Pursigido ang Department of Foreign Affairs (DFA) ang pagkunsidera na idaan sa diplomatic channels ang paghahain ng protesta laban sa China.
Kasunod na rin ito nang paggigiit ng China na bahagi ng kanilang teritoryo ang Julian Felipe Reef sa West Philippines Sea.
Ayon kay DFA Secretary Teodoro Locsin, Jr., ilang ulit nang inaangkin ng China ang naturang bahura na malinaw namang bahagi ng Exclusive Economic Zone ng Pilipinas.
Naaktuhang naglalaro sa dagat sa Bacoor, Cavite ang mahigit 50 kabataan at kanilang mga magulang nitong Easter weekend.
Kasunod na rin ito nang isinagawang operasyon ng mga tauhan ng Bacoor City Agriculture Office-Deputy Fish Watden at Philippine Coastguard Bacoor.
Pinauwi rin naman ng mga otoridad ang 44 na menor de edad at 10 nasa tamang edad na nahuli sa iba’t ibang bahagi ng Bacoor Bay mula Biyernes Santo hanggang Linggo ng Pagkabuhay.
Ayon kay Joshua Villaluz, agricultural technologist fishery law enforcement ng Department of Agriculture, balak sana nilang magpaalala lamang sa mga residenteng huwag maligo sa baybayin dahil sa lockdown subalit napansin nila ang pagdagsa ng mga tao lalo na ang kabataan sa paliguan at marami ang hindi naka face mask.
Tinatayang mahigit isang milyong kaso ng coronavirus disease 2019 (COVID-19) ang maitatala sa bansa bago matapos ang buwang ito.
Ayon ito sa OCTA Research Group sa gitna na rin nang pagsirit ng kaso ng COVID-19 sa bansa.
Kasabay nito, ipinabatid ng OCTA Research na ang dagdag na hospital beds para sa COVID-19 cases ay nakatulong na mapababa ang hospital occupancy rate sa ilang lungsod subalit nagbabala ang grupo ng mga expert na maaari na ring mapuno o ma okupa na ang mga ito.
Nakikita anila ang 11,000 hanggang 12,000 kaso ng COVID-19 kada araw sa mga susunod na linggo.
Nagpositibo sa coronavirus disease 2019 (COVID-19) ang isang Overseas Filipino Worker (OFW) pagdating nito sa Hong Kong gayung negatibo ang COVID-19 test nito bago umalis ng Pilipinas.
Sa katunayan, nakakuha pa ang nasabing pinay OFW ng certification mula sa isang ospital sa Pilipinas na negatibo siya sa COVID-19 subalit nagpositibo ito sa isinagawang swab test nang dumating sa Hong Kong noong ika-13 ng Marso.
Mula sa airport, kaagad idiniretso ang Pinay sa ospital sakay ng ambulansya kasunod na ang lagnat nito at pagsusuka.
Matapos ang ilang araw, ang Pinay ay dinala ng kanilang employer sa isang hotel kung saan nakatapos na siya ng quarantine at sinasabing binayaran mg kanyang employer ang pananatili niya rito.
Hindi naman batid kung saan nahawa ang Pinay.
Hindi pa masabi ng Department of Health (DOH) kung mahaharang nang pinalawig pang enhanced community quarantine (ECQ) sa NCR Plus ang pagsirit ng kaso ng coronavirus disease 2019 (COVID-19) sa bansa.
Ito, ayon kay Health Undersecretary Maria Rosario Vergeire, ay dahil i-a-assess nila ang sitwasyon kada linggo.
Kasabay nito, ipinabatid ni Vergeire na tumataas ang kaso ng COVID-19 kada araw sa mga nakalipas na linggo kung saan sa Metro Manila lamang ay nasa halos pito kada araw.
Tumataas din aniya ang positivity rate na maaaring dahil sa mabilis na pagkalat ng virus at mababang testing capacity.
Inihayag ni Vergeire na naghahanap na sila ng mga kaukulang pasilidad kung saan uubrang i-admit ang mild at asymptomatic patients para ma-decongest ang mga ospital at nakikipag-ugnayan na rin sila sa local government units para mabatid kung ang pasyente ay kailangang ma-ospital, madala sa quarantine facility o ilagay sa home isolation.
Mapapasakamay na ng teaching at non-teaching personnel ng mga pampublikong paaralan ang P6,000 clothing allowance ngayong buwan.
Ito, ayon sa Department of Education (DepEd), ay matapos nilang aprubahan ang bagong set ng national uniform design na epektibo para sa School Year 2022 hanggang 2023.
Sinabi ni Education Undersecretary for Finance Anne Sevilla na sa susunod na taon pa ipatutupad ang bagong uniform para may sapat na oras pa ang mga empleyado para handa ang kanilang bagong uniporme.
