Bibisitahin ng Pangulong Rodrigo Duterte ngayong araw na ito ang mga biktima ng Bagyong Auring sa Surigao Del Sur.
Ayon kay Presidential Spokesman Harry Roque, kasama siya ng pangulo na mag-iikot sa mga apektadong lugar sa nasabing lalawigan.
Personal aniyang magbibigay ng ayuda ang Pangulong Duterte sa mga biktima ng Bagyong Auring na pagbaha sa Surigao Del Sur matapos umapaw ang Bonifacio River at Tandag River.
Iniisip lang ng Pangulong Rodrigo Duterte ang pinakaligtas na paraan kaya’t nagpasyang huwag munang mag modified general community quarantine (MGCQ) sa buong bansa.
Ayon ito kay Marinduque Governor Presbitero Velasco, Jr., pangulo ng League of Provinces of the Philippines matapos paboran ang naging desisyon ng pangulo.
Subalit, sinabi ni Velasco na dapat mabigyan ng karapatan ang LGU na magdeklara ng lockdown o mahigpit na quarantine system kung kinakailangan.
Kasabay nito, sang-ayon naman si Velasco sa paggigiit ng National Economic and Development Authority (NEDA) na mabuksan na ang ekonomiya ng bansa.
Iginiit ng isang grupo ng mga manggagawa ang P100 umento sa sahod sa National Capital Region (NCR).
Ayon sa Defend Jobs Philippines, panahon na para itaas ang suweldo ng mga manggagawa sa gitna na rin nang patuloy na pagtaas ng presyo ng bilihin at epekto ng pandemya.
Naiintindihan naman anila ang sitwasyon ng employers subalit kailangan ngayon ang suporta ng gobyerno para makaagapay sa hirap ng buhay ang mga empleyado.
Umapela naman ang Employers Confederation of the Philippines (ECOP) na ipagpaliban muna ang hirit na dagdag-sahod dahil dapa pa ang maraming negosyo dahil sa coronavirus disease 2019 (COVID-19) pandemic.
Ibinasura ng Pangulong Rodrigo Duterte ang rekomendasyong isailalim na sa modified general community quarantine (MGCQ) ang buong bansa simula sa unang araw ng Marso.
Ayon ito mismo kay Senador Christopher Bong Go dahil pinaninindigan aniya ng Pangulong Duterte ang posisyong walang bakuna, walang munang MGCQ.
Sinabi ni Go na naniniwala ang pangulo na ang estadong MGCQ ay hindi magiging kapaki-pakinabang sa buong bansa at sa halip ay baka magdulot pa ng problema.
Ipinabatid din ni Go na ipinaabot na ng pangulo kay Education Secretary Leonor Briones na hindi pa siya handang payagan ang face-to-face classes.
Tiwala aniya ang pangulo na maiintindihan ng mga Pilipino at economic managers ang sitwasyon kaya’t nagpasya siyang manatili sa GCQ ang maraming lugar sa bansa. —ulat mula kay Cely Ortega-Bueno (Patrol 19)
Nagsimula na ang tatlong araw na ban ang mga otoridad sa bird watching sa Candaba, Pampanga.
Ang hakbang ay para mapigilan ang pagpasok ng bird flu H5N8 matapos kumpirmahin ng Russia ang unang kaso ng human transmission nito.
Bahagi ng attraction para sa bird watchers ang mga specie na nagmumula mula sa mga malalamig na bansa.
Nagkasa na rin ng health protocol ang mga otoridad para maiwasan ang pagkalat ng bird flu.
Kasabay nito ang panawagan ni Candaba Mayor Rene Maglanque sa mga nag-aalaga ng itik na ireport sa binuo nilang task force ang anumang sintomas ng bird flu na makikita sa kanilang mga alaga.
Iniimbestigahan na ng Bureau of Fisheries and Aquatic Resources (BFAR) ang dahilan nang pagkukulay-pula ng tubig mula sa karagatan sa Ozamiz City.
Kumuha na ng sample ng tubig ang mga tauhan ng BFAR para pag-aralan.
Nagbabala rin ang BFAR laban sa pagkain ng mga isdang nagmumula sa naturang “red sea”.
Apat na barangay ang apektado ng phenomenon at nagrereklamo ang mga residente sa mabahong amoy mula sa seawaters.
Nakahanda na ang mga body bag at libingan para sa mga residente ng Libacao sa Aklan, na lumalabag sa health at safety protocols.
