Judith Estrada-Larino

Mandatory na ang paggamit ng KyusiPass digital contact tracing app ng mga establisyimento sa Quezon City.

Ito, ayon kay Quezon City Mayor Joy Belmonte, ay para makatulong sa pagpapalakas ng contact tracing ng lokal na pamahalaan.

Sinabi ni Belmonte na kabilang ang naturang hakbangin sa inisyung bagong community quarantine guidelines ng Inter-Agency Task Force.

Maaaring kumuha ang mga negosyante ng kanilang QR code sa business permits and licensing department ng lungsod.

Samantala, binawi na ng Quezon City government ang liquor ban subalit mananatiling bawal ang pag-inom sa mga pampublikong lugar.

Dumoble ang bilis ang takbo ng mga tren ng MRT-3.

Ipinabatid ni MRT-3 Director for Operations Michael Capati na nasa 60 kilometers per hour na ang operating speed ng MRT-3.

Dahil dito, sinabi ni Capati na nasa 8 minuto hanggang 9.5 minuto na lamang ang waiting time mula sa dating 10 hangggang 15 minuto.

Kasabay nito, inihayag ni Capati na 66 na mula sa 72 bagon ng MRT ang nagagamit na at ang anim na bagon ay inire-repair.

Sa gitna na rin ito nang patuloy na pag-upgrade sa MRT-3 operations, batay na rin sa Build, Build, Build program ng Duterte administration.

Tila nag-relax ang mga Pilipino sa pagsunod sa minimum health protocols.

Ito ang nakikitang dahilan ni Department of the Interior and Local Government (DILG) Undersecretary Epimaco Densing III kaya’t sumirit pa ang kaso ng coronavirus disease 2019 (COVID-19) sa bansa partikular sa Metro Manila.

Sa kanyang personal observation, sinabi sa DWIZ ni Densing na sa Pasay City lamang ay nakita niya ang pag-uusap ng ilang tao ng walang mask.

‘Yung mga kababayan natin ay medyo nagre-relax doon sa ating minimum public health standards, pati ‘yung pagsusuot ng face mask, face shield, pagdidistansya, paghuhugas po ng kamay. Nauna ko itong nabanggit noong tumaas ang kaso sa Pasay, kasi kinumpara ko ‘yung December, January, na talagang nagpractice [ng minimum health standards] ang ating mga kababayan na taga-Pasay. At noong Pebrero, mga two, three weeks ago, talagang personal kong nakita na nag-uusap sila wala nang face mask, magkatabi, nagtatawanan, talsik-laway, so, medyo ang ating mga kababayan nag-relax sa pagpa-practice ng minimum public health standards,” ani Densing.

Kasabay nito, inamin ni Densing na maging ang local government units ay nag-relax din sa kanilang mga panuntunan kaya’t inatasan na rin nila ang mga ito na gumawa ng panuntunan para maparusahan ang mga lumalabag sa health protocols.

Nagpasa po kami ng direktiba na paigtingin ang ating mga LGUs sa pagbabantay ng pagpa-practice ng minimum health standards sa mga taong lalabas. Kaya nga nagpalabas kami ng direktiba na lahat ng LGUs, sana po, magpasa na ng ordinansa na nagpaparusa sa mga taong lumalabas nang hindi nagpa-practice nito. Ginagawa namin ang standard protocols, so, ito ang paulit-ulit na binabanggit ng ating mga health officials, ng mga local resident epidemiologist natin, na ang tanging paraan lang para hindi talaga kumalat ang virus ay pagpa-practice ng public health standards,” ani Densing. —sa panayam ng IZ sa Alas Sais

Tiwala ang Covax vaccine-sharing program na makapagbibigay sila ng 237-million doses ng coronavirus disease 2019 (COVID-19) vaccine ng AstraZeneca sa 142 bansa hanggang sa Mayo.

Ito, ayon sa Covax facility, ay kasunod nang pagpapabilis nila sa global roll-out ng vaccine supplies kung saan mahahati sa dalawa ang pagdeliver ng doses na una ay Pebrero at Marso habang ang ikalawang yugto ay sa Abril at Mayo.

Naka-depende anito ang bilis ng pagbibigay ng bakuna sa mga bansa na ang ilan ay mayroong mahigpit na requirements.

Ang Covax facility ay program ng World Health Organization at Gavi Vaccine Alliance na magbibigay ng bakuna para sa mga mahihirap at middle income countries.

Tila matira-matibay na ang mangyayari matapos luwagan ng Inter-Agency Task Force (IATF) ang quarantine restrictions.

Kasunod na rin ito nang pag-aalis ng travel authority at medical certificate para makapasok sa isang lugar ang isang indibidwal sa gitna ng coronavirus disease 2019 (COVID-19) pandemic.

Bukod dito, mas pinaboran pa ng IATF ang RT-PCR na higit na mas mahal kumpara sa antigen testing na ginagawa sa maraming lugar tulad ng Baguio City.

Sinabi sa DWIZ ni Baguio City Mayor Benjamin Magalong na sa ganitong sistema ay hindi na mapipigilan ang paglobo ng kaso ng COVID-19.

