Hinimok ng CBCP ang publiko na makiisa sa idaraos na Earth Hour sa Marso 27.
Sinabi ni CBCP Vice President at Caloocan Bishop Pablo Virgilio David, na ang Earth Hour ay daan para maipakita ang malasakit sa kalikasan sa pamamagitan nang pagpatay ng mga ilaw o kuryente sa loob ng isang oras mula alas-8:30 ng gabi.
Ayon sa World Wildlife Fund, ang tema ng earth hour 2021 ay speak up for nature.
Nakikipag-usap na ang Pilipinas sa Serum Institute of India (S.I.I.) para pag-aralan ang posibilidad na magawa ang local vaccine production.
Ayon ito kay Vaccine Czar Carlito Galvez, Jr, na kakabalik lamang mula sa India kung saan siya lumagda sa kasunduan para sa 30 million Novavax doses.
Sinabi ni Galvez na nakipag-usap na siya sa S.I.I para sa posibilidad na ibalik ang kakayahan ng bansa na makapag-produce ng sariling bakuna at handa aniya ang mahigit 100 scientist ng India na nais tumulong sa bansa para sa sariling COVID-19 vaccine ng Pilipinas.
Ang S.I.I ang kinukunsider na pinakamalaking vaccine manufacturer sa buong mundo at pangunahing supplier ng COVID-19 vaccine ng British-Swedish drugmaker na AstraZeneca.
Uubra pa ring makalabas ng Metro Manila ang mga menor de edad.
Ayon ito kay National Task Force against COVID-19 (NTF) Spokesperson Restituto Padilla kung kasama ang mga mahal sa buhay para sa family travels.
Binigyang diin ni Padilla na hindi pinagbabawal ang pag biyahe ng pami-pamilya palabas ng NCR o mga point to point at pagpunta sa iba’t ibang destinasyon gamit ang sasakyang pandagat, panghimpapawid o anumang land transportation.
Pinaalalahanan ni Padilla ang mga magba biyahe na i-check muna ang health protocols na ipinatutupad ng local government unit o sa kanilang destinasyon.
Kasabay nito ipinabatid ni Padilla na maaari ring lumabas ang mga menor de edad sa Metro Manila para magpa-check up sa kanilang mga duktor subalit kailangan lamang makipag ugnayan ang mga clinic sa mga mall sa management nito para maiwasang makahalubilo sa maraming tao ang mga hindi dapat lumabas.
Maayos at payapa ang naganap na plebisito sa Palawan.
Ayon kay PNP OIC Police Lt. General Guillermo Eleazar, walang naitalang anumang untoward incident sa pagdaraos ng plebisito kung saan 1,000 pulis ang itinalaga para magbigay ng seguridad sa mga botante at election officials sa halos 500 polling centers.
Gayunman ipinabatid ni Eleazar na naging hamon ang transportasyon at maging panahon sa pag-deliver ng election materials sa mga polling centers samantalang maliit na problema naman ang paglalabas ng impormasyon dahil sa mahinang internet signal at masamang lagay din ng panahon.
Pinakamalaking hamon aniya sa kanila na matiyak na sumusunod ang mga tao sa health and safety protocols sa mga pagtitipon.
Binalaan ng Food and Drug Administration (FDA) ang publiko laban sa pagbili at paggamit ng lip and cheek stain night berry ng Ever Bilena dahil sa pagtataglay nito ng microbial contaminants.
Ayon sa FDA lumalabas sa isinagawa nilang pagsusuri na lampas sa itinakdang limit ang lamang microbial contaminants ng nasabing cosmetics.
Hindi anito sumusunod ang naturang produkto sa mga panuntunan kayat may banta ito sa kalusugan ng publiko na maaaring magdulot ng skin irration, pangangati, anaplylactic shock at organ failure.
Tiniyak naman ng Ever Bilena ang pagsasagawa ng sariling testing para i-validate ang findings ng FDA at ilalabas nito ito sa susunod na pitong araw habang kumuha na rin sila ng third party laboratory para sa kaukulang testing ng produkto nilang lip and cheek stain night berry.
