Maglulunsad ang Manila water ng dalawang bagong water treatment plant bilang paghahanda sa posibleng epekto ng El Niño, kasunod ng pagbaba ng lebel ng tubig sa Angat dam.
Ayon sa Manila Water, inaasahang matatapos sa Setyembre ang ikalawang yugto ng East Bay Treatment Plant, na magdadagdag ng dalawang daang milyong litro ng tubig bawat araw para sa mga residente sa Pasig, Pateros, at Taguig.
Bukod dito, nakatakdang buksan sa Oktubre ang Kaysakat Treatment Plant, na magdadagdag naman ng 220 milyong litro ng tubig bawat araw para sa mga residente sa Antipolo at iba pang lugar sa Rizal.
Samantala, tiniyak ng Manila Water na walang magiging tuluyang pagkakaantala sa suplay ng tubig sa kanilang nasasakupang lugar, sa halip, posibleng makaranas lamang ng bahagyang paghina ng presyon ng tubig sa ilang lugar, partikular sa off-peak hours, o mula alas-10 ng gabi hanggang alas-4 ng umaga.| sa panulat ni Reabelle Medina