Hindi naman tinukoy ng DepEd kung magkano ang nasabing uniporme na isusuot mula Lunes hanggang Huwebes, habang office attire naman kapag Biyernes.
Iginiit ni Transportation Secretary Arthur Tugade ang babala sa mga operator ng mga kolorum na sasakyan.
Kasunod na rin ito nang pagkakahuli sa anti-colorum operations sa 12 bayan at lungsod sa Bicol Region.
Binigyang diin ni Tugade na mabibigo ang laban kontra coronavirus disease 2019 (COVID-19) kung patuloy na nilalabag ang quarantine protocols kaya’t mas mabuting isantabi muna ang pansariling interes para isalba ang maraming buhay.
Kaugnay nito, naglagay na ang Bicol Inter-Agency Task Force (BIATF) ng regional border control papasok ng Bicol kung saan ibinalik ang checkpoints sa mga nasabing lugar dahil sa pagdami ng mga taong tumatawid sa border ng probinsya na gustong makaiwas sa epekto ng enhanced community quarantine.
Balewala kay Isabela Governor Rodito Albano ang pagkakabilang sa lalawigan bilang coronavirus disease 2019 (COVID-19) hotspots.
Ayon kay Albano, mas marami at malaki ang naitatalang kaso ng COVID-19 sa Metro Manila at mga kalapit probinsya na nakakapangamba dahil hindi pa rin natutukoy kung anong variants ng COVID-19 ang patuloy na lumalaganap sa bansa.
Kasabay nito, sinabi ni Albano na bagamat tumataas ang kaso ng COVID-19, dumarami rin ang nagnanais na magpabakuna.
Itinanghal na first runner up sa Miss Eco International Pageant ang pambato ng Pilipinas na si Kelley Day.
Ang beauty queen mula sa South Africa na si Gizzelle Uys ang nakakuha ng titulo sa nasabing pageant na isinagawa sa South Sinai sa Egypt.
Una nang nagwagi si Day ng titulong Best National Costume sa preliminaries ng pageant matapos suotin ang kulay pulang Maria Clara-inspired Filipiñana dress na gawa ni Louis Pangilinan.
Bukod sa 24-anyos na native mula sa Tarlac, wagi ring runners up ang mga pambato ng Venezuela, United States at Costa Rica.
Tumataas pa ang arawang kaso ng coronavirus disease 2019 (COVID-19) subalit pababa na ang trend o reproduction number.
Ayon ito kay Professor Guido David ng OCTA Research Group, matapos palawigin pa ng isang linggo ang pinaiiral na enhanced community quarantine (ECQ) sa Metro Manila at mga lalawigan ng Bulacan, Rizal, Laguna at Cavite.
Ipinabatid sa DWIZ ni David na mula 1.9 noong mga nakalipas na linggo ay naging 1.6 na lang —na nangangahulugang bumagal ang reproduction number na siyang speed o bilis ng pandemic.
‘Yung daily cases natin tumataas pa rin pero ‘yung trend natin pababa na. Ibig sabihin, ‘yung reproduction number natin bumaba na, from last week mga 1.9, ngayon 1.6 na lang,” ani David.
Nasa halos 20% na lamang aniya ang itinaas ng kaso subalit mas maganda kung zero percent lalo pa’t mayroong mga local government units na nakapagtala na nang pababang kaso ng COVID-19 tulad ng Pasay City.
Kasi may nakita tayong LGU na pababa na ‘yung cases nila kasama na ‘yung Pasay,” ani David. —sa panayam ng IZ sa Alas Sais
Trend ng COVID-19 cases sa NCR Plus ire-reevaluate pa
Ire-reevaluate pa kung pababa ang trend ng kaso ng coronavirus disease 2019 (COVID-19) ngayong linggo sa Metro Manila at mga lalawigan ng Bulacan, Rizal, Laguna at Cavite.
Dito, ayon kay Professor Guido David ng OCTA Research Group nakasalalay kung i-e-extend pa o hindi na ang pinaiiral na enhanced community quarantine (ECQ) sa NCR Plus.
Sinabi sa DWIZ ni David na bahala na nang mag-reevaluate o mag-recalibrate ang IATF na kung makikita nang pababa ang mga kaso ng COVID-19 ay puwedeng palawigin pa ang ECQ o ilagay na sa modified ECQ ang NCR Plus.
Binigyang diin pa ni Guido na hindi naman uubrang GCQ na agad-agad ang estado ng NCR Plus kahit pa makita ang downward trend sa kaso ng COVID-19. —sa panayam ng IZ sa Alas Sais