Talaga pong medyo delikado. Kaya nga po namin kinukwestyon ‘yung policy na ‘yon na ang local government pwede pa ring magpa-swab test pero RT-PCR nalang. E, kung ganoon po ang mangyayari wala po talagang darating. Pinagbabawal po nila ang anti-gen. Dalawa lang po kasi ang ginagawa po natin, e, anti-gen at RT-PCR. Pero dahil sabi nila ay RT-PCR nalang daw, e, wala po talagang aakyat dahil napakamahal po ng RT-PCR, P4,500,” ani Magalong.

Ang Baguio ay talagang tourism-based. Mahirap po talaga namin ma-determine kung positive ang umaakyat o hindi. Titignan nalang natin kung may sintomas pagdating sa triage saka nalang natin ite-test. Kaya, ang mangyayari no’n, talagang, we are opening this thing or restrictions too early, so, pwedeng tumaas talaga ang kaso natin dito,” ani Magalong. —sa panayam ng Balitang Todong Lakas

Mga aakyat sa Baguio dadaan pa rin sa triage

Dadaan pa rin sa triage ng Baguio City government ang mga aakyat sa lungsod.

Ito, ayon kay Baguio City Mayor Benjamin Magalong, ay para kahit paano ay magkaroon sila ng kontrol sa dami ng turistang tutungo sa kanilang lungsod.

Sinabi sa DWIZ ni Magalong na bago umakyat ng Baguio City, kailangan munang mag-register sa bisita.baguio.gov.ph.

Kasunod na rin ito nang pag-aalis ng Inter-Agency Task Force (IATF) ng travel authority at medical certificate sa mga requirements sa pagtungo sa isang lugar sa gitna na rin ng coronavirus disease 2019 (COVID-19) pandemic.

Binalaan ni Civil Service Commissioner (CSC) Aileen Lizada ang mga empleyado ng gobyerno na gumagamit ng padrino system para makauna ng bakuna laban sa coronavirus disease 2019 (COVID-19).

Ipinabatid ni Lizada na mayroong hierarchy o priority ang gobyerno sa kung sino ang unang tututukan kayat hindi dapat gumamit ng impluwensya at koneksyon para lamang mabakunahan kaagad.

Mahigpit aniya nilang binabantayan ang posibleng padrino system dahil dapat magkaruon ng pantay na oportunidad ang mga Pilipino sa pag-access ng bakuna.

Kasabay nito, inihayag ni Lizada na patuloy pa ang imbestigasyon hinggil sa report na ilang kawani ng pamahalaan ang nagpabakuna na sa labas ng bansa.

Magbibitiw si PDEA Chief Wilkins Villanueva kapag napatunayang nagkaroon ng sell bust sa nangyaring engkuwentro ng kanilang mga ahente sa mga pulis Quezon City sa isang mall sa lungsod.

Hinamon ni villanueva ang mga nagpapalutang ng sell bust na maglabas ng ebidensya ng CCTV .

Sinabi ni Villanueva na ayaw na niya sanang magsalita sa isyu dahil nag iimbestiga na ang nbi bagamat tiwala naman siyang lalabas ang katotohanan sa tunay na nangyari.

Ang sell bust ay pagbebenta ng droga ng tauhan ng gobyerno at kabaligtaran naman ng buy bust kung saan nagpapanggap ang mga operatiba na bibili ng droga para matiklo ang suspek.

Lumutang ang report na bago ang barilan ay nakabili umano ang mga pulis ng isang kilo ng shabu na nagkakahalaga ng anim na milyong piso sa umano’y asset ng PDEA.

Hawak umano ng mga pulis ang nabiling droga subalit hindi malinaw kung nabawi nila ang marked money na ginamit na pambili ng droga.

Napipintong magpatupad ng  kaltas singil sa kuryente ang Meralco sa buwang ito.

Ito ayon sa Meralco ay dahil sa nakikita nilang pagbaba ng generation coast at epekto ng refund order mula sa energy regulatory commission.

Ipinabatid ni Meralco Spokesman Joe Zaldariaga na  ito na ang ikalawang sunod na buwan na nagkaruon ng bawas singil sa kuryente kung saan malaking factor ang pagkakasama ng average refund rate na 0.1528 ¢ kada kilowatt hour bilang bahagi ng distribution rate true up ng Meralco.

Nuong isang buwan ay nasa 7.04 hanggang 8.67 ¢ kada kilowatt hour ang ibinawas ng Meralco sa singil sa kuryente mula sa 8.75 ¢  noong Enero.

Itinanggi ni COMELEC Spokesperson James Jimenez na suportado niya ang panawagang tumakbo sa 2022 national elections si Davao City Mayor Sara Duterte-Carpio.

Tinawag na kasinungalingan ni Jimenez ang post sa social media page na showbiz fanaticz na suportado niya umano ang run Sara run campaign!

Dahil dito nagpatulong si Jimenez sa netizens para mai-report ang naturang post na aniya’y intentionally misleading.