Judith Estrada-Larino

Iniimbestigahan na ng Department of Health (DOH) ang tumataas na bilang ng mga kabataang nasasawi dahil sa coronavirus disease 2019 (COVID-19).

Ipinabatid ni Health Undersecretary Maria Rosario Vergeire na karamihan sa mga dinadapuan ng virus ay nasa edad 20 hanggang 49 na malaki ang tsansang mamatay.

Sinabi ni Vergeire na mas marami mula sa naturang age group ang dinadapuan ng COVID-19 ngayong taon kumpara noong nakalipas na taon.

Dahil dito, sinabi ni Vergeire na pag-uusapan nila sa Inter-Agency Task Force on Emerging Infectious Diseases (IATF) kung anong industriya ang papayagang magpatupad ng work-from-home set up.

Ilang health experts na ang nagsabing binabalewala ng mga kabataan ang minimum health protocols kayat lumulobo ang dinadapuan ng COVID-19 sa hanay ng mga ito.

Mismong si Department of Foreign Affairs (DFA) Secretary Teodoro Locsin, Jr. ang tahasang nagpapaalis na sa mga barkong pangisda ng China na nasa Julian Felipe Reef.

Kasunod na rin ito ng pahayag ng Chinese Foreign Ministry na wala silang planong manatili sa nasabing lugar.

Sinabi ni Locsin na dinudumihan lamang ng Chinese vessels ang tubig ng nasabing bahura na posibleng ubos na rin ang mga isda sakali ngang nangingisda ang mga ito sa area.

Una nang iginigiit ni Chinese Foreign Ministry Spokesperson Zhao Lijian na sakop ng kanilang teritoryo ang Julian Felipe Reef.

Itinanggi ng Capitol Medical Center ang umano’y room reservation dito ni Department of Environment and Natural Resources (DENR) Undersecretary Benny Antiporda.

Una nang nagpost si Antiporda na bagamat pwede niyang gamitin ang kanyang impluwensya at ma-confine sa nasabing ospital matapos magpositibo sa coronavirus disease 2019 (COVID-19), pinili niyang mag-isolate na lamang sa bahay at ibigay ang slot sa matandang magulang ng isang kasamahan sa media.

Sa haba ng pila ng COVID-19 patients para ma-admit, binigyang diin ng Capitol Medical Center na pinaiiral nila ang first in line, first admission policy sa kanilang triage protocols.

Tinitiyak aniya nila sa publiko ang mahigpit na commitment na mag serbisyo sa komunidad kalakip ng professionalism.

Magagamit na simula ngayong araw na ito bilang coronavirus disease 2019 (COVID-19) isolation center ang dalawang quarantine facility na pinangangasiwaan ng Philippine Ports Authority sa Manila South Harbor at Port Capinpin sa Orion, Bataan.

Ito, ayon sa Department of Transportation (DOTr), ay tugon sa kakulangan ng pasilidad para sa mga nagkasakit ng COVID-19 sa gitna na rin nang pag-apaw ng pasyente sa mga ospital sa NCR Plus area.

Ang mga naturang pasilidad ay una nang ginamit bilang tuluyan ng mga umuuwing seafarers at Overseas Filipino Workers (OFWs) na isinailalim sa 14-day quarantine.

Mayroong 211 cubicles ang Eva Macapagal Super Terminal sa Pier 15 na isang taon na mula nang i-convert bilang treatment facility.

Nasa iba’t ibang zone ang mga cubicle na may kasamang portable toilets, modular showers at iba pang pasilidad.

Uubra namang tumanggap ng hanggang 124 patients ang Port Capinpin quarantine facility na binuksan npong Oktubre 2020 para sa mga seafarer at kasama sa capacity nito sa 25 cubicle para sa high-risk individuals, hiwalay na nurses station at dalawang kuwarto na may bunk beds para sa mga medical frontliner.

Inaasahan na ang pagsugod sa Boracay ng mga taga-Metro Manila at mga kalapit na lalawigan pagkatapos nang pinaiiral na enhanced community quarantine (ECQ) rito sa Linggo, ika-11 ng Abril.

Ayon ito kay Malay acting mayor Flolibar Bautista dahil maliban sa mga sabik bumiyahe at magbakasyon, tiyak aniyang itutuloy ng ilang turista ang kanilang pinarebook na pagbisita sa isla.

Kasabay nito, ipinag-utos ni Bautista ang mas mahigpit pang pagpapatupad ng health and safety protocols sa Boracay kung saan bawal pa rin ang mass at non-essential gatherings tulad ng contact sports.

