Judith Estrada-Larino

Idinipensa ng Food and Drug Administration (FDA) ang emergency use authorization (EUA) na ibinigay sa bakuna ng Sinovac na may rekomendasyong hindi ito uubrang gamitin sa health workers.

Ayon kay FDA Director General Eric Domingo, mahigpit ang ginagawa nilang pag-check sa mga detalye ng bakuna lalo na kung kanino pupuwedeng iturok ang isang bakuna.

Sinabi ni Domingo na kahit mataas ang efficacy rate ng bakuna tulad ng Pfizer, batid nilang hindi ito pwede sa mga mayroong allergy taliwas sa Sinovac vaccine na ubra naman sa may allergies.

Binigyang diin ni Domingo na kapag nagbibigay sila ng EUA, inirerekomenda rin nila ang mga klase ng taong dapat tumanggap o hindi ng mga bakuna.

Una nang inihayag ni House Minority Leader Joseph Stephen Paduano na nagdulot ng duda sa efficacy ng Sinovac vaccine ang rekomendasyon ng FDA na huwag itong iturok sa medical frontliners at maging sa senior citizens.

Kumikilos na ang gobyerno para bigyan ng ayuda ang mga naapektuhang munisipalidad sa Surigao del Sur matapos bayuhin ng Bagyong Auring.

Sinabi sa DWIZ ni Labor Secretary Silvestre Bello III na inatasan siya ng Pangulong Rodrigo Duterte na bigyan ng 30 motorized fiberglass banca ang kada isa sa 19 na coastal towns sa nasabing lalawigan.

Pinakakasa rin aniya sa kaniya ng pangulo ang cash-for-work program para sa mahigit 200 apektadong residente sa kada munisipalidad ng Surigao del Sur. —sa panayam ng Balitang Todong Lakas

Itinuturing ng U.S. State Department si Pasig City Mayor Vico Sotto bilang isa sa mga champion laban sa korupsyon.

Kasunod na rin ito nang pagkakasama ni Sotto sa 12 international anti-corruption champions ng U.S. State Department.

Binigyang diin ni U.S. Secretary of State Antony Blinken na malaking banta ang korupsyon sa seguridad at katatagan gayundin sa paglago ng ekonomiya ng bansa, demokrasya at karapatang pantao.

Nakakawala rin aniya ng tiwala ng publiko ang korupsyon, pangangasiwa sa transnational crime at sumisira sa public at private resources.

Bukod kay Sotto, kabilang sa honorees sina Ardian Dvorani ng Albania, Diana Salazar ng Ecuador, Sophia Petrick ng Federated States of Micronesia, Juan Francisco Sandoval Alfaro ng Guatemala, Ibrahima Kalil Gueye ng Guinea, Anjali Bhardwaj ng India.

Kasama rin sina Dhuha Mohammed ng Iraq, Bolot Temiroc ng Kryrgyz Republic, Mustafa Abdullah Sanalla ng Libya, Francis Ben Kaifala ng Sierra Leone at Ruslan Ryaboshapka ng Ukraine.

Inihihirit ng National Federation of Hog Raisers ang suggested retail price (SRP) sa mga presyo ng karneng baboy.

Sa nasabing SRP na lang, ayon kay Chester Tan, pangulo ng grupo, ibabatay sa suplay at demand ng karneng baboy.

Sinabi ni Tan na uubra nang alisin ang price cap kapag mayroon nang SRP.

Una nang nagpataw ang gobyerno ng P270 hanggang P300 na presyo sa kada kilo ng baboy bilang price cap matapos sumirit sa mahigit P400 ang presyo ng kada kilo ng karneng baboy sa mga wet market.

Suportado ng Metro Manila mayors ang pasya ng Pangulong Rodrigo Duterte na huwag munang ilagay sa modified general community quarantine (MGCQ) ang buong bansa.

