Judith Estrada-Larino

Sapat ang 130 hotel quarantine facilities ng Overseas Workers Welfare Administration (OWWA) para sa halos 7,000 Overseas Filipino Workers (OFWs) na umuuwi sa bansa.

Ayon ito kay OWWA Administrator Hans Leo Cacdac na tiniyak ang maayos ang mga nasabing pasilidad para sa mga umuuwing OFW.

Ito aniya ay bagamat umabot sila sa critical level noong Enero at Pebrero matapos magkasabay-sabay ang pagpasok sa bansa mga OFW.

Inabot ng hatinggabi ang unang araw nang pamimigay ng ayuda sa ilang residente sa Maynila.

Partikular dito ang mga residente ng Barangay 420 sa Sampaloc kung saan tig-30 lamang ang uubrang manatili sa covered court habang pino-proseso ang kanilang ayuda.

Binigyan ng numero ang mga beneficiary at inia-anunsyo lamang sa public address system ang pupunta doon at kanya-kanyang bitbit ng papel kung saan nakasulat ang kanilang pangalan.

Sinabi ng mga residente na ayos lang sa kanila kahit ginabi na ang pamamahagi ng ayuda dahil sa bahay naman sila naghintay at hindi na rin pumila ng matagal.

Mahigit 60,000 beneficiaries sa Maynila ang target mabigyan ng ayuda ngayong araw na ito.

Winelcome ng Integrated Bar of the Philippines (IBP) ang appointment ni bagong Supreme Court Chief Justice Alexander Gesmundo.

Ayon kay Atty. Domingo Cayosa, pangulo ng IBP, makakatulong kay Gesmundo ang malawak na karanasan nito sa hudikatura bilang lider ng nasabing sangay.

Tiwala si Cayosa na makakasama nila si Gesmundo sa pagsusulong ng mabilis na hustisya sa bansa na inaasahang magiging proactive para na rin sa seguridad ng mga abogado at hukom.

Umaasa rin aniya silang makakamit ng mga nasawing abogado at huwes ang hustisya sa pangunguna ni Gesmundo sa hudikatura.

Daan-daang residente ng Barangay Batasan Hills sa Quezon City ang nagpalipas ng gabi sa Batasan High School para makakuha ng ayuda.

Inaasahang 2,000 beneficiary ang nakatakdang mabigyan ng unang batch ng ayuda.

Ayon sa mga tauhan ng Department of Social Welfare and Development (DSWD), alas-11 ng umaga kahapon nang simulan nila ang verification process ng mga tatanggap ng ayuda subalit alas-4 na ng hapon nang gumulong ang mismong pay-out dahil kinailangan pa nilang iimprenta ang lahat ng payroll ng beneficiaries.

Muling ipinaalala sa mga taga-barangay na tanging ang nasa master list lamang ng second batch ang dapat na pumila para sa ikalawang araw nang pamimigay ng ayuda.

Naka-post sa official page ng DSWD na gagawin sa Quezon City University ang pamamahagi ng ayuda sa ikalawang batch ngayong araw na ito simula alas-8 ng umaga hanggang alas-5 ng hapon.

Kasado na ang protesta ng mga Pilipino na nasa iba’t ibang estado ng Amerika bilang pagkondena sa anila’y tumitinding kaso ng hate crimes laban sa mga asyano sa nasabing bansa.

Ayon sa SOCCSKSARGEN group ng mga Pinoy-Americans sa Estados Unidos, daan-daan ang inaasahan nilang sasali sa protesta sa Sabado, ika-10 ng Abril, para ipanawagang itigil na ang mga karahasan laban sa mga Asyano sa Amerika na ang ilang pag-atake ay ikinamatay na ng mga biktima.

Sinasabing maraming Asian-Americans ang nasa state of trauma at takot na lumabas sa kanilang mga bahay dahil sa posibilidad na ma-bully rin ang mga ito.

