Papayagang makapasok sa NCR plus bubble ang mga magbabiyahe pa ibang bansa.
Ayon ito kay Transportation Undersecretary Artemio Tuazon sa gitna na rin nang pinaiiral muli na enhanced community quarantine (ECQ) sa Metro Manila, Cavite, Laguna at Rizal.
Una nang inanunsyo ng DOTr ang restrictions sa public transportation sa isang linggong ECQ sa greater Manila area.
Aalamin pa ng DOJ kung uubrang ang Inter-Agency Task Force (IATF) nito ang mag-iimbestiga sa pagkamatay ng labor leader na si Dandy Miguel.
Ayon kay Justice Secretary Menardo Guevarra, i-a-assess pa nila kung ang pagkamatay ni Miguel ay may kaugnayan sa pagiging labor leader nito at kung ganito nga isasama na ito sa mga kasong iniimbestigahan ng AO 35 committee.
Magugunitang kagabi pinagbabaril hanggang mapatay sa Calamba, Laguna si Miguel na vice chairperson ng Pamantik Kilusang Mayo Uno.
Ang pagkamatay ni Miguel ay una nang iniugnay ng grupo nito sa umano’y crackdown ng gobyerno laban sa mga rebeldeng makakaliwa.
Sa ilalim ng AO 35 mechanism pangungunahan ng prosecutors ang isang team ng imbestigador mula sa iba’t-ibang ahensya ng gobyerno para imbestigahan ang isang isyu.
Sumakabilang buhay na ang alkalde ng Famy, Laguna matapos dapuan ng COVID-19.
Ayon sa Public Affairs Office ng Laguna ang 53 anyos na si Mayor Edwin Pangilinan ay isinugod sa ospital noong March 15 dahil sa hirap huminga at nagpositibo sa COVID-19 noong araw ding yun.
Ipinabatid ng kampo ni Pangilinan na kasabay nitong nasawi ang 76 na taong gulang na inang si Lucena dahil din sa hirap sa paghinga.
Mas hihigpitan pa ng Philippine National Police (PNP) ang pagbabantay sa mga border ng apat na lalawigang nakapalibot sa Metro Manila o bahagi ng NCR Plus bubble na kinabibilangan ng Bulacan, Rizal, Cavite at Laguna.
Ayon kay PNP officer-in-charge Police Lt. General Guillermo Eleazar, nagdagdag pa sila ng pulis sa lahat ng entry at exit points lalo na sa mga maliliit na access roads para mas mabantayan pa ang galaw sa loob at labas ng NCR Plus bubble.
Iginiit ni Eleazar na tanging mga Authorized Persons Outside Residence (APOR) kabilang ang mga nagde-deliver ng essential goods ang papayagang pumasok at lumabas basta’t mayroong maipakitang kaukulang ID.
Nakausap na aniya nila ang mga hepe ng pulisya sa iba’t ibang lugar para makipag-ugnayan sa local government units hanggang sa barangay level upang bumuo ng border control points.
Una nang naglagay ng quarantine control points ang Joint Task Force COVID Shield sa boundaries ng Bulacan at Nueva Ecija, gayundin ng boundaries ng Rizal at Quezon Province, Laguna, Batangas at Quezon Province at maging Cavite at Batangas.
Dalawa ang bagong milyonaryo matapos makuha ang winning numbers combination sa Ultra Lotto 6/58 draw kagabi na may jackpot prize na P60-milyong.
Ayon sa Philippine Charity Sweepstakes Office (PCSO), tig-P30-milyon ang dalawang mananaya na nakakuha sa winning numbers combination na 16, 27, 08, 05, 12 at 23.
Samantala, wala namang nanalo sa kasabay na Super Lotto 6/49 draw na nasa halos P16-milyon ang pot money.
Wala ring nakakuha ng winning numbers combination sa 6/42 lotto draw na nasa halos P52-milyon naman ang premyo.
Tinutugis na ng National Bureau of Investigation (NBI) ang online scammers na humihingi ng pera para umano sa pagpapagamot ni Luis Antonio Cardinal Tagle.
Kasunod na rin ito nang personal na pagtungo sa NBI Anti-Cyber Crime Office ng pinsan ni Tagle na si Ramon Ramos para i-report ang scammers gamit ang Facebook messenger nito.
