Judith Estrada-Larino

Kasama sa rekomendasyon ng OCTA Research Group ang dalawang linggong modified enhanced community quarantine (MECQ) sa NCR Plus.

Ayon ito kay Professor Guido David, miyembro ng OCTA Research, at naniniwala silang malaki rin ang maitutulong ng MECQ na ipinatutupad simula ngayong araw na ito hanggang ika-30 ng Abril sa Metro Manila at mga kalapit lalawigan ng Bulacan, Rizal, Laguna at Cavite para bumaba sa less than 1 ang reproduction number.

Sinabi sa DWIZ ni David na nirerespeto naman nila ang desisyon ng gobyerno na pinili ang pagbalanse sa pagitan ng public health at livelihood.

Malaki na rin ang maitutulong ng MECQ sa pagbaba ng trend. Ngayon kasi nasa 1.24 ang reproduction number natin. Ang inaasahan natin with the 2 weeks MECQ, mapababa natin ‘yan sa less than 1 at mag-flatten ang curve,” ani David. —sa panayam ng IZ sa Alas Sais

Sisimulan na bukas, ika-13 ng Abril, ang holy month ng Ramadan ng mga kapatid na Muslim.

Ang pagtatakda ng Ramadan, ayon sa mga kapatid na Muslim, ay nakadepende sa Islamic Lunar Calendar na sumusunod sa galaw ng buwan at habang nasa moon sighting activity, tinitingnan ng mga otoridad ang bagong crescent moon na pagbabasehan kung kailan sisimulan ang pag-aayuno.

Kahapon, araw ng Linggo, nang magsagawa ang mga Muslim leader, kabilang ang Bangsamoro government at National Commission on Muslim Filipinos ng moon sighting activity sa maraming lugar.

Ayon sa Darul Ifta, advisory committee ng Bangsamoro, ang ipinadalang mga team mula sa Bureau of Muslim Cultural Affairs ay walang nakitang buwan, kagabi.

Sa panahon ng Ramadan ay pawang pagdarasal at pag-aayuno ang ginagawa ng mga kapatid na Muslim hanggang matapos ito na tinaguriang Eid al-Fitr na isang regular holiday.

Isinusulong ng Philippine Medical Association (PMA) ang pagkakaroon pa ng isolation facilities para sa mga mild cases ng COVID-19.

Sa katunayan ipinabatid sa DWIZ ni Dr. Benito Atienza, pangulo ng PMA na nakipag-partner sila sa DOTr para gawing isolation facilities ang mga barko na may tie up na rin sa mga ospital.

Mag-iinspeksyon na aniya sila sa mga nasabing barko sa susunod na linggo para maihanda na ang mga ito sa mga mild cases at ma decongest kahit paano ang mga ospital.

Sinabi ni Atienza na ikinakasa na ang pagkonekta ng mga barko sa PGH at Sta. Ana Hospital muna para pagmulan ng record ng mga pasyente. (PMA)

Yung mga barko ng 2Go yung ganun, magkakasya dito ang 300 to 500 na pasyente kasi ang maganda sa barko kompleto na ‘yan, may sariling toilet, may sariling bed, hiwa-hiwalay sila sa kwarto at ipo-provide ng grupo ang doktor, may magdu-duty doon then may mga nursing assistant na sila ang titingin doon sa mga mild cases. Itong mga mild cases na ito manggagaling sa mga emergency room ng mga different hospital, hindi ito yung grabe, ito yung mga bantayan lang,” ani Atienza.

Kasabay nito inihayag ni Atienza na pinag-aaralan din ang pagpapagamit ng isang hiwalay na barko para sa mga nurses, doctors at iba pang medical workers na mag-a-assist sa mga mild cases na nasa kalapit lamang ding mga barko.

May barko din na para doon sa mga health workers, para yung ginagamit doon sa mga health workers ay ma-isolate din sila from hospital ilalagay sila doon, yung mga mild case sa isang barko din,” ani Atienza.

Nag-deploy ang Chinese navy ng dalawang missile attack craft para tugisin ang isang Pinoy vessel sa West Philippine Sea kahapon.

Ito ang umano’y kauna-unahang naitalang paggamit ng Chinese military vessels laban sa mga sibilyan simula nang lumutang ang kontrobersya sa West Philippine Sea.

Ang nasabing Pinoy civilian vessel ay naglalayag sa iba’t-ibang Bahura at Shoal sa WPS malapit sa mainland ng Palawan para makita kung saan lumipat ng lugar para mangisda ang mga Pinoy fishermen matapos dagsain ng mga barko ng China ang kanilang dating fishing grounds bukod pa sa itinayong artificial islands ng China sa lugar.

Tinawag na exaggerated ni Presidential Adviser for Entrepreneurship Joey Concepcion ang suspensyon ng pagturok ng bakuna ng AstraZeneca sa mga edad 60 pababa.

Iginiit ni Concepcion na dapat maging pangunahing kunsiderasyon ang mga benepisyo ng bakuna kaysa panganib nito.

Ayon kay Concepcion, sobrang exaggerated ang pagbabawal sa Pilipinas gayung wala namang maraming bakuna rito, samantalang sa United Kingdom ay hindi muna uubrang iturok ang AstraZeneca vaccine sa mga edad 30 pababa.

Sinabi ni Concepcion na ‘very rare’ o bibihira lamang ang napapaulat na panganib ng bakuna ng AstraZeneca kung saan apat na insidente lamang ng blood clot o pamumuo ng dugo ang napaulat sa kada 1-milyong tinurukan nito.

Nananawagan si Vice President Leni Robredo sa publiko na magkaisa at magtulungan para labanan ang COVID-19 pandemic.

Sa kanyang mensahe ngayong Araw ng Kagitingan sinabi ni Robredo na katulad ng Bataan noon kung kailangan nabalot ang bansa ng kadiliman dahil sa pandemya at marami rin ang nag sakripisyo, nagdusa at nawalan.

Binigyang diin ni Robredo na paalala rin ang araw na ito na walang Pilipinong kailangang maging magiting mag isa at dapat ay magsama sama at magtulung tulong ang lahat ng mga Pilipino.

Ayon pa kay Robredo, ang kabayanihang ipinakita ng mga Pilipinong sundalo na ibinuwis ang kanilang buhay para sa bansa at kalayaan ng mga Pilipino ayun dapat magsilbing inspirasyon bilang paghahanda na mag sakripisyo rin para sa kabutihan ng nakakarami.

Namumulitika ang Food and Drug Administration (FDA) sa isyu nang paggamit ng Ivermectin sa mga pagamutan sa laban kontra coronavirus disease 2019 (COVID-19).

Ito ang tahasang inihayag ni dating Health secretary ngayo’y Congresswoman Janet Garin matapos bigyan ng permit ng FDA ang isang ospital lamang para gamitin ang Ivermectin na hindi naman maaaring mabili ng publiko over-the-counter.

Sinabi ni Garin na malinaw na political accommodation lamang ang ginawa ng FDA sa inisyung compassionate special permit sa iisang ospital lamang para gamitin ang nasabing anti parasitic drug sa paglaban sa COVID-19.