Judith Estrada-Larino

Iniurong sa Abril ng Department of Education (DepEd) ang early registration para sa school year 2021-2022.

Ito, ayon kay Education Undersecretary Jesus Mateo, ay kasunod na rin nang pagbabago sa school calendar noong isang taon.

Sinabi ni Mateo na ang orihinal na petsa ng early registration ay noon pang Enero subalit dahil sa naantalang pagsisimula muli ng mga klase noong nakalipas na taon ay ginawa na lang itong Marso.

Subalit ipinabatid ni Mateo na Abril na ang bagong target nila kaya’t hinihikayat nila ang mga magulang na maagang i-enroll ang kanilang mga anak.

Ikinakasa ang early registration para matiyak na naitatala, ang mga papasok na Kindergarten, Grades 1, 7 at 11 learners sa public at private elementary at high schools sa buong bansa.

Mayorya ng mga Pilipinong estudyante na naka-enroll sa distance learning ay gumagamit ng smart phone para dito.

Ayon sa survey ng Social Weather Station (SWS), 58% ng mga estudyanteng edad 5 hanggang 20 ang gumagamit ng device na 27% ay pag-aari na nila, 12% ay binili para sa distance learning, 10% ang hiniram, 9% ay ibinigay at .3% ay nirerentahan lamang.

Nasa 42% naman ng mga nagdi-distance learning ay wala o hindi gumagamit ng anumang device.

Sa 12% o halos 13% na bumili o nagrenta ng mga device para sa distance learning, 79% ang mayroong smartphone, 13% ang mayroong desktop/laptop, 5% ay may TV at 3% ang gumagamit ng tablet.

Lumalabas din sa survey na Metro Manila ang gumagamit ng pinakamaraming device para sa distance learing na nasa 96%, Luzon – 64%, Visayas – 43% at Mindanao – 41%.

Isinagawa ang nasabing fourth quarter 2020 SWS survey mula ika-21 hanggang 25 ng Nobyembre, gamit ang face-to-face interview sa 1,500 adult respondents sa buong bansa.

Kakaunti lamang ang naturukan ng Sinovac vaccine sa mga nagpaabot ng kagustuhang mabakunahan sa dalawang referral hospitals sa Metro Manila sa unang araw nang pag-arangkada ng vaccination program ng gobyerno.

Sa Dr. Jose N. Rodriguez Memorial Hospital and Sanitarium sa Tala, Caloocan City, nasa 180 lamang mula sa 1,165 na una nang nagpasabing magpapaturok ng bakuna ng Sinovac.

Samantala, nasa 21 staff members lamang ng Lung Center of the Philippines mula sa 1,400 employees na nagpa-register para mabakunahan ang aktuwal na naturukan ng Coronavac.

Taliwas naman ito sa Philippine General Hospital kung saan nasa 125 medical staff ang nabakuhan, mas mataas sa inaasahang 20 hanggang 50 staff na magpapaturok.

10% ng mga health worker mula sa Philippine General Hospital (PGH) ang nais magpaturok ng COVID-19 vaccine mula sa Sinovac.

Ayon ito kay Dr. Jonas Del Rosario, spokesperson ng PGH kaya’t halos 1,000 bakuna lamang muna ang inilaan nila para sa kanilang mga empleyado.

Subalit sa kabuuan ipinabatid ni Del Rosario na tuwang-tuwa ang maraming empleyado nila na mayroon nang bakuna kontra COVID-19.

Ito aniya ay bagamat nasa age group na 18 hanggang 59 lamang maaaring iturok ang nasabing bakuna ng Sinovac.

Hindi magbabago ang pasya ng Pangulong Rodrigo Duterte laban sa face-to-face classes kahit pa dumating na ang unang supply ng COVID-19 vaccine sa bansa mula sa Sinovac ng China na nasa 600,000 doses.

Iginiit ng Pangulo na ayaw niyang malagay sa alanganin ang buhay ng mga kabataan.

Una nang ibinasura ng Pangulo ang hirit ng ilang opisyal ng Department of Education na uubra nang isagawa ang face-to face classes dahil sa panganib ng COVID-19.

Pasensyahan na lang tayo.

Ito ang muling babala ni Valenzuela City Mayor Rex Gatchalian sa pamunuan ng NLEX kapag hindi pa nito inayos ang kanilang RFID system.

Ipinabatid sa DWIZ ni Gatchalian na mismong sa NLEX management nanggaling na aayusin nila hanggang sa ika-26 ng Pebrero ang sistema nila para ayunsin ang anito’y bugs.

Sila na ang nagsabi non, hindi na ako. Sa inyo nanggaling ‘yung deadline, siguraduhin nyo na wala na kong maririnig na complaint sa Feb. 27. Kayo na ang nagbigay ng petsa, pag ako nakarinig ng complain sa Feb. 27, pasensyahan na tayo,” ani Gatchalian. —sa panayam ng Serbisyong Lubos sa 882