Ayon kay Ramos, maaaring nakakuha na ang mga suspek ng malaking halaga ng pera mula sa mga naniwala sa kanilang raket.
Sinabi naman ni NBI Anti-Cybercrime Division Chief Victor Lorenzo na maaaring may na-click na link si Ramos kaya’t nakontrol ng scammers ang messenger nito.
Si Tagle ay nasa Roma ngayon matapos italaga ni Pope Francis bilang Prefect of the Congregation for Evangelization of People.
Dumating na sa bansa ang dagdag na 400,000 Sinovac vaccines mula China.
Pasado alas-7 kaninang umaga nang lumapag sa Ninoy Aquino International Airport (NAIA) ang Philippine Airlines (PAL) chartered flight na kumuha ng mga naturang bakuna.
Binigyang diin sa DWIZ ni PAL Spokesperson Cielo Villaluna na itinuturing nila itong milestone flight kung saan umalis kagabi ang kanilang team pa-Beijing.
Naghahanda na rin aniya sila sa pag-pick up naman ng 1-milyong doses ng Sinovac vaccines sa China sa ika-29 ng Marso.
Ang susunod na mission na gagawin ng PAL is the pick-up of the 1-million doses of Sinovac vaccine on March 29 mula China. Antabayan po ang mga detalye, so far, we are focusing first on the arrival,” ani Villaluna. —sa panayam ng IZ Balita Nationwide
Winelcome ng Integrated Bar of the Philippines (IBP) ang pagkondena ng Korte Suprema sa mga banta at pagpaslang sa mga abogado at hukom sa bansa.
Sinabi ng IBP na natutuwa sila dahil marami sa kanilang mga rekomendasyon ay kinilala ng high tribunal para na rin sa kaligtasan ng mga nasa hudikatura.
Binigyang diin ng IBP na patuloy ang kanilang pakikipag-ugnayan sa mga ahensya ng gobyerno at iba pang sektor gayundin sa lahat ng mga abogadong Pilipino para mapaigting ang seguridad ng mga nagtatanggol at nagsusulong ng rule of law.
Muling tiniyak ng IBP ang patuloy na proteksyon sa kanilang mga miyembro sa kabila nang pagkakapatay na halos 60 abogado, piskal at hukom at iba pang miyembro ng hudikatura simula pa noong ika-1 ng Hulyo, 2016.
Bumagsak ang tourist arrival sa Boracay matapos ikasa ang NCR Plus bubble.
Ipinabatid ni Felix Delos Santos, Jr., Malay Municipal Tourism Officer, na halos nasa 228 na lamang ang turistang dumating sa Boracay noong Lunes, ika-22 ng Marso.
Sinabi ni Delos Santos na maraming nakanselang bookings ng mga turista patungong Boracay matapos pigilan ng Civil Aeronautics Board ang lahat ng leisure flights batay sa kautusan ng Department of Transportation.
Ang mga turista mula sa National Capital Region at mga katabing lalawigan ang mga nangungunang bumibisita sa Boracay simula nang buksan ito para sa domestic tourism noong Oktubre 2020.
Tatanggapin ni Tacloban City Mayor Alfred Romualdez ang anumang ipapataw na parusa matapos siyang magpaturok ng bakuna kontra coronavirus disease 2019 (COVID-19).
Una nang binatikos si Romualdez sa tila VIP (very important person) treatment dito matapos magpaturok ng Sinovac vaccine gayung hindi naman kasama sa priority list lalo’t hindi naman siya frontliner.
Sinabi ni Romualdez na sasagutin niya ang show-cause order ng Department of the Interior and Local Government (DILG) dahil batid niyang may basehan ang pagpapabakuna nya.
Iginiit ni Romualdez na hindi naman itinago sa publiko ang kanyang pagpapabakuna dahil nais niyang ipakita sa kanyang constituents na ligtas ang bakuna at walang dapat ikatakot dito.
Nilinaw pa ni Romualdez na ang ginamit na bakuna sa kanya ay mula sa mga sobrang bakuna na inilaan sa lungsod na maaaring gamitin sa iba pang nasa priority list.