Samantala, dahil naman sa tumataas na kaso ng hate crimes, nagkakaubusan na umano sa New York ng pepper spray na panlaban ng mga Pinoy at iba pang Asyano sa gagawa ng karahasan sa kanila.

Umalma ang unyon ng mga empleyado sa senado sa ginawang pag-red tag sa kanila ng pinuno ng National Intelligence Coordinating Agency (NICA).

Kinundena ng Sandigan ng mga Empleyadong Nagkakaisa sa Adhikain ng Demokratikong Organisasyon (SENADO) ang pahiwatig ni NICA Director General Alex Paul Monteagudo sa kanyang Facebook post hinggil sa kaugnayan ng unyon sa CPP-NPA.

Tinawag din ng senado na malisyoso, walang basehan at mapanganib ang naturang Facebook post ni Monteagudo na maging ang Courage ay iniuugnay nito sa makakaliwang grupo.

Naniniwala ang senado na ang pag-atake sa kanilang unyon ay tugon sa naging posisyon nila laban sa Department of the Interior and Local Government (DILG) memorandum sa hinggil sa pag-red tag sa mga lehitimo at progresibong organisasyon maging public sector unions.

Naantala ang biyahe ng LRT Line 2 kaninang umaga.

Ito, ayon sa LRT Authority ay dahil sa technical problem na kaagad namang sinolusyunan ng pamunuan.

Ang LRT-2 ay nag-e-extend mula Recto Station sa Maynila hanggang sa eastern part ng Metro Manila, pa-Marikina at Pasig sa Santolan.

ANNOUNCEMENT:

LRT 2 temporarily stopped its operation due to technical problem. Intervention is ongoing.

Apologies for the inconvenience. Thank you

— LRT2 (@OfficialLRTA) April 7, 2021

Kakaunti na lamang ang mga turistang nasa Boracay.

Ayon ito kay Malay Acting Mayor Floribar Bautista matapos ang suspensyon ng pagbiyahe sa area at ipatupad ang NCR Plus Bubble bukod pa sa ilang taga-Boracay na rin ang nagpositibo sa coronavirus disease 2019 (COVID-19).

Konti lang [ang mga turista], dahil before kasi naglockdown ang NCR Plus ay marami nang dumating,” ani Bautista. —sa panayam ng IZ sa Alas Sais

Nakatuwang ng swab cab program ng Office of the Vice President (OVP) ang isa sa mga anak ni Vice President Leni Robredo.

Ayon kay Malabon City Mayor Lenlen Oreta, kabilang si Dr. Tricia Robredo sa mga medical professionals na nagsagawa ng swab test sa mga residente ng lungsod kung saan inilunsad ang swab cab program ng OVP.

Sinabi ni Oreta na nagulat siya nang malamang isa si Dr. Tricia sa mga nagsagawa ng swab test sa kanyang constituents sa loob ng dalawang araw.

Nagpasalamat si Oreta kay Dr. Tricia sa inspirasyong dala ng pamilya nito para sama samang malabanan ang coronavirus disease 2019 (COVID-19).

Ipinabatid naman ni Robredo na wala siyang ideya na nag-volunteer ang kanyang anak para magsagawa ng swab testing sa mga residente ng malabon kung saan sa 80 mula sa mga tinest ay nagpositibo sa COVID-19.

Nagkasa ng sorpresang inspeksyon ang Commission on Human Rights (CHR) Region 7 sa Sawang Calero Police Station sa Cebu City matapos lumutang ang pagkakaroon umano nito ng ‘secret jail’.

Sinabi ni Leo Villarino, chief investigator ng CHR-7, na 13 pulis mula sa nasabing police station ang idinadawit sa akusasyong rape at extortion ng isang dating nakulong sa naturang secret jail.

Tiyak aniyang kakasuhan nila ang mga naturang pulis kapag nakakuha ng mga ebidensya laban sa mga ito.