Judith Estrada-Larino

Iginiit ng Pangulong Rodrigo Duterte ang kapangyarihan ng gobyerno para i-take over ang mga hotel at motel na magagamit na pasilidad para sa coronavirus disease 2019 (COVID-19) patients.

Kasunod na rin ito ng pahayag ni Health Secretary Francisco Duque na inatasan na nila ang mga ospital para magreserba ng hotel rooms na maaaring paglagyan kaagad ng mga doktor at nurse na nag positibo sa COVID-19.

Ayon sa pangulo, uubrang i-take over ng gobyerno ang mga hotel at motel para sa mga nagpositibong doktor at nurses sakaling kulangin ang halfway houses at kaagad puntahan at sabihin lamang na gagamitin ito ng medical frontliners.

Hinimok ng Department of Health (DOH) ang publiko na hintayin ang evaluation ng mga expert hinggil sa paggamit ng anti-parasitic drug na Ivermectin kontra coronavirus disease 2019 (COVID-19).

Ayon kay Health Undersecretary Maria Rosario Vergeire, isinasapinal pa nila ang kanilang report hinggil sa Ivermectin bago ipaalam sa publiko ang resulta ng evaluation.

Sinabi ni Vergeire na hindi naman magagarantiyahan ng gobyerno ang kaligtasan at kalidad ng Ivermectin na hindi pa rehistrado sa ngayon para gamitin ng tao.

Hindi aniya dapat magkaroon ng maling sense of security ang mga tao na gumagamit ng Ivermectin dahil naiisip nilang gagaling sila o makakaiwas sila sa COVID-19.

Binigyang diin ni Vergeire na magiging masama sa kalusugan kung gagamitin o iinumin ang hindi evidence-based at wala pang napapatunayang positibonng resulta laban sa COVID-19.

Nagpalabas ang Department of Trade and Industry (DTI) ng listahan ng mga industriya na maaari nang mag-operate, limited o full capacity ngayong nasa modified enhanced community quarantine (MECQ) na ang NCR Plus.

Kabilang sa listahan, ayon kay DTI Secretary Ramon Lopez, ay 10 pang industriya kabilang ang dental at rehabilitation clinics na pinayagang mag-operate sa ilalim ng MECQ sa 50% capacity on site.

Bukod pa ito aniya sa veterinary clinics, media establishments, banks, pawnshops, money transfer services, capital markets, water supply, janitorial/sanitation services, energy sector, telecommunication companies, internet service provider, cable television provider, airline and aircraft maintenance pilots at crew employees ng aviation schools, ship captains at crew ng shipyard operations and repair.

Sinabi ni Lopez na pupuwede namang mag-operate sa full capacity sa ilalim ng MECQ ang public and private hospitals, health emergency at frontline services, medicine manufacturers, mga industriya sa ilalim ng agrikultura, logistics service providers.

Bukod pa sa manufacturing na may kaugnayan sa food at essential goods, mga kumpanyang gumagawa ng construction materials, essential retail trade groceries, hardware office supplies, bicycle at laundry shops, water refilling stations, restaurants at kiosks na limitado lamang sa take out at delivery, financial service providers, business process outsourcing at public transport.

Ipinabatid pa ni Lopez na ang mga hotel at accommodation establishments na may valid accreditation mula sa Department of Tourism ay papayagang tumanggap ng guests para sa legitimate purposes.

Sa isyu naman ng age restrictions, inihayag ni Lopez na nasa pagpapasya na ng local government units kung bababaan sa 15 anyos para sa mga papayagang makalabas ng bahay kung kinakailangan.

Walang natatanggap na report ang Food and Drug Administration (FDA) hinggil sa blood clotting o pamumuno ng dugo sa mga naturukan ng coronavirus disease 2019 (COVID-19) vaccine ng AstraZeneca.

Ayon ito kay FDA Director General Eric Domingo matapos suspindihin ng Department of Health (DOH) ang paggamit ng nasabing bakuna sa mga 59-pababa.

Sinabi ni Domingo na naghihintay na lamang sila ng rekomendasyon ng vaccine experts panel at ng World Health Organization para sa dagdag na impormasyon hinggil sa bakuna kontra COVID-19 ng AstraZeneca.

Inihayag naman ni Health Undersecretary Maria Rosario Vergeire na posibleng magkaroon ng dagdag indikasyon sa paggamit ng nasabing bakuna ng AstraZeneca.

Gumulong na simula ngayong araw na ito ang dalawang linggong joint military exercises sa pagitan ng Pilipinas at Amerika.

Kinumpirma ito ni Armed Forces of the Philippines (AFP) Chief of Staff General Cirilito Sobejana na nagsabing kakaiba ang Philippine-US Balikatan Exercises sa mga nakalipas na hakbangin dahil sa coronavirus disease 2019 (COVID-19) pandemic kung saan mayroong virtual portion at physical contact subalit minimal lamang.

Ayon kay Sobejana, kasali sa 2021 Balikatan Exercises ang 700 sundalong Amerikano at 1,000 namang mga sundalong Pilipino.

Isang simpleng seremonya lamang ang isinagawa sa Canopy ng Camp Aguinaldo at  walang imbitadong media dahil na rin sa social distancing protocol.

Iginiit ng grupo ng healthcare professionals sa gobyerno ang agaran at maayos na coronavirus disease 2019 (COVID-19) response ngayong nasa modified enhanced community quarantine (MECQ) na lamang o mas maluwag na quarantine protocols ang NCR Plus.

Sinabi ng Healthcare Professionals Alliance Against COVID-19 (HPAAC) na hanggang ngayon ay walang malinaw na plano ang pamahalaan upang maresolba ang ugat ng problema na dulot ng pandemya.

Tila anito naging diskarte na lamang ng gobyerno ang pagpapalawig sa mahigpit na lockdown subalit kulang na kulang sa mga kongkretong mga hakbangin para bumaba ang community transmