Judith Estrada-Larino

Nagbabala ang Department of Health (DOH) hinggil sa mas mapanganib na bagong variant ng coronavirus disease 2019 (COVID-19).

Ayon kay Dr. Edsel Salvana ng technical advisory group ng DOH, mas laganap ang D614C novel coronavirus mutation sa buong mundo kabilang ang Pilipinas.

Ang nasabing variant aniya ng COVID-19 ay mayroong tatlo hanggang siyam na beses na mas nakakahawa kumpara sa iba pang virus ng 2020.

Sinabi ni Salvana na hindi pa man napag uusapan ang ibang variant ng virus ay kumakalat na sa buong mundo kaya’t higit pang paigtingin ang quarantine restrictions.

Personal na tinawagan ng Pangulong Rodrigo Duterte ang dating Pangulong Joseph Estrada para kumustahin ito matapos magpositibo sa coronavirus disease 2019 (COVID-19).

Kapwa pinasalamatan nina dating senador Jinggoy Estrada at JV Ejercito ang Pangulong Duterte sa pag-alam sa kondisyon ng kanilang ama.

Malaking bagay anila ang ginawang pagtawag ng pangulo para lumakas at lumaban pa ang dating pangulong Erap sa sakit na COVID-19.

Pananagutin ng China ang Pilipinas kapag puwersahang pinaalis ang kanilang mga barko sa Julian Felipe Reef na bahagi ng exclusive economic zone (EEZ) ng Pilipinas.

Tiniyak ito ni Hu Xijin, editor ng Global Times Newspaper ng Chinese Communist Party, matapos ihayag na pinapalala ng Pilipinas ang isyu nang pagtambay ng Chinese vessels sa West Philippine Sea.

Muling iginiit ni Hu na ang Niu’e Jiao ay nasa nine-dash line na pinanindigan ng China na bahagi ng kanilang teritoryo.

Sinabi pa ni Hu na tila nagiging pupper na rin ng Amerika ang ilang opisyal ng gobyerno na bumabatikos sa China.

Bahagyang gumanda ang kondisyon ng dating pangulong Joseph Estrada bagamat nananatili pa ito sa Intensive care unit (ICU) at nakasailalim sa mechanical ventilation.

Ayon ito kay dating senador Jinggoy Estrada na nagsabing normal na rin ang vital signs ng ama.

Una nang inilagay sa ICU ang dating pangulo nang lumala ang pneumonia nito, ilang araw nang isugod sa ospital matapos magpositibo sa coronavirus disease 2019 (COVID-19).

Kasabay nito, ipinabatid ni Jinggoy na nagpositibo rin sa COVID-19 ang asawa niyang si Precy subalit nagnegatibo naman siya sa isinagawang swab test sa kanya.

Positibo rin aniya at posibleng nahawahan ng dating pangulo ang nakakatandang kapatid nito.

Sinabi ni Jinggoy na ayaw ng kanilang mga doktor na uminom sila ng anti-parasitic drug na Ivermectin nang tanungin niya  kung uubra silang gumamit nito partikular ang kaniyang ama.

Sinimulan na ngayong araw na ito ang libreng sakay ng Land Transportation Franchising and Regulatory Board (LTFRB) para sa mga healthcare worker at Authorized Persons Outside of Residence (APOR)  gamit ang public utility buses sa ruta ng EDSA Busway o Route E.

Ang libreng sakay ay ipinag-utos ni Transportation Secretary Arthur Tugade bilang dagdag-tulong sa healthcare workers at APOR sa gitna na rin nang pinalawig na enhanced community quarantine (ECQ) sa NCR Plus.

Ayon sa LTFRB, kailangan lamang ipakita ang I.D. sa pinapasukang ospital o kumpanya para makapag-avail sa libreng sakay na bukas 24-oras, araw-araw.

Bukod sa free ride ng mga pampasaherong bus, tuluy-tuloy din ang pagbibigay ng libreng sakay ng mga jeep sa mga APOR sa 50 ruta sa NCR at iba pang karatig rehiyon.

LIBRENG SAKAY ALERT

MGA PAMPASAHERONG BUS NA BUMIBIYAHE SA EDSA BUSWAY SA ILALIM NG SERVICE CONTRACTING PROGRAM, MAGBIBIGAY NG LIBRENG SAKAY PARA SA MGA HEALTHCARE WORKERS AT APOR SIMULA BUKAS, IKA-7 NG ABRIL 2021

Para sa buong detalye: https://t.co/1id1cqdZPX pic.twitter.com/YsWTWeYa84

— DOTrPH (@DOTrPH) April 6, 2021

Itinanggi ng hepe ng General Trias PNP sa Cavite ang report na pagsasalang sa pumping exercise ng mga curfew violator na ikinasawi ni Darren Peñaredondo na isa sa mga nahuli nila.

