Judith Estrada-Larino

Pursigido ang Department of Foreign Affairs (DFA) na araw-arawin ang paghahain ng diplomatic protest.

Ito, ayon sa DFA, ay kapag patuloy na nagmatigas ang China na alisin ang mga barko nito sa Julian Felipe Reef sa West Philippine Sea.

Binigyang diin ng DFA na araw-araw nilang igigiit sa China na ang nasabing bahura ay bahagi ng karagatan ng Pilipinas dahil sakop ito ng Exclusive Economic Zone ng bansa.

Kasabay nito, tila sinermunan ng DFA ang mga pinatawag na opisyal ng Chinese Embassy matapos tawaging ‘unprofessional’ si Defense Secretary Delfin Lorenzana sa isyu ng pagpapaalis sa mga nasabing Chinese militia vessels.

Ipinaalala ng DFA sa mga opisyal ng Chinese Embassy na bisita lamang ang mga ito kaya’t dapat sumunod sila sa protocol na naaayon sa respeto sa mga opisyal ng bansa.

Iniimbestigahan na ng National Privacy Commission (NPC) ang halos 880,000 Facebook accounts ng mga Pilipino na umano’y nakumpromiso at kabilang sa large scale data breach na nakaapekto sa 533-milyong Facebook users.

Tiniyak ng NPC ang pagkalat ng mga iba pang impormasyon sa Philippine Data Officer ng Facebook hinggil sa mga nakumpromisong phone numbers, pangalan, lokasyon, e-mail address at biographical information ng isang Facebook user.

Kaugnay nito, pinayuhan ng NPC ang Facebook users na palaging maging maingat sa paggamit ng social media para walang manakaw na anumang mahahalagang impormasyon.

Nasa kritikal na o halos 100% nang puno ang ICU (Intensive care unit) beds ng 14 mula sa 21 ospital sa Metro Manila.

Ayon ito kay Health Undersecretary Maria Rosario Vergeire na nagsabi ring halos 80% nang okupado ang isolation beds sa mga ospital sa National Capital Region.

Muling inihayag ni Vergeire na ang moderate, severe at critical cases ay dapat ma-ospital, samantalang ang mild at asymptomatic patients ay dinadala sa isolation facilities.

Uubra naman aniya ang home quarantine subalit dapat munang kumonsulta sa doktor ang pasyente via Telemedicine.

Kasabay nito, inihayag ni Vergeire na inaasahang aakyat ang kaso ng coronavirus disease 2019 (COVID-19) dahil sa paggamit ng rapid antigen tests sa mga lugar na nakapagtala ng mataas na kaso ng virus.

Community service at hindi kulong o multa.

Ito, ayon sa Department of Justice (DOJ), ang katapat nang sinumang mahuhuling lumalabag sa quarantine.

Sinabi ni Justice Secretary Menardo Guevarra na pinayuhan na niya ang Inter-Agency Task Force on Emerging Infectious Diseases (IATF) na huwag arestuhin o ikulong ang mga violators sa halip ay ipatupad ang community service para sa quarantine violators lalo’t mahirap na ang buhay sa ECQ.

Ganito rin aniya ang rekomendasyon niya sa local government units.

Naglatag ng 10 hakbangin ang dating government adviser sa Inter-Agency Task Force on Emerging Infectious Diseases (IATF) para mapabagal ang hawahan ng coronavirus sa gitna na rin nang patuloy na pagsirit ng kaso ng coronavirus disease 2019 (COVID-19) sa bansa.

Tinaguriang “blue print for change”, kabilang sa mga panukala ni Leachon, ang noon pa’y isinusulong niyang pagpapalakas sa kapasidad sa mass testing, contact tracing at pagtatayo ng isolation at quarantine facilities.

Iginiit ni Leachon ang 100,000 COVID-19 test kada araw at pagpapalakas din ng contact tracing.

Isinulong din ni Leachon ang konstruksyon ng field o satellite clinics o paggamit sa mga empty building para makahinga ang mga ospital, pagtatayo ng command center para sa COVID-19 at non-COVID cases, mabilis na paglalatag ng vaccination program sa Metro Manila at iba pang COVID-19 hotspots

Bukod pa ito aniya sa pagpapaigting sa data management and science-based projections, pagpapalakas ng kapasidad sa telemedicine at pagbuo ng protocols para sa mild COVID-19 patients at pagkakaroon ng stockpile coronavirus treatment para sa home care at hospital patients.