Nalusaw na ang binabantayang low pressure area sa bahagi ng West Philippine Sea.
Ayon ito sa PAGASA na nagsabing wala pa namang namamataang bagong sama ng panahon.
Samantala, sinabi ng PAGASA na mawawala rin ang mga pag ulan sa Northern Luzon na dulot ng buntot ng cold front.
Easterlies lang o mainit na hangin na nanggagaling sa Pacific Ocean ang umiiral sa bansa na nagdadala rin ng mainit na panahon lalo na sa tanghali subalit may posibilidad din ng mga pag ulan dahil naman sa localized thunderstorm.
Maaari namang bumalik sa susunod na linggo ang northeast monsoon o amihan na makakaapekto sa Luzon at eastern portion ng Visayas.
Sarado muna ang PNP Press Corps matapos magpositibo sa COVID-19 ang isang cameraman.
Pinayuhan ni PNP Spokesman Brigadier General Ildebrandi Usana ang mga nagkaroon ng contact sa naturang cameraman na mag-swab test na at mag-isolate hanggat hindi pa natatanggap ang resulta ng COVID-19 testing.
Kailangan din aniyang magpa-swab test ng mga tauhan ng PIO lalo na ‘yung mayroong direktang contact sa PNP Press Corp.
Naka-lockdown ng tatlong araw ang punong tanggapan ng National Police Commission (NAPOLCOM) matapos magpositibo sa coronavirus disease 2019 (COVID-19) ang ilang empleyado rito.
Sinabi ni NAPOLCOM vice chairman and executive officer Vitaliano Aguirre II na nagsimula ang lockdown ngayong araw na ito hanggang sa Biyernes para ma-disinfect ang buong gusali at maikasa ang contact tracing activity.
Dahil dito, inihayag ni Aguirre na naka-work-from-home muna ang mga empleyado ng NAPOLCOM at nagtalaga na sila ng staff mula sa personnel and administrative service sa ground floor lobby ng opisina para tumanggap ng mga dokumento mula sa mga kliyente.
Balik-normal operations ang NAPOLCOM Center sa Lunes, ika-22 ng Marso.
Magpapatupad ng isang buwang curfew at liquor ban ang lalawigan ng Bulacan dahil sa pagsirit ng kaso ng coronavirus disease 2019 (COVID-19).
Nakasaad sa direktiba ni Bulacan Governor Daniel Fernando ang pagsisimula ng curfew alas-11 mamayang gabi hanggang alas-4 ng madaling araw at magtatapos ito sa ika-17 ng Abril.
Tanging ang mga may emergency lamang at mga empleyadong may dokumento ang papayagang makadaan sa lalawigan sa curfew hours.
Bawal din hanggang ika-17 ng Abril ang pagbebenta, pagbili at pag-inom ng alak sa mga pampubliko at pampribadong lugar.
Ipinag-utos din ni Fernando ang pagbabalik ng border quarantine checkpoints para tuluyang mabantayan ang sitwasyon kontra virus.
Suspendido muna ng limang araw ang pagsasagawa ng Laging Handa Briefing na nag-a-update sa tugon ng gobyerno kontra coronavirus disease 2019 (COVID-19).
Nagsimula ngayong araw na ito at tatagal hanggang sa ika-21 ng Marso ang pagpapaliban sa pag-ere ng Laging Handa Briefing para bigyang daan ang malawakang disinfection sa gitna na rin nang pagsirit ng COVID-19 cases.
Off-air din muna ngayong araw na ito ang PTV subalit balik himpapawid ito bukas, ika-18 ng Marso, para matiyak ang kaligtasan ng mga empleyado at staff nito.
Tiniyak ng PTV na patuloy silang magbibigay ng mga impormasyon sa publiko at mag-a-update sa kanilang Facebook page at iba pang social media account hinggil sa ginagawang pagtugon ng gobyerno sa isyu ng COVID-19 pandemic.