Judith Estrada-Larino

Papalo na sa 10,000 hanggang 11,000 ang posibleng maging bagong kaso ng coronavirus disease 2019 (COVID-19) sa buwang ito.

Ito, ayon kay Dr Guido David, fellow  ng OCTA Research Group, ang panibagong pagtaya nila matapos tumaas sa 2.03 ang reproduction rate o bilang ng mga dinadapuan ng virus.

Ipinabatid ni David na nagsimula ang outbreak sa Pasay, Malabon at Navotas at kumalat na sa iba pang lugar sa Metro Manila na nakapagtatala ng mataas na bagong kaso ng COVID-19 habang ang mga kaso sa tatlong original locations ay unti-unting bumabagal.

Marami aniyang lugar sa Metro Manila ang may pagtaas sa kaso ng COVID-19 na malapit na sa antas na nakita noong Agosto 2020.

Sinabi ni david na nagkarOon din ng pagtaas ng kaso ng COVID-19 sa mga kalapit na lalawigan ng Metro Manila tulad ng Rizal, Cavite at Bulacan samantalang bumababa ang kaso sa Cebu City.

Una nang tinaya ng OCTA Research Group ang 8,000 hanggang 9,000 bagong kaso na maitatala ngayong buwan.

Mga establisyimento na lumabag sa itinakdang proper ventilation.

Ito, ayon kay Dr. Beverlyu Lorraine Ho, Director 4 ng Department of Health, ang nakikita nilang compounding factor sa patuloy na pagsirit ng kaso ng coronavirus disease 2019 (COVID-19) sa bansa.

Sinabi ni Ho na malaking factor ng virus transmission ang ventilation kaya’t kailangang sumunod ng mga establishment sa itinakdang proper ventilation o pagkakaroon ng tamang sirkulasyon ng hangin para makaiwas sa posibleng COVID-19 transmission.

Ika-3 ng Marso nang magpalabas ang Department of Labor and Employment (DOLE) ng mga bagong panuntunan para sa mga pribadong establishment at pampublikong transportasyon.

Timbog ang mahigit 100 katao sa Sta. Cruz, Maynila matapos lumabag sa unang araw nang ikinakasang uniformed curfew hours sa Metro Manila.

Ayon sa mga otoridad, kabilang sa mga inaresto ang 68 menor-de-edad na inabutang naglalaro ng mobile games sa kalsada o natutulog sa labas ng kanilang bahay.

Sinabi ni Lindsay Javier, officer-in-charge ng reception and action center ng Manila Department of Social Welfare and Development, na karamihan sa mga dinampot na menor-de-edad ay walang proteksyon kaya’t binigyan ng face mask at face shield ang mga ito nang dalhin sa covered court ng Barangay 351.

Samantala, 150 katao naman ang nahuli sa Makati City sa unang gabi ng curfew.

Bukod din sa mga menor-de-edad, kabilang sa mga curfew violator ay informal workers na dumipensang nagtrabaho sila kahit alam nilang mas maaga na ang curfew tulad ng 18-anyos na si Menardo na nahuling namamasada ng tricycle sa Barangay Tejeros kasama ng backrider.

Nahuli rin ang isang babaeng masahista na walang maipakitang I.D. na patunay na nagtatrabaho siya habang mayroon ding ilan na naabutang bumibili ng pagkain sa tapat ng bahay.

Nananatili naman sa presinto ang mga inaresto at pinauwi matapos ang curfew ng alas-5 ng madaling araw.

Ipinabatid ni Makati City Police Chief Colonel Harold Depositar na walang establishment tulad ng mga bar na lumabag sa curfew bagamat marami rin ang nag relax at nasa kalsada pa kahit alam nilang may curfew.

Sa Quezon City, 60 katao ang hinuli matapos lumabag sa 23 checkpoints ng QC Police Department at kabilang dito ang isang call center na papasok sa trabaho, isang motorcycle rider na bibili ng pagkain at isang lalaki na bibili ng suka para sa niluluto niyang pagkain gayundin ang isang lalaking kakagaling lamang sa bahay ng kaniyang girlfriend.

Sa CAMANAVA area naman, 83 ang dinampot sa Caloocan City at dinala kaagad sa Caloocan Police Custodial Facility Extension.

Iilang menor-de-edad din ang inaresto sa Malabon, samantalang ang mga curfew violators sa Navotas ay pinasasalang sa RT-PCR testing sa loob ng isang linggo.

Inaasahang gugulong na ang imbestigasyon nang binuong special team ng Department of Justice (DOJ) para tutukan ang pagkamatay ng siyam na aktibista sa CALABARZON area.

Ipinabatid ni Justice Secretary Menardo Guevarra na kaagad nilang binuo ang special investigating team matapos i-refer ng DOJ ang imbestigasyon sa pagkamatay ng siyam katao sa Administrative Order 35.

Ang AO 35 ay isang inter-agency committee na naatasang mag-imbestiga para sa extra-legal killings, enforced disappearances, torture at iba pang grave violations na may kaugnayan sa right of life, liberty at seguridad ng isang tao.

Kasabay nito, nanawagan si Guevarra sa publiko lalo na sa mga nakasaksi sa krimen na kaagad makipag-ugnayan sa DOJ para sa imbestigasyon ng special team.

Tuluy-tuloy ang pagpapatupad ng lockdown sa ilang bahagi ng Quezon City, Mandaluyong City at maging lungsod ng Maynila.