Una nang tinukoy ni Leachon ang bigong response ng mga lider ng bansa ang dahilan nang lumalalang sitwasyon ng COVID-19 sa bansa.

Nagpalabas na ng global alert ang International Criminal Police Organization (INTERPOL) laban sa mga pekeng coronavirus disease 2019 (COVID-19) vaccine na ibinibenta online.

Ipinabatid ito ng National Bureau of Investigation (NBI) na nagsabing hindi pa naman nakakarating sa bansa ang mga tinukoy na pekeng bakuna kontra COVID-19.

Gayunman, siniguro ni NBI INTERPOL Head Agent Ronald Aguto na mahigpit itong naka-alerto sa mga kaganapan sa bansa kasunod na rin ng mga operasyon para masamsam ang mga pekeng COVID-19 vaccine sa China at South Africa.

Kaugnay nito, nagbabala si Aguto sa publiko na tanging mga otorisadong kinatawan lamang ng Department of Health ang makakabili at uubrang mamahagi at magturok ng lehitimong bakuna laban sa COVID-19.

Pinakilos na ng Malacañang ang liderato ng PhilHealth para kaagad bayaran ang utang nito sa mga ospital upang hindi makumpromiso ang pagtugon sa mga kaso ng coronavirus disease 2019 (COVID-19) sa bansa.

Ipinabatid ni Presidential Spokesman Harry Roque na inatasan na ni Executive Secretary Salvador Medialdea si PhilHealth President Dante Gierran para bilisan ang pagbabayad ng utang sa mga ospital lalo na ngayong panahon ng pandemya.

Binigyang diin aniya ni Medialdea na mawawalan ng kakayahan ang mga ospital na gamutin ang mga nagkakasakit ng COVID-19 kung walang pondo ng mga ito at nasa kamay ng mga ito ang 70% ng healthcare capacity.

Idinadahilan naman ni Gierran na kulang sila sa manpower kaya’t hindi kaagad napo-proseso ang claims dahil tinamaan din ng virus ang ilang tauhan ng PhilHealth at ang iba sa mga ito aniya ay namatay pa.

Una nang inihayag ng Private Hospitals Association na napipilitan silang magbawas ng manpower dahil sa kakulangan ng pondo at hindi rin pagbabayad ng PhilHealth sa kanilang claims.

Wala pang sapat na ebidensya na epektibo ang gamot na Ivermectin kontra coronavirus disease 2019 (COVID-19).

Sa katunayan, ipinabatid sa DWIZ ni Food and Drug Administration Director General Eric Domingo na tuluy-tuloy pa ang clinical trials hinggil sa Ivermectin.

Maging ang World Health Organization (WHO) mismo aniya ay nag-a-advise na huwag munang gamitin ang Ivermectin laban sa COVID-19.

So far, kahit ang WHO nagsasabi na hinay-hinay muna, ‘wag muna syang gamitin outside the clinical trial kasi nga po hindi pa sya completely proven,” ani Domingo.

Kasabay nito, kinumpirma ni Domingo ang application para sa product registration ng Ivermectin para sa tao.

Meron nang nag-apply sa amin for certificate of product registration for human use,” ani Domingo. —sa panayam ng IZ sa Alas Sais

Posibleng hindi na mapalawig pa ang isang linggong extension ng enhanced community quarantine (ECQ) sa NCR Plus.

Ipinabatid ito ni Presidential Spokesman Harry Roque dahil wala nang budget para sa dagdag ayuda sa mga maaapektuhang pamilya.

Sinabi ni Roque na ang modelong tinitingnan ng Department of Health ay dalawang linggo ng ECQ at isang linggo ng modified ECQ.

Wala nang dagdag na ayuda para sa mga mahihirap na pamilya kahit pa pinairal pa ng isang linggo ang enhanced community quarantine (ECQ) sa NCR Plus.

Ayon ito kay Presidential Spokesman Harry Roque matapos ilabas na ng gobyerno ang pondong tig-P1,000 cash o in-kind para sa mga apektado nang pinalawig na ECQ sa Metro Manila at mga lalawigan ng Bulacan, Rizal, Laguna at Cavite.

Sinabi ni Roque na tradisyunal namang ang pasok ay Lunes at Martes Santo kaya sadyang dalawang araw lang talaga ang nawalang kita sa mga mamamayan.

Inamin ni Roque na hindi magiging sapat ang P4,000 na maximum na ibibigay sa kada pamilya subalit pantawid lamang ito sa hindi makakapagtrabaho.