Judith Estrada-Larino

Arestado sa Abu Dhabi ang isang dating pulis na nahaharap sa kasong murder sa bansa.

Kinilala ang suspek na si PO3 Ruben Baliong na una nang nasibak sa serbisyo matapos mag-AWOL (absent without leave).

Si Baliong ay naaresto nang pinagsanib na puwersa ng Philippine Center on Transnational Crime at INTERPOL dahil sa mga kaso ng pagpatay at physical injury.

Mayroong nakabinbing tatlong arrest warrant kay Baliong na ang huling post ay nasa Mandaluyong City Police Station 3 siya at dawit sa illegal drug trade at isa umanong contract killer.

Si Baliong ay nakaalis ng bansa noong Enero 2019 at nag trabaho sa Abu Dhabi bilang security officer.

Itinaas na sa Alert Level 2 ang Bulkang Taal sa Batangas.

Ito, ayon sa PHIVOLCS, ay kasunod na rin ng mga tumitinding aktibidad ng Bulkang Taal sa nakalipas na 24 oras.

Sinabi ng PHIVOLCS na kabilang sa mga aktibidad na ito ang 28 volcanic tremor episodes, apat na mahihinang pagyanig at isang tinatawag na hybrid earthquake.

Ipinabatid ng PHIVOLCS na dahil nasa Alert Level 2 na ang Bulkang Taal, posible na ang magmatic activity nito na maaari o hindi pa rin tuluyang sumambulat.

Enero noong isang taon nang huling pumutok ng Bulkang Taal.

Patuloy na nakapagtatala ng mataas na kaso ng coronavirus disease 2019 (COVID-19) ang apat na rehiyon sa bansa.

Kabilang dito, ayon kay Health Secretary Francisco Duque III, ang Region 4A (CALABARZON), Region 3 (Central Luzon,) Region 7 (Central Visayas) at National Capital Region kung saan nagkaroon aniya ng mataas na bilang ng COVID-19 ngayong kasalukuyang dalawang linggo kumpara noong ikatlo hanggang ika-apat na linggong nakalipas.

Ipinabatid ni Duque na sa Metro Manila, maituturing na nasa critical risk classification ang Pasay City at Malabon City habang ang mga lungsod naman ng Navotas, Makati at San Juan ay nasa high risk level.

Nasa 47% ang health care utilization rate ng mga ospital sa Region 7 at 48% naman sa Cordillera Administrative Region samantalang mataas din ang utilization rate ng Makati City at Davao Occidental habang nasa moderate risk areas naman ang Lapu-Lapu City, Ormoc City, Nueva Vizcaya, Santiago City, Ifugao, Mandaue City, Mandaluyong City at Cebu Province.

Dahil sa UK at South African variants ng COVID-19, sinabi ni Duque na nakipagpulong na sila sa mga alkalde sa Metro Manila para ipaalala ang pagtutok sa prevention, detection, isolation at treatment ng mga tinatamaan ng virus.

Isang barangay pa ang nadagdag sa ngayo’y 10 nang lugar sa Quezon City na nasa ilalim ng special concern lockdown.

Simula kagabi ay isinama na sa listahan ng special concern lockdown ang bahagi ng Jose Abad Santos Street sa Sitio 5 sa Barangay Sta. Lucia matapos magpositibo sa coronavirus disease 2019 (COVID-19) ang siyam katao sa nasabing lugar.

Tinatayang 71 pamilya sa barangay ang apektado at kailangang isalang sa RT-PCR test.

Mula sa arawang average na 80 kaso ng COVID-19 noong isang taon, sumirit pa ang infection sa 150 kada araw ngayong buwan.

Sa loob ng bahay pinakamatindi ang nakikitang hawahan ng coronavirus disease 2019 (COVID-19) dahil lahat ng miyembro ng pamilya ay nakikitaan ng mga sintomas ng virus.

Ayon ito kay Dr Rolly Cruz, chief epidemiologist ng Quezon City, batay na rin sa mga kaso ng COVID-19 sa lungsod, taliwas noong isang taon na isa o dalawa lamang miyembro ng pamilya ang nahahawahan.

Kaya makikita aniya sa mga quarantine facilities nila sa lungsod ay okupado ng pami-pamilya.

Binigyang diin sa DWIZ ni Cruz na mas high risk sa loob ng bahay dahil hindi naman naka-face mask ang mga tao rito.