Sa Quezon City, 23 lugar ang isinailalim na sa special concern lockdown tulad ng Robina St. sa Barangay Bungad kung saan ang 14-day lockdown ay nagsimula nitong ika-13 ng Marso matapos maitala ang anim na kaso ng coronavirus disease 2019 (COVID-19).

Pinapayuhan ang mga residenteng manatili sa bahay at kung mayroong mga trabaho ay maghome quarantine o kaya naman ay bumalik ng kanilang mga bahay matapos ang lockdown.

Kabilang din sa naka-special concern lockdown sa QC ang mga sumusunod:

1. De Los Santos Compound, Heavenly Drive, Barangay San Agustin – simula March 1
2. No. 46 and 50 K-9th Street, Barangay West Kamias – simula March 3
3. 49 & 51 E Rodriguez Sr. Ave., Barangay Doña Josefa – simula March 4
4. Paul Street and Thaddeus Street, Jordan Park Homes Subdivision, Doña Carmen, Barangay Commonwealth – simula March 4
5. No. 237 Apo Street, Barangay Maharlika – simula March 4
6. No. 64 14th Avenue, Barangay Socorro – simula March 6
7. No. 64-B Agno Extension, Barangay Tatalon – simula March 7
8. No. 90 Gonzales Compound, Barangay Balon Bato – simula March 8
9. No. 2A – 4 K-6th, Barangay West Kamias – simula March 8
10. Portion of Sitio 5, Jose Abad Santos, Barangay Sta. Lucia – simula March 9
11. No. 138 -178 Orchids Street and No. 153-165 Jasmin Street, Barangay Central – simula March 10
12. No. 43 Salvador St., Barangay Krus Na Ligas – simula March 10
13. Portion of Ramos Compound, Barangay Unang Sigaw – simula March 10
14. No. 86 C. Benitez Street, Barangay San Martin de Porres – simula March 10
15. No. 27 Mabituan Street, Barangay Masambong – simula March 11
16. No. 77 to Block 2 Lot 7 Orchids Street, Freedom Park 3, Barangay Batasan Hills – simula March 11
17. Christ the King Mission Seminary, No. 101 E. Rodriguez Sr. Ave., Barangay Kristong Hari – simula March 12
18. Nos. 20 and 22 Antique Street, Barangay Ramon Magsaysay – simula March 12
19. No. 43-N Langka Street, Barangay Balingasa – simula March 12
20. No. 82 Mabituan St., Barangay Masambong – simula March 12
21. PhilQ Manpower Services, No. 16 Tulip St., Barangay Roxas – simula March 12
22. No. 41 Mendoza St., Barangay Paltok – simula March 13

Sa Mandaluyong City naman, epektibo ang granular lockdown sa Zone 4, 5 at 9 ng Block 41 sa Barangay Addition Hills simula ika-18 ng Marso kung saan mahigit 500 pamilya ang apektado.

Mas maghihigpit lang ang mga otoridad sa pagpapatupad ng mga ordinansa ng local government units hinggil sa health and safety protocols.

Binigyang diin ito sa DWIZ ni Philippine National Police (PNP) spokesperson Brigadier General Ildebrandi Usana, sa gitna na rin nang pagsirit pa ng kaso ng coronavirus disease 2019 (COVID-19) sa bansa.

Sinabi ni Usana na noon pang isang taon naipatupad ang mga nasabing panuntunan subalit mag-aadjust ang PNP para sa strict implementation ng mga ito.

Nakapag-deploy na po ang ilan sa mga units ng PNP sa NCR base sa kautusan ng DILG na paigtingin ang implementation ng ating protocols dahil sa pagdami ng ating kaso ng COVID-19,” ani Usana. —sa panayam ng Balitang Todong Lakas

Mas mahirap ang sitwasyon ng bansa sa kalukuyan kaugnay sa paglaban sa coronavirus disease 2019 (COVID-19).

Ayon ito kay Dr. Tony Leachon, public health expert, kasunod nang patuloy na pagsirit ng kaso ng COVID-19 sa bansa.

Sinabi sa DWIZ ni Leachon na dapat ibalik ang voluntary enhance community quarantine (ECQ) kung kailan ipinatupad noong Hulyo o Agosto 2020.

Nararapat muling ibalik itong voluntary ECQ dahil mas mahirap tayo ngayon kaysa sa last year,” ani Leachon.

Samantala, dapat na muling umiwas sa non essential travels ngayong sumisirit pa rin ang kaso ng COVID-19 sa bansa.

Ayon kay Dr. Tony Leachon, public health expert, kailangang huwag munang magtungo ng mga mall o kumain sa mga restaurants gayundin ang pagsasagawa ng outing pati ang pagdaraos ng mga aktibidad online.

Binigyang diin sa DWIZ ni Leachon na higit na delikado ang sitwasyon ngayon kumpara noong isang taon dahil sa apat na variant ng coronavirus na kinabibilangan ng UK, Brazil, South African at Filipino variants.

Wala aniyang malilipatan ang virus kung mananatili ang mga tao sa mga bahay.

Kunwari, ang non-essential travels, hindi nalang muna tayo pupunta. ‘Yung magsisimba na dati na open na, online muna tayo. ‘Yung pagkain natin sa restaurant, ‘wag muna. ‘Yung paglabas natin, let’s say for outing, kunwari pupunta kayo sa beach, sacrifice tayo muna d’yan,” ani Leachon. —sa panayam ng IZ sa Alas Sais