Judith Estrada-Larino

Hinamon ng Philippine National Police (PNP) ang pamilya ng siyam na nasawing aktibista sa CALABARZON raid operations na kasuhan ang mga otoridad sa gitna nang paggigiit ng mga ito ng summary execution sa nasabing insidente.

Kasunod na rin ito nang paninindigan ng PNP na lehitimo ang mga nasabing operasyon nitong nakalipas na araw ng linggo.

Ayon kay PNP Spokesperson Brigadier General Ildebrandi Usana, dapat maglabas ng ebidensya ang mga nasabing pamilya at kasuhan ang kanilang mga police officers kung mapapatunayan talagang sinadya ang sinapit ng mga naturang aktibista.

Tiniyak muli ni Usana ang pag-imbestiga sa nasabing insidente dahil hindi nila kailanman kinukunsinti ang ilegal na hakbangin ng kanilang mga tauhan.

Mahigpit na itinanggi ng pamilya ng mga nasawi ang bersyon ng mga pulis na nanlaban ang mga biktima sa mga otoridad habang isinisilbi ang search warrants.

Hiniling ng mga gobernador sa Task Force Against COVID-19 na payagan ang testing para sa mga biyahero sa entrada pa lamang ng mga lalawigan upang ma-check na ang mga asymptomatic carrier.

Sinabi ni Marinduque Governor Presbitero Velasco, pangulo ng League of Provinces, na nais ng maraming gobernador na magkaroon muna ng COVID-19  testing sa point of entry, sa halip na point of origin, para aniya mabatid nila kung positive ang papasok na biyahero.

Marami aniya ang asymptomatic at kung gagamitin ang nakasaad sa resolution 101 na clinical exposure assessment, hindi makikita doon kung positibo ang papasok dahil marami ang asymptomatic carrier.

Una nang inaprubahan ng IATF ang pag-aalis ng ilang dokumento tulad ng travel authority, medical certificate at pag-quarantine kung mayroong mga sintomas para sa mga turista.

Hindi pa rin nailalabas ang mga labi ng apat na napatay sa “Bloody Sunday” raids ng mga otoridad sa CALABARZON.

Ito, ayon sa KARAPATAN Southern Tagalog ay bagamat naisumite na ang mga kailangang papeles at nabayaran na rin ang gastos sa punerarya sa Antipolo.

Sinabi ng grupo na delaying tactic ang idinadahilan ng Philippine National Police (PNP) na nais umano ng alkalde ng bayan ng tanay na sagutin ang gastusin ng mga nasawi sa paglabas ng mga ito sa punenarya.

Ganito rin anila ang ginawa ng mga otoridad sa labi ni Peace Consultant Randall Echanis noong nakalipas na taon.

Aalamin ng Department of the Interior and Local Government (DILG) sa local government units (LGUs) ang sumbong na ilan sa mga ito ang hindi pa rin tumatanggap ng mga turista kahit pa niluwagan na ang travel protocols.

Sinabi ni DILG Undersecretary Epimaco Densing III na hindi naman tinatanggal ang karapatan ng local government units na magsagawa ng testing kaya’t  uubra nang tumanggap ng turista ang mga ito.

Ayon kay Densing, kakausapin niya ang LGUs para ipaliwanag ang kahalagahan ng pagbubukas ng ekonomiya.

Una nang inireklamo ng Air Carriers Association of the Philippines (ACAP) na hindi pa nagbubukas ng pinto nila sa mga turista ang  Iloilo, Kalibo, Bacolod, Tacloban, Cagayan De Oro at General Santos City.

Kumbinsido si Congressman Edgar Mary Sarmiento na may kaugnayan sa pulitika ang pananambang kay Calbayog City Mayor Ronaldo Aquino.

Ayon kay Sarmiento, pulitiko ang nasa likod nang pag-ambush kay Aquino kung saan makikita sa video na sadyang binalak ang pagpatay dito dahil binalikan pa ito ng mga suspek kahit patay na ang alkalde.

Kasabay nito, natutuwa si Sarmiento na pinagbigyan ng Department of Justice (DOJ) ang hiling niyang imbestigahan ng NBI ang nasabing insidente na sisilipin din ng house committee on public order and safety matapos siyang maghain ng resolusyon hinggil dito.

Tiniyak ni Labor Secretary Silvestre Bello III ang ayuda sa mga Pilipinong mawawalan ng trabaho sa gitna na rin coronavirus disease 2019 (COVID-19) pandemic.

Ayon kay Bello, mayroon pang pondo ang Department of Labor and Employment (DOLE) para mabigyan ng tulong ang mga mawawalan ng trabaho dahil sa pandemya.

Sa kasalukuyan aniya ay patuloy ang pagbibigay nila ng ayuda sa mga nawalan ng trabaho sa iba’t ibang rehiyon

Kasabay nito, sinabi ni Bello na umaasa silang bababa ang unemployment kapag pumasa na ang wage subsidy program ng DOLE at ito aniya ay magiging bahagi ng Bayanihan 3.

Kinasuhan na ang anim na aktibistang dinampot ng mga otoridad sa operasyon nito sa Calabarzon nitong nakalipas na araw ng linggo.

Sinabi ni PNP Chief Director General Debold Sinas na kinasuhan na rin ng PNP region 4A dahil sa illegal possession of firearms ang siyam pang tinutugis na aktibista.

Magugunitang siyam katao ang nasawi sa nasabing operasyon ng mga otoridad sa CALABARZON area at ang mga ito ay iginigiit ng PNP na pawang mga aktibista.

Ininspeksyon ng DPWH ang three lane skyway extension na nag-uugnay sa skyway patungong South Luzon Expressway sa pamamagitan ng Alabang viaduct.

Sinabi ni DPWH Secretary Mark Villar na tiwala siyang maayos ang magiging biyahe ng mga motorista sa pamamagitan ng 3.9 kilometer Sucat alabang skyway extension project na 61%  tapos na.

Kasama rin sa proyekto ang pagpapalawak ng skyway Alabang Toll Plaza para ma accommodate ang mas maraming motorista sa parehong North at Southbound directions.

Iimbestigahan ng PNP-IAS Internal Affairs Service ang viral video kung saan makikita ang isang pulis na naglagay ng baril sa isang napatay na umano’y drug suspect na nangyari sa Valencia, Bukidnon.

Tiniyak ni PNP IAS Inspector General Atty. Alfegar Triambulo na rerepasuhin nilang mabuti ang nasabing video kahit patay na ang sangkot na pulis at iimbestigahan ang mga nakasama nitong pulis sa nasabing operasyon.

Makikita sa video ang pulis na kinilalang si Corporal Benzon Gonzales na tatlong beses na ipinutok ang baril sa ere bago ito inilagay sa tabi ng labi ng drug suspect na si Pol Estaniol.

Ang insidente ay nangyari noong Pebrero 20 at ilang araw lamang makalipas ay nasawi na rin si Gonzales sa isang aksidente.

Nagsasagawa na rin ng imbestigasyon ang National Police Commission ang nasabing pangyayari bagamat lumalabas sa pagsusuri nito na walang masamang record si Gonzales.