Sinabi sa DWIZ ni Lt. Col. Marlo Solero na kahit kailan ay hindi sila nagpapa-exercise o nagpaparusa sa mga nahuhuling lumalabag sa curfew sa General Trias maliban lamang sa pagsasagawa ng community service.

Ayon kay Solero, matapos nilang makuha ang personal information ng mga nahuling curfew violators kasunod ang pagle-lecture sa mga ito hinggil sa Inter-Agency Task Force (IATF) guidelines, hihintayin nilang matapos ang curfew hours bago i-release ang mga ito sa kani-kanilang mga barangay officials.

Hindi po namin ginagawa ‘yon. Minsan bago sila ihatid ng kanilang mga barangay officials o barangay tanod sa kanilang mga bahay, pinagko-community quarantine namin sila. ‘Yun po ‘yung paglilinis o pagpupulot ng basura dito sa vicinity ng Town Plaza namin. Ganoon lang po ang ginagawa namin sa mga IATF at curfew violators ng General Trias,” ani Solero.

Ipinabatid pa sa DWIZ ni Solero na wala silang nakikitang kakaiba kay Peñaredondo nang pauwiin na ito.

Katunayan around 8 o’clock ho, o 7 o’clock something po, sinundo po sila ng kanilang mga respective barangay mobile patrols, kasama po ‘yung mga barangay tanod na naghatid din sa kanila noong gabi, okay naman po ‘yung kondisyon nila, nakakalakad po sya, nakarating sa bahay nila. Wala naman po kaming nakitang kakaiba sa kanya noong time na sila ay sinundo. Sa katunayan po meron kaming picture dito na before sila i-return sa kani-kanilang mga barangay, may picture po sila, pini-picture-an po sila, as part ng protocol namin, para masiguro na sila ay in good physical conditiom,” ani Solero. —sa panayam ng IZ sa Alas Sais

Tanging ang mga nabakunahan lamang kontra coronavirus disease 2019 (COVID-19) ang papayagang dumalo sa taunang pilgrimage sa Saudi Arabia kaugnay sa pagsisimula ng Ramadan ng mga kapatid na Muslim.

Ipinabatid ng The Hajj at Umrah Ministry na ikukunsidera nila ang mga pasok sa tatlong kategorya bilang immunize na kinabibilangan ng mga naturukan ng dalawang dose ng bakuna, may unang dose ng bakuna, 14 araw bago ang pilgrimage at ang mga gumaling na sa COVID-19.

Ang mga nabanggit lamang anito ang bibigyan ng go signal para pumasok sa Grand Mosque sa Mecca.

Ang mga nasabing kategorya rin ang paiiralin sa mga nais pumasok sa prophet’s mosque sa Holy City ng Medina.

Bahagyang kumalma ang inflation o bilis nang pagtaas ng presyo ng mga pagkain sa nakalipas na buwan.

Ito, ayon sa Philippine Statistics Authority (PSA), ay dahil sa mas mabagal na paggalaw ng presyo ng food and non alcoholic beverages.

Ipinabatid ni PSA chief at national statistician Dennis Mapa na rumehistro sa 4.5% ang inflation sa buwan ng Marso, mas mabagal sa naitalang 4.7% noong Pebrero.

Dahil dito, nasa 4.5% ang hear-to-date inflation na lampas pa rin sa target ng gobyerno na 2% hanggang 4% inflation rate.

Pinaiimbestigahan ng Department of the Interior and Local Government (DILG) ang pagkamatay ng isang curfew violator na pinuwersang magsagawa ng 300 rounds ng pumping exercises kasama ang iba pang hinuli sa General Trias, Cavite.

Ayon kay DILG Undersecretary Jonathan Malaya, nakipag-ugnayan na sila sa Philippine National Police (PNP) at local government ng General Trias hinggil sa insidente.

Ipinag-utos na aniya nila ang imbestigasyon sa insidente para malaman kung may paglabag pa sa protocol o nagkaroon naman ng iregularidad sa panig ng mga pulis.

Tiniyak ni Malaya ang pagpapanagot sa mga pulis kapag napatunayang umabuso ito sa kanilang tungkulin.

Kakasuhan ng pamilya nang nasawing curfew violator ang mga pulis na nagpahirap dito at nagpagawa ng 300 rounds ng pumping exercise noong ika-1 ng Abril sa General Trias, Cavite.

Tiniyak ito ni Reichelyn Balce, live-in partner ng biktimang si Darren Peñaredondo, na bibili lamang sana ng tubig subalit inabutan ng curfew kaya’t hinuli.

Umabot sa 300 beses ang ginawang pumping exercise sa mga quarantine violators tulad ni Peñaredondo na nanghina ang katawan kayat itinakbo sa ospital subalit nasawi rin.

Siniguro naman ni General Trias Mayor Ony Ferrer na paiimbestigahan ang insidente.