Judith Estrada-Larino

Kakulangan ng supply ng bakuna sa buong mundo.

Ito ayon sa Pangulong Rodrigo Duterte ang dahilan kaya’t wala pa ring nabibiling bakuna kontra COVID- 19 ang Pilipinas sa gitna na rin nang paghihintay ng sambayanan sa pagdating ng mga bibilhing bakuna mula sa vaccine manufacturers.

Sinabi ng Pangulo na naudlot din ang supply ng bakuna na ipinangako ng World Health Organization sa pamamagitan ng Covax facility nito dahil sa kawalan ng vaccine supply.

Binigyang diin ng pangulo na kahit bumili, magnakaw o manghiram ay wala talagang makuhang supply ng bakuna dahil sadyang kailangan ng lahat ng bansa ang COVID-19 vaccine.

Tiniyak ni Senador Panfilo Lacson ang buong suporta kay Senate President Vicente Sotto III sakaling tumakbong Pangulo o pangalawang Pangulo sa susunod na taon.

Sinabi ni Lacson na kilalang kilala niya kung paano mag trabaho si Sotto kaya’t suportado niya ito anumang puwesto ang takbuhan kahit sino pa man ang maging ka tandem nito.

Una nang lumutang ang umano’y niluluto nang tinaguriang macho bloc sa Senado na Lacson-Sotto tandem na ipantatapat sa mga kandidato ng administrasyon.

Ibinunyag ni Anakalusugan Party List Representative Michael Defensor na hindi inilipat sa pondong pambili ng COVID-19 vaccine ang P20 bilyon na kinaltas sa pension and gratuity fund ng mga pulis at sundalo.

Ito ayon kay Defensor ay dahil nananatili sa P2. 5 bilyon ang nakalaang pondo sa pagbili ng bakuna sa ilalim ng 2021 national budget.

Nagsisinungaling aniya si ACT CIS Party List Representative Eric Yap na unang nagsabing idadagdag sa pondong pambili ng bakuna ang ibinawas na pension and gratuity fund dahil ang P20 bilyon ay ginawang pork barrel fund o pondo para sa mga imprastruktura.

Sa ginawang pulong ng bicameral conference committee nasa P182 bilyon ang umano’y ginalaw na pondo ng mga Kongresista.

Tiwala si Finance Secretary Carlos Dominguez III na kakayanin ng BIR  na malampasan ang mahigit dalawang trilyong piso na target nitong koleksyon sa taong ito.

Ito ayon kay Dominguez ay  habang humaharap sa pinakamatinding misyon na makakolekta pa ng mas malaking buwis para pondohan ang mga programa kontra COVID-19 at suportahan ang recovery ng ekonomiya ng bansa.

Binigyang diin ni Dominguez na tiyak na maaabot ng BIR ang 2021 target collection nito dahil sa ikinasang digitalization initiatives na ikinasa ng BIR  kasama ang inayos na administrative systems at dedicated workforce.

Malaking bagay at nakasalalay aniya sa kinabukasan ng bansa ang collection performance revenue agencies tulad ng BIR lalo nat nananatili pa ang hamon ng COVID-19 pandemic.

Sinabi pa  ni Dominguez na wala siyang dudang makakamit ng BIR ang target collection nito o kaya ay malampasan pa ito.

Ibinasura ng mga adviser ng gobyerno ang panukalang unahing bakunahan ang ilang personalidad o influencers para mapalakas ang tiwala ng publiko sa mga bakuna kontra COVID-19.

Kasunod na rin ito nang pag-amin ni Presidential Spokesman Harry Roque na naglaan ang IATF ng 50  bakuna para sa aniya’y infuencers upang mapalakas ang vaccine confidence na tinabla naman ng National Immunization Technical Advisory Group (NITAG).

Sinabi ni Roque na kung anumang mayroon na supply ng bakuna ay dapat ibigay muna sa medical frontliners at hindi sa influencers na kinabibilangan ng mga opisyal ng gobyerno, media personality at celebrity.

Bawal nang magbitbit ng mga kasambahay ang mga diplomatic officer sa kani-kanilang overseas post.

Ayon ito kay Foreign Affairs Secretary Teodoro Locsin, Jr. kasunod nang tuluyang pagsibak kay Philippine Ambassador to Brazil Marichu Mauro matapos mang maltrato ng kanyang kasambahay.

