itinuturing na factors sa pagdami ng informal settlers ang paglago ng populasyon, urban rural migration at mataas na presyo ng urban land sa kabila ng maraming batas para sa housing production.

Malalaman ngayong linggo kung kailangan ng mas malalim na imbestigasyon sa naging operasyon ng mga otoridad sa CALABARZON na ikinasawi ng siyam na aktibista.

Ayon ito kay Justice Undersecretary Adrian Sugay matapos ipag-utos ng Malakanyang ang imbestigasyon sa nasabing insidente.

Sinabi ni Sugay na nagsasagawa na ng vetting process ang Inter-Agency Committee na tumututok sa usapin, para mabatid kung nasa ilalim ito ng kanilang hurisdiksyon.

Kung sakali naman ay ire-refer aniya ang isyu sa Philippine National Police (PNP) para sa regular investigation.

Hinimok ng international group na Human Rights Watch (HRW) ang mga bansang miyembro ng United Nations na silipin ang anito’y lumalalang sitwasyon ng karapatang pantao sa Pilipinas.

Kasunod na rin ito nang pagkasawi ng siyam na aktibista sa ginawang operasyon ng mga otoridad sa CALABARZON.

Ayon sa HRW, dapat ikunsidera ng UN Office of the High Commissioner for Human Rights ang anito’y rapid response unit probe ng nasabing operasyon.

Binigyang diin ni HRW Deputy Asia Director Phil Robertson na dapat panagutin ng United Nations sa nasabing hakbangin.

Una na ring kinundena ng UN ang nasabing insidente.

Tuluy-tuloy ang mga pagyanig na nararanasan sa Bulkang Taal.

Sa nakalipas na 24-oras, ipinabatid ng PHIVOLCS na 51 volcanic earthquake ang naitala sa Bulkang Taal kabilang ang mga pagyanig na tumatagal ng 1-minuto hanggang 4-minuto.

Naglabas din ng mga usok na may taas na hanggang 5-metro ang main crater ng Taal Volcano.

Patuloy ang babala ng PHIVOLCS sa mga residente na iwasang lumapit sa Taal at sa mga local government units na paigtingin ang paghahanda.

Pinahihigpitan pa ng Department of Transportation (DOTr) ang pagpapatupad ng health protocols sa mga pampublikong sasakyan at terminal.

Ito, ayon kay DOTr Secretary Arthur Tugade ay para mapigilan ang pagkalat ng coronavirus disease 2019 (COVID-19) na patuloy ngayon sa pagsirit lalo na sa Metro Manila.

Partikular na ibinilin ni Tugade ang mahigpit na pagtutok ng enforcers mula sa Land Transportation Office  (LTO) at Land Transportation Franchising and Regulatory Board (LTFRB) at maging sa mga marshals na physical distancing sa loob ng mga public transportation.

Tiniyak ni Tugade na mahaharap sa parusa ang mga driver at operator ng mga pampasaherong sasakyan kapag lumabag sa health protocols.

Muling binalaan ng Philippine National Police (PNP) ang publiko sa pagsunod sa minimum health protocols tulad nang pagsusuot ng face mask at face shield at pag-obserba sa physical distancing.

Kasunod na rin ito nang direktiba ng Department of the Interior and Local Government (DILG) sa mga pulis na tumulong sa pagpapaalala sa publiko ng health and safety protocols.

Sinabi sa DWIZ ni PNP Spokesman Brigadier General Ildebrandi Usana na katuwang ng local government units ang mga pulis na may bitbit na yantok na pansukat na rin sa distansya ng mga taong nagkukumpulan.

Kailangan po talaga natin na panatilihin ang paggamit ng face mask at face shield, pagdadala ng alcohol, of course ‘yung minimum physical distancing, at iwasan natin ang mga matataong lugar,” ani Usana. —sa panayam ng Balitang Todong Lakas

Nagkasa ng three-strike policy si Navotas City Mayor Toby Tiangco para sa mga opisyal ng barangay na mabibigong ipatupad ang health protocols kontra coronavirus disease 2019 (COVID-19).

Ayon kay Tiangco, maraming reklamo ang natatanggap niya laban sa mga hindi nagsusuot ng face mask at lumalabag din sa 24-hour curfew para sa mga menor de edad lalo na sa mga nasa looban na aniya’y mga pangunahing dahilan nang pagsirit ng kaso ng COVID-19 sa kanilang lungsod.

Sinabi ni Tiangco sa kanyang kautusan na kapag naka-strike three na ang barangay official, sasampahan niya ng kasong neglect of duty ang mga ito.

Ipinabatid ni Tiangco na batay sa kanilang monitoring kahapon, Martes, mayroong 19 na bagong kaso ng COVID-19 ang lungsod, 30 ang nakarekober at isa ang nasawi.