Judith Estrada-Larino

Hinamon ni Bayan Muna Party-list Representative Carlos Isagani Zarate ang Pangulong Rodrigo Duterte na kondenahin ang presensya ng 220 Chinese militia vessels sa Julian Felipe Reef ng West Philippine Sea (WPS) na sakop ng Exclusive Economic Zone ng bansa.

Sinabi ni Zarate na kulang ang inihaing diplomatic protest ng Department of Foreign Affairs (DFA) laban sa China sa nasabing usapin hanggat walang pahayag mismo nang pagkondena mula sa Pangulong Duterte.

Makailang beses na aniyang pinalampas ang mga mapangahas na aksyon ng China sa WPS kaya’t nakakabahalang mauwi na naman ito sa pagtatayo ng artificial island sa nasabing bahura.

Sa halip na tumutok sa isyu ng red-tagging sa mga aktibista, binigyang diin ni Zarate na dapat tapatan ng agresibong aksyon ang mga nambu-bully sa bansa.

Naglabas ang Philippine Postal Corporation (PhilPost) ng stamp bilang pagdiriwang ng unang Easter mass sa bansa, 500 taon na ang nakalilipas.

Ayo sa Catholic Bishops’ Conference of the Philippines (CBCP) website, ang disenyo ng stamp ay bahagi ng mga hakbanging gunitain ang 500 years ng Christianity sa bansa.

Ang commemorative stamp ay inilabas bago ang pagdiriwang na gagawin sa Limasawa Island sa Southern Leyte sa ika-31 ng Marso.

Makikita sa mga stamp ang litrato ng Limasawa Island at isa naman ay larawan ng isang pari na hawak ang communion host at chalice at nakasulat ang mga katagang: “Limasawa — A Gift of 500 Years of Faith and Discipleship”.

Sa official first day cover, ang logo ay inilagay sa isang devotional painting sa first Easter mass sa Shrine of the Holy Cross at first mass sa Triana Village sa Limasawa.

Ang commemorative stamps at officil first day covers ay available sa Philatelic Counter, Manila Central Post Office at lahat ng Manila Post Offices.

Nagrekomenda ng aniya’y drastic measures si Senador Sherwin Gatchalian matapos isailalim sa mas mahigpit na restrictions ang Metro Manila, Bulacan, Cavite, Laguna at Rizal simula ngayong araw na ito.

Kabilang dito, ayon kay gatchalian, ang pagpapatupad ng mga local government units (LGUs) ng istriktong localized lockdown at ipagbawal ang anumang pagtitipon kahit pa 10 katao lang.

Bukod pa ito sa pagkakaroon ng kani-kanilang PCR testing laboratory ng kada siyudad sa Metro Manila, ipagbawal na ang home quarantine dahil sa hawahan sa pamilya at kailangang kailangan ang bakuna para marami na ang maturukan nito. —ulat mula kay Cely Ortega-Bueno (Patrol 19)

Mas maagang inanunsyo dapat ang pagsailalim sa Metro Manila at ilang karatig na lalawigan na sa general community quarantine (GCQ).

Ito, ayon kay Senador Panfilo Lacson, ay para nagkaroon pa ng pagkakataon o panahon ang mga negosyo na mai-adjust ang kanilang mga nakaplanong aktibidad at hindi kahapon lamang, araw ng Linggo, base na rin sa inanunsyo ni Presidential Spokesman Harry Roque sa pagsailalim sa ‘NCR Plus’ o Metro Manila, Laguna, Cavite, Rizal at Bulacan sa GCQ simula ngayong araw na ito.

Iginiit ni Lacson na dapat ay mayroong partikular na lugar at time bound ang pagpapatupad ng mas mahigpit na community quarantine.

Tiwala si Lacson na ang mga adjustment sa ipinatutupad na restrictions ay gawin alinsunod sa nagbabagong kondisyon sa isang lugar.