Sinabi ni Locsin na dapat na ngayong mag-apply o maghanap sa POEA ng mga uubrang maging kasambahay ng diplomatic officers.

Tila humabol na ang isda sa taas presyo ng karneng baboy at manok.

Kasunod na rin ito nang isinagawang monitoring ng BFAR mula Pebrero 17 hanggang 23 kung saan ang frozen galunggong mula China ay nasa P200 na kada kilo at P240 ang bawat kilo mula sa Vietnam.

Ipinabatid ng BFAR na walang lokal na galunggong ang na unload sa Navotas fish port gayong dapat ay maraming huli matapos alisin na ang closed fishing season sa ilang lugar sa bansa.

Maaari anito ayon sa BFAR na hindi pa lumalaki ang mga galunggong o posibleng epekto na rin ito ng bagyong Auring at hanging amihan.

Samantala ang isdang alumahan naman ay sumirit sa P330  ang presyo kada kilo mula sa dating P260  dahil naman sa limitadong stock.

Dismayado ang mga Senador sa tila pag-deadma ng Facebook at Twitter sa pagdinig kaugnay sa online sexual abuse at exploitation.

Sinabi ni Senador Francis Pangilinan na sinayang ng Facebook at Twitter ang pagkakataong maibigay ang kanilang panig at mga panuntunan sa pagdinig ng senate committee on women, children, family relations and gender equality  matapos madiskubre ng DSWD at NBI ang online adoption na idinadaan sa social media network.

Binalikan ni Pangilinan ang Facebook at Twitter na aniya’y hindi marunong makipag-usap sa mga taga gobyerno na nireresolba ang problema ng online sexual abuse at exploitation na aniya’y sadyang nakakabahala.

Tiniyak naman ni Committee Chair Risa Hontiveros na hihingan nila ng paliwanag ang dalawang social media giants kung bakit bigong magpakita sa nasabing  pagdinig.

Iginiit ng Pangulong Rodrigo Duterte ang patuloy na paghabol sa mga tiwaling district engineers at iba pang opisyal ng Department of Public Works and Highways (DPWH).

Ang panibagong babala ay kasunod na rin nang pagsasapubliko ng Pangulo sa mga opisyal ng gobyerno na nasibak sa serbisyo dahil sa korupsyon at iba pang paglabag da tungkulin.

Binigyang diin ng Pangulong Duterte na hindi pa siya tapos sa pagwawalis sa mga tiwali sa DPWH na nakakalungkot aniya dahil ang iba sa mga ito ay kaibigan pa niya.

Sinabi ng Pangulo na hindi niya kailangan ang mga magta trabaho sa gobyerno na walang alam at maglulustay lamang ng pera ng taumbayan.

Kakaunting panahon na lamang aniya ang natitira sa kanyang termino at gugugulin niya ito sa pag0alis sa serbisyo ng mga hindi karapat dapat mag serbisyo sa gobyerno.

Sinasabing mayruong mga proyektong hindi natapos na itinago muna kayat nasuspinde ang mga opisyal na may hawak ng proyekto.

Hindi isinusuko ng senado ang karapatang mag-imbestiga sa misencounter sa pagitan ng Philippine National Police (PNP) at Philippine Drug Enforcement Agency (PDEA) sa isang mall sa Quezon City na ikinasawi ng apat katao.

Binigyang diin ito ni Senate Committee on Public Order and Dangerous Drugs Chairman Ronald Bato Dela Rosa bagamat una na niyang kinansela ang nakatakdang imbestigasyon ng komite sa nasabing insidente ngayong araw na ito.

Sinabi ni Dela Rosa na wala namang masama kung pagbigyan muna nila ang kahilingan ng Malakanyang na ipagpaliban muna ang senate inquiry para bigyang daan ang imbestigasyon ng nbi na mapagtuunan ang resource persons o ang mga otoridad na sangkot sa insidente.

Naniniwala si Dela Rosa na mas dapat unahin ang paghahanap ng hustisya bago isunod ang policy formulation o inquiry in aid of legislation.

Una nang nanawagan si Senador Risa Hontiveros na ipaglaban ng senado ang pagiging independent nito at karapatan na imbestigahan ang nasabing engkuwentro. —ulat mula kay Cely Ortega-Bueno (Patrol 19)