Judith Estrada-Larino

Hindi na dapat bigyan ng puwang ang anumang reklamo o batikos sa pagtugon ng gobyerno sa coronavirus disease 2019 (COVID-19) pandemic.

Ayon ito kay Dr. Nina Gloriani, pinuno ng vaccine development expert panel ng Department of Science and Technology (DOST), sa gitna na rin nang pagsirit ng kaso ng COVID-19 sa bansa.

Binigyang diin sa DWIZ ni Gloriani na dapat magkaisa ang mga Pilipino para malabanan ang virus.

Very complicated itong pandemic na ito, itong virus na to ay hindi madali. Kailangan magtulung-tulong tayo… talaga pong mahirap. Magtulungan nalang po tayo. ‘yung pagbe-blame, hindi na po dapat. Magtulungan.” ani Gloriani.  —sa panayam ng Serbisyong Lubos sa 882

Malabong makapagpababa sa 1 ang reproduction number ng coronavirus sa loob ng dalawang linggo.

Ayon ito sa OCTA Research group bilang reaksyon sa pagpapairal ng mas pinahigpit na panuntunan sa NCR Plus bubble.

Sinabi ni Professor Guido David, miyembro ng OCTA Research group, na tumagal ng 28 araw o halos isang buwan para bumaba ang reproduction number nang makaranas ang bansa nang pagsirit ng kaso ng coronavirus disease 2019 (COVID-19) noong isang taon.

Sa ngayon aniya ay nasa 2.1 ang reproduction number sa NCR at kung nais na mapababa ang kaso ng COVID-19, kailangang mapababa rin ang reproduction number mula sa 2.1 sa 1 kaya’t imposibleng mangyari ito sa loob ng dalawang linggo.

Ang reproduction number ay biang ng mga tao na ma-iinfect ng isang COVID-19 case.

Kasabay nito, iginiit ni David ang pagtaya ng OCTA Research na maaabot na ng Metro Manila hospitals ang full capacity sa unang linggo ng Abril sa gitna na rin nang paglobo pa ng COVID-19 cases sa bansa.

Nasaan ang bakuna?

Ito, ayon kay Senador Panfilo Lacson, ang paulit-ulit niyang itatanong hanggat walang malinaw na kasagutan at hanggang walang dumarating na sapat na suplay ng bakuna kontra coronavirus disease 2019 (COVID-19).

Sa kabila na rin ito nang paliwanag ng Malacañang na nasa mga bangko pa ang pondong pambili ng bakuna matapos na utangin ito ng gobyerno.

Iginiit ni Lacson na hindi niya kokontrahin ang pahayag ng Department of Finance (DOF) na P58-bilyon lamang ang pambili ng bakuna dahil hindi naman pera ang kanyang hinahanap kundi bakuna kontra COVID-19.

Samantala, ipinabatid ni Lacson na hindi pa niyang nakukuha ang written explanation ni DOF Secretary Carlos Dominguez III hinggil sa foreign loans ng bansa dahil hindi pa sila nakakapasok sa senado na kasalukuyan pang naka-lockdown. —ulat mula kay Cely Ortega-Bueno (Patrol 19)

Lilipad mamayang gabi ang isang eroplano ng Philippine Airlines (PAL) patungong Beijing, China para kunin ang 400,000 doses ng Sinovac vaccines.

Inaasahang nasa Ninoy Aquino International Airport (NAIA) Terminal 2 na bukas ng umaga ang nasabing eroplano ng PAL na nagsabing milestone flight ito bilang unang pag-airlift ng coronavirus disease 2019 (COVID-19) vaccines pa-Maynila mula sa isang international hub.

Ika-1 ng Marso nang simulan ng bansa ang vaccination program nito kung saan priority ang medical frontliners gamit ang Sinovac vaccines na donasyon ng China.

Target ng gobyerno na matapos ang pagbabakuna sa healthcare workers sa mayo at palawigin ang programa sa ibang sektor sa susunod na buwan.