Karamihan sa mga kaso natin ay nakukuha within the household. Ibig sabihin, pag may tinamaan sa isang bahay, talagang ang nahahawaan nya, halos lahat. Katulad noong mga nakaraang buwan, noong nakaraang taon, na isa o dalawa lang ‘yung nahahawa niya [COVID-positive] sa isang bahay. Ngayon nakikita na kung merong lima sa isang bahay, halos lahat sila, nahahawaan sila,” ani Cruz. —sa panayam ng IZ sa Alas Sais

Rerepasuhin ng Inter-Agency Task Force (IATF) ngayong linggo ang desisyon nitong luwagan ang quarantine restrictions sa gitna na rin nang pagsirit ng kaso ng coronavirus disease 2019 (COVID-19) sa bansa.

Kabilang sa rerepasuhin, ayon kay testing czar Vince Dizon, deputy chief implementer ng National Task Force Against COVID-19, ang pagbubukas ng mga sinehan na una nang ibinasura ng mga alkalde sa Metro Manila.

Bukod dito, sinabi ni Dizon na kailangan ding ma-review kung kailangang ipatupad muli ang barangay quarantine pass para sa mga lalabas ng kanilang mga bahay bagamat hindi pa naman nila kinukunsidera ang muling pagbalik sa pinakaamahigpit na quarantine protocol.

Dapat din aniyang marepaso ang mga protocol kaugnay sa pagpasok ng local tourists.

Nakadepende sa gobyerno kung paano nito gagawin ang pagbubukas muli ng ekonomiya ng bansa sa gitna ng patuloy na banta ng coronavirus disease 2019 (COVID-19).

Kasabay nito ang paghimok ni Dr. Pauline Convocar, pangulo ng Philippine College of Emergency Medicine, sa publiko na patuloy na sumunod sa minimum health standards.

Sinabi ni Convocar na manageable pa ang bilang ng mga pasyente na naa-admit sa mga ospital at umaasa aniya silang hindi ito aabot sa bilang noong isang taon.

Binigyang diin ni Convocar na dapat ligtas na mabuksan ang ekonomiya ng bansa sa pamamagitan nang pagche-check sa mga naitatalang kaso ng COVID-19 samantalang ang pagbabakuna aniya ay isa lamang sa dagdag na proteksyon laban sa COVID-19 kaya’t dapat pa ring sumunod sa minimum standards.

Una nang kinumpirma ni treatment czar Leopoldo Vega ang pagtaas ng mga na-oospital sa Metro Manila, Cagayan Valley at Central Visayas bagamat nasa moderate risk level pa rin ang healthcare capacity ng mga naturang rehiyon.

Nanawagan si Vice President Leni Robredo sa mga kababaihan na tumugon sa panawagang manguna, harapin ang mga hamon ng henerasyon at magsulong sa mas magandang mundo.

Ito, ayon kay Robredo, ay dahil sa pangangailangang mapagbuklod ang mga kababaihan para sama-samang magtrabaho sa isyu ng gender equality.

Wala aniyang babaeng dapat mahuli sa mga effort na pasiglahan ang partisipasyon ng mga ito para sa isang magandang bukas.

Ang pahayag ni Robredo ay kaugnay sa pagdiriwang ng Buwan ng mga Kababaihan.

Naniniwala si Philippine General Hospital (PGH) Spokesman Dr. Jonas Del Rosario na nagrelax ang mga tao kaya’t tumaas ang kaso ng coronavirus disease 2019 (COVID-19) sa bansa.

Sinabi ni Del Rosario na pinayagan na rin kasing lumabas ang mas maraming tao lalo na yung mga nagbabyahe na sa mga tourist destinations bukod pa sa ibang nakakalimot sa pag-obserba sa minimum health protocols

Ayon pa kay Del Rosario, maaaring nakaapekto rin sa pagsirit ng kaso ng COVID-19 ang UK at South African variants ng coronavirus na na-detect na sa bansa.

Lalong nawalan ng pangangailangang mag-time out ang medical frontliners.

Ayon ito kay Dr. Jonas Del Rosario, spokesman ng Philippine General Hospital (PGH), sa gitna na rin nang patuloy na pagsirit ng kaso ng coronavirus disease 2019 (COVID-19) sa bansa.

Sinabi ni Del Rosario na bago pa lamang ang pagbugso ng admissions subalit nakadepende naman ito sa trend at tiwala aniya silang hindi na babalik sa dati ang sitwasyon ng mga kaso ng COVID-19 sa bansa.

Ipinabatid ni Del Rosario na naabot na ng PGH ang 100 mark o bilang ng mga pasyenteng na-admit sa nasabing ospital dahil sa COVID-19 ngayong buwan.

Kahapon lamang aniya ay nasa 102 ang pasyenteng na admit sa PGH subalit ang pinakamataas nila ay nasa 105 kaya’t kailangan na naman nilang ireconvert ang ilang kuwarto ng ospital.