Ito, ayon kay Metropolitan Manila Development Authority (MMDA) Chairman Benhur Abalos, ay kasunod na rin nang pagkakaisa ng mga alkalde sa ipagpaliban muna ang pagluluwag ng quarantine protocols.

Magugunitang idinahilan ng Pangulong Duterte ang paglalatag muna ng bakuna bago ideklara ang MGCQ sa buong bansa.

Nakapagbigay na nang paunang bayad ang San Juan City government para sa binibiling 100,000 dose ng bakuna na gawa ng AstraZeneca.

Hindi naman tinukoy ni San Juan Mayor Francis Zamora kung magkano ang nasabing halaga dahil na rin sa non-disclosure agreement sa national government at sa nasabing British Swedish drugmaker.

Tiniyak ni Zamora ang kahandaan ng city government sa pagdating ng mga nasabing bakuna kung saan halos 30,000 residente ng lungsod ang handa nang magpaturok.

Patuloy pa rin aniya ang pag iikot ng mga team ng city government sa mga barangay upang makuha ang listahan ng mga nais magpa bakuna kontra coronavirus disease 2019 (COVID-19).

Inaasahang balik-normal na ang biyahe ng mga barko sa bansa ngayong araw na ito.

Kasunod ito ng 5,000 pasahero pa ang naghihintay ng biyahe sa mga pantalan sa mga barko sa mga lugar na naapektuhan ng Bagyong Auring.

Ayon kay Philippine Coast Guard Spokesman Commodore Armand Balilo, bukas na muli ang mga biyahe sa Surigao Del Sur, Surigao Del Norte, Bicol at Visayas.

Sinabi ni Balilo na karamihan sa mga barko na nanatili muna sa iba pang port dahil sa banta ng Bagyong Auring ay nagsimula na ring bumalik sa mga designated ports.

Dahil sa mga nakanselang biyahe sa kasagsagan ng Bagyong Auring, tinatayang 300 truck na naglalaman ng food supply ang stranded sa Lipata Port sa Surigao Del Norte at priority na maibyahe pa-Luzon kaagad ang 16 na truck na naglalaman ng mga baboy.

Sapat na ang suplay ng karneng baboy sa mga palengke sa Metro Manila.

Ayon ito kay Agriculture Secretary William Dar na nagsabing bumaba na rin ang presyo ng karneng baboy.

Kasunod na rin ito nang pagpapatupad ng 60-day price ceiling sa karneng baboy subalit ipinabatid ni Dar na maaari na ring irekomenda sa pangulo ang pagbawi sa price cap.

Nanguna si Davao City Mayor Sara Duterte sa presidential at vice presidential survey na isinagawa ng OCTA Research team.

Lumalabas sa survey ng OCTA Research na nakakuha ng 22% ng boto ng respondents si Mayor Sara kasunod si Senador Grace Poe na may 13%, Senador Manny Pacquiao at dating senador Bongbong Marcos na kapwa nakakuha ng 12%.

Pasok din sa survey si Manila Mayor Isko Moreno – 11% at Vice President Leni Robredo – 5%.

Nanguna rin ang vice presidential survey si Mayor Sara na may 14%, ikalawa si Mayor Isko – 11% at Pacquiao – 10%.

Sa nasabi pang survey ng OCTA Research team na isinagawa nitong ika-26 ng Enero hanggang ika-1 ng Pebrero, nanguna si Pacquiao sa senatorial race matapos makakuha ng 57% habang sumunod naman sina dating senador ngayo’y Sorsogon Governor Francis Escudero – 53% at dating house Speaker Alan Peter Cayetano – 50%.

Pasok din sa Magic 12 ng senatoriables sina broadcaster Erwin Tulfo, dating senador Loren Legarda, Moreno, Senador Panfilo Lacson, Bongbong Marcos, Senafor Juan Miguel Zubiri, dating senador Jinggoy Estrada, dating senador JV Ejercito at Senador Sherwin Gatchalian.