Dumistansya ang PNP mula sa isang printing services company na iniuugnay sa mga tarpaulin na humihimok kay Davao City Mayor Sara Duterte na tumakbo sa 2022 Presidential elections.
Ayon kay PNP Spokesman Brigadier General Ildebrandi Usana wala silang kinalaman o nagkaroon ng anumang transaksyon sa anumang publishing company partikular sa Benjas printing services.
Sinabi ni Usana na wala siyang nalalaman hinggil sa “official publisher ng PNP” at maaari aniyang ginamit lamang ang PNP ng nasabing kumpanya bilang marketing strategy nito at nakapaglimbag na ito ng materials ng ibang ahensya ng gobyerno at malalaking kumpanya.
Sa inilabas na litrato ng CNN Philippines isa sa mga tarpaulin na ginamit sa motorcade ng Alyansa ni Inday Movement (AIM) noong February 25 ay nagpapakita na ang mga materyales ay “designed and printed by: benjas printing”.
Ang facebook page na Benjas printing ay inalis na subalit una nitong ipinost sa cover photo nito ang pagiging official publisher ng PNP noong 2020.