Hindi pa maituturing na variant ng coronavirus disease 2019 (COVID-19) ang P.3 variant o umano’y Philippine variant.

Nilinaw ito ni Health Undersecretary Maria Rosario Vergeire dahil wala pa silang hawak na sapat na data na magpapatunay na ang P.3 variant ay bahagi na rin ng coronavirus variants.

Isinumite na aniya nila ng kanilang pag-aaral sa ibang bansa para malaman kung anong uri ng variant ang P.3 variant.

Magugunitang ika-20 ng Marso nang i report ng DOH, kasama ang UP-Philippine Genome Center at UP-National Institute of Health, ang bagong 46 na dagdag na kaso ng B.1.1.7 variant cases, 62 new cases ng B.1.351 variant at anim na P.3 variant cases na kasama sa ika-11 batch ng specimens para sa whole genome sequencing.

Kinansela na ng Philippine Airline (PAL) ang ilang international at domestic flights nito dahil sa pagpapairal ng mas mahigpit na mga panuntunan sa ilalim ng tinaguriang NCR Plus bubble.

Sinabi ng PAL na ang hakbang ay bilang pagsunod sa direktiba ng gobyerno na limitahan ang mga dumarating na pasahero sa bansa o nasa 1,500 pasahero lamang kada araw sa lahat ng mga airline.

Kabilang sa mga kanseladong biyahe ngayong araw na ito hanggang sa Biyernes at maging sa ika-31 ng Marso ang mga sumusunod:

Pinayuhan ng PAL ang mga apektadong pasahero na uubrang i-convert hanggang ika-30 ng Hunyo ang kanilang ticket bilang travel voucher o mag-avail ng unlimited rebooking ng walang bayad hanggang ika-31 ng Disyembre o kaya naman ay humingi ng refund.

Dismayado si Caloocan Bishop at Catholic Bishops’ Conference of the Philippines (CBCP) Vice President Pablo Virgilio David sa pagbabawal ng gobyerno ng religious activities mula ika-22 ng Marso hanggang ika-4 ng Abril.

Sinabi ni David na isinara pa rin ang mga simbahan kahit mahigpit silang nagpapatupad ng protocols samantalang ang fitness centers ay pinayagan ang 70% capacity at 50% capacity naman sa personal care services tulad ng mga spa.

Hindi aniya nabigyan ng pagkakataon ang mga Pilipinong magdiwang man lang ng Easter Sunday o Araw ng Pagkabuhay. —ulat mula kay Aya Yupangco (Patrol 5)

Tanging mga barkong pangisda lamang at hindi maritime militia vessels ang napadpad sa Julia Felipe Reef ng West Philippine Sea na sakop ng Exclusive Economic Zone ng bansa.

Binigyang diin ito ng Chinese Embassy matapos igiit na sumilong lamang sa nasabing bahura ang 220 barko dahil sa masamang kondisyon ng karagatan.

Sinabi ng Chinese Embassy na dapat kalmadong tugunan ang nasabing sitwasyon at hindi makakatulong ang anumang ispekulasyon sa usapin.

Iginiit ng Chinese Embassy na bahagi ng Nansha Qundao nito ang Julian Felipe Reef kung saan ilang taon na ring may mga mamamayan silang nangingingisda.

Papayagan ang turismo sa loob ng NCR Plus sa kabila nang pinaigting na mga panuntunan ng gobyerno.

Ito, ayon kay Tourism Secretary Bernadette Romulo-Puyat, ay bagamat dapat mahigpit na sumunod sa age restrictions at health and safety protocols.

Sinabi ni Puyat na pinagbigyan naman nila ang apela ng mga doktor at expert laban sa turismo sa labas ng bubble kahit pa sa ilalim ng test before travel scheme.

Pinapayagan din aniya ang staycations sa loob ng bubble bagamat may age restrictions din o hindi uubra ang edad 18 pababa at 65 pataas.