Ipinabatid ni Bautista na iniimbestigahan pa ang itinuturing na super spreader party na isinagawa sa isang bar kaya’t biglang sumirit ang kaso ng coronavirus disease 2019 (COVID-19) sa isla.

Sa nakalipas na buwan, naitala ang 97 kumpirkadong kaso ng COVID-19 sa Boracay kumpara sa buwan ng Pebrero na ang kaso ay wala pang 10.

Nasawi matapos ma-stroke ang dating chief of staff ni Senador Ramon “Bong” Revilla, Jr.

Si Atty. Richard Cambe ay nakakulong sa New Bilibid Prison noon pang 2018 kung kailan ito na convict sa pagbulsa sa P224. 5-milyong pork barrel ni Revilla.

Ayon kay Bureau of Correction (BuCor) Chief Gabriel Chaclag, naisugod pa sa ospital ng Muntinlupa si Cambe subalit binawian din ng buhay alas-6 kagabi.

Sinabi ni Chaclag na walang foul play sa pagkamatay ng dating chief of staff ni Revilla.

Humihingi naman aniya ng privacy ang pamilya ni Cambe.

Magpapalabas ng advisory ang vaccine expert panel hinggil sa posibleng pagturok ng magkaibang bakuna kontra coronavirus disease 2019 (COVID-19).

Ipinabatid ito sa DWIZ ni Dr. Nina Gloriani, head ng panel, kasunod ng mga tanong kung uubrang magpabakuna ng magkaibang brand lalo na’t nade-delay ang AstraZeneca vaccine.

O kaya naman aniya ay may posibilidad na habaan ang interval o pagitan nang unang dose sa ikalawang dose ngayong bahagyang nade-delay ang suplay ng AstraZeneca.

Titignan po natin ‘yan (magkaibang brand ng bakuna sa dalawang dose), kasi magkaiba ng platform, pero pinag-aaralan na namin,” ani Gloriani. —sa panayam ng Serbisyong Lubos sa 882

Hinimok ng pangulo ng Philippine Hospital Association (PHA) ang mga otoridad na aprubahan na ang pamamahagi ng rapid antigen test kit para sa coronavirus disease 2019 (COVID-19).

Ito, ayon kay Dr. Jaime Almora, ay dahil tuluy-tuloy na nao-overwhelm ang mga ospital kasunod na rin ng pagsirit ng kaso ng COVID-19 sa bansa.

Sinabi ni Almora na kung mabibigyan ng pagkakataon ang publiko na i-test ang kanilang mga sarili, ang mga impormasyon hinggil sa COVID-19 status nila ay maaaring magamit kung paano nila ia-isolate ang kanilang mga sarili o kaya naman ay maiwasang kumalat ang virus.

Binigyang diin ni Almora na napatunayan na rin namang epektibo at mayroong mataas na high sensitivity rate ang rapid antigen tests.

Napapamahal aniya ang COVID-19 test dahil sa manpower na nagsasagawa ng examination at ang personal protective equipment na kailangang suotin ng health workers.

Nagpositibo sa coronavirus disease 2019 (COVID-19) si dating House Speaker at Congressman Pantaleon Alvarez.

Ayon ito kay Finance Undersecretary Paola Alvarez, anak ng dating house speaker, na nagsabi ring hindi naman malala ang kondisyon ng ama at sa katunayan ay nagrerekober na ito.

Ipinabatid ni Alvarez na nasa Davao Del Norte ang kanyang ama at nagpapagaling sa kanilang bahay.

Nagpasalamat din ang batang Alvarez sa lahat ng nagdasal at nagpaabot ng malasakit sa kanyang ama. —ulat mula kay Jill Resontoc

Duda ang Senior Citizens party-list group sa go-signal ng Food and Drug Administration (FDA) para iturok na sa senior citizens ang Sinovac anti-COVID-19 vaccine.

Ayon kay party-list Representative Rodolfo Ordanes, “magkano” ang naisip niyang dahilan sa nasabing hakbangin na maaaring makasama pa sa mga senior citizen at sadyang nakapagtataka ang naging desisyon ng FDA.

Binigyang diin sa DWIZ ni Ordanes na isa lamang ang buhay ng tao kaya’t dapat na matiyak na makakabuti sa kalusugan ang anumang ituturok na bakuna kontra coronavirus disease 2019 (COVID-19).

Magugunitang una nang inirekomenda ang pagturok ng Coronavac sa mga edad 18 hanggang 59.

Kailangan pag-aralan kung ligtas ba ang Sinovac COVID-19 vaccine sa mga senior citize,” ani Ordanes.