Ayon ito kay Mayor Charito Navarosa bilang babala sa mga aniya’y pasaway nilang residente na hindi alintana ang malaking panganib ng coronavirus disease 2019 (COVID-19) na sadyang nakakamatay pa.
Ipinabatid ni Navarosa na nakakasa na ang 100 body bags at 20 catacombs bilang paalala sa publiko na kailangang mag doble o triple ingat laban sa COVID-19 na patuloy pa rin ang pagtaas ng kaso.
Kasabay nito, ipinasara muna ang rural health unit ng munisipyo ng Libacao matapos magpositibo sa COVID-19 ang ilang empleyado rito at siyam na bahay ang isinailalim sa surgical lockdown.
Tiniyak ni Navarosa ang regular na disinfection at paglilinis sa kanilang palengke, municipal building, mga kalye, paradahan at municipal health office para makaiwas sa COVID-19.
Nagdulot ng matinding pagbaha at pagkawala ng supply ng kuryente sa Surigao Del Sur ang Bagyong Auring.
Mismong si Surigao Del Sur Governor Alecander Ayec Pimentel ang nagpakita sa social media ng matinding pagbahang inabot ng Tandag City.
Ayon naman kay Abel De Guzman, pinuno ng PDRRMC ng Surigao Del Sur bagamat hindi nag landfall ang bagyong auring sa kanilang lalawigan matinding pagtaas ng tubig ang dinanas nila kung saan 8,000 pamilya ang kanilang inilikas.
Ipinabatid pa ni De Guzman na nasa 126 barangays mula sa labing pitong munisipalidad ang naapektuhan ng mga pag ulang dala bagyong auring.
Karamihan aniya sa mga evacuees ay nasa evacuation centers at mga bahay na hindi naman apektado nang pagbaha.
Nawalan din ng supply ng kuryente ang maraming lugar sa Surigao Del Sur habang tuluy tuloy naman ang pag-rescue sa mga residente sa munisipalidad ng Lanuza.
Inabisuhan na ng local government ang publiko na kaagad makipag-ugnayan sa kanila para sa rescue operations at iba pang emergency situations.
https://twitter.com/dwiz882/status/1363336586910339076
Labing walong (18) bagong kaso ng B.1.1.7 o UK variant ng coronavirus ang naitala ng Department of Health.
Dahil dito ipinabatid ng DOH na umaabot na sa 62 ang kaso ng UK variant sa bansa at ito ay mula sa 757 samples na sumailalim sa sequencing ng Philippine Genome Center.
Sa bagong nakumpirmang UK variant cases 13 ay Overseas Filipino Workers na dumating sa bansa nuong Enero 3 hanggang Enero 27, 2021.
Ipinabatid pa ng DOH na ang tatlong bagong kaso naman ng UK variant ay mula sa Cordillera Administrative Region kung saan ang dalawa ay lalaki na labing dalawang taong gulang at konektado sa cluster mula sa Samoki, Bontoc, Mountain Province at ang isa ay apat naput isang taong gulang na babae mua sa la Trinidad, Benguet cluster.
Ang mga nasabing kaso ay naka-recover na samantalang inaalam pa ng DOH kung ang dalawa pa ay local cases o OFW.
Kasabay nito mayruong naitalang panibagong tatlong mutation ng COVID-19 at nagmula sa Region 7 o Central Visayas dahilan para pumalo na sa 37 ang mutation.
Patay sa engkuwentro ang isang hinihinalang miyembro ng New People’s Army sa Maguing, Lanao Del Sur.
Una nang nagtungo sa bundok ang mga Tropa ng 5th Infantry Battalion sa ilalim ni Lt. Col. Romulos Rabara para sa misyong i-exhume ang labi ng isang napatay na npa members nuong 2018.
Subalit habang patungo sa lugar ay kaagad pinaputukan ng isang grupo ng mga kalalakihan ang grupo kayat kanila namang binalikan ng putok ang mg ito.
Isang labi ng NPA member ang tumambad sa tropa ng mga sundalo matapos ang pakikipag bakbakan sa mga rebelde na mabilis na tumakbo.
Narekober ng mga otoridad sa lugar ang apat na high powered firearms tulad ng M16 rifles, M79 grenade launchers, isang low powered firearm, isang hand grenade, isang bandoleer , SA10 magazine na may bala, 22 rounds ng ammunition para sa M203 at limang combat packs na may lamang mga personal na kagamitan.