Ang susi aniya rito ay patuloy na assessment sa sitwasyon at kondisyon ng COVID-19 cases sa iba’t ibang lugar para ito na ang pagbabatayan ng gagawing adjustment. —ulat mula kay Cely Ortega-Bueno (Patrol 19)

Binatikos ni dating Health secretary at Iloilo Congresswoman Janette Garin ang draft order na nagbabawal sa ilang kumpanya na bumili ng sariling coronavirus disease 2019 (COVID-19) vaccines para sa kanilang mga empleyado.

Ayon kay Garin, ang dapat isaalang-alang ay ang pampublikong kalusugan kaya’t may draft man o wala, dapat mabilang ang lahat sa pag abot sa herd immunity.

Binigyang diin ni Garin na mortal sin na dagdagan pa ang hamon sa gobyerno para maiwasan ang pagkalat ng COVID-19.

Kinuwestyon din ni Garin kung sino ang nasa likod ng nasabing draft order o mayroon bang kumu kontrol kay Health Secretary Francisco Duque III.

Suportado ng Simbahang Katoliko ang paghihigpit muli ng mga panuntunan sa gitna na rin nang patuloy na pagsirit ng kaso ng coronavirus disease 2019 (COVID-19) sa bansa.

Sinabi sa DWIZ ni Father Jerome Secillano, executive secretary ng public affairs committee ng Catholic Bishops’ Conference of the Philippines (CBCP) na inaasahan na nila ang mga panibagong paghihigpit ng gobyerno lalo pa’t tuluy-tuloy ang pagtaas ng kaso ng COVID-19 partikular sa Metro Manila.

Hindi naman kami nabigla, gano’n naman talaga pag tumataas ang kaso [ng COVID-19], talagang may protocol na dapat ipatupad,” ani Secillano.

Tiniyak naman ni Secillano na tuluy-tuloy ang pagdaraos ng misa subalit lahat ay online na.

Hindi naman na aniya aalisin ang online mass dahil marami sa mga tao ang sadyang hindi pwedeng lumabas dahil sa COVID-19.

Ibig sabihin po, magmimisa kami pero ‘yung mga tao hindi po ina-allow ng IATF na dumalo doon sa misa mismo, kaya wala pong public celebration, pero meron po kaming celebration pa rin,” ani Secillano. —sa panayam ng IZ sa Alas Sais

Pinagre-refund o pinagre-rebook ng Cebu Pacific ang mga pasahero na non-essentials matapos ikasa ng gobyerno ang panibagong paghihigpit sa gitna nang patuloy na pagsirit ng kaso ng coronavirus disease 2019 (COVID-19) sa bansa.

Ipinabatid ng Cebu Pacific na walang pagbabago ang mga flights sa susunod na tatlong araw kaya’t uubrang magpa-rebook na o magpa-refund, dalawang oras bago ang mismong flight.

Pinayuhan ng Cebu Pacific ang mga pasahero na mag-antabay sa ilalabas nilang pagbabago o adjustments sa kanilang flights mula ika-25 ng Marso hanggang ika-4 ng Abril.

Umapela ang Philippine Hospitals Association (PHA) sa mga pasyente na mayroong mild coronavirus disease 2019 (COVID-19) symptoms na magpa-confine na lamang sa maliliit na ospital kaysa malalaking ospital na nahaharap na sa overloaded capability.

Ayon kay Dr. Jaime Almora, pangulo ng PHA, hindi naman nangangailangan ng critical equipment na iniaalok ng malalaking ospital ang mga mild cases.

Sinabi ni Almora na bagamat maaaring palawigin ng mga malalaking ospital ang kanilang operasyon, hirap silang gawin ito dahil sa limitado at pagod na staff nila.

Dahil sa pagsirit ng kaso ng COVID-19 sa bansa, binigyang diin ni Almora na kailangan ang dagdag na manpower sa mga ospital, gayundin ang redistribution ng mga pasyente na ang ilan mula sa mga lalawigan ay nais ma-confine sa mga ospital sa Metro Manila.

Hindi aniya time out ang solusyon kun’di reinforcement, lalo nasa nursing services, lalo pa’t overworked na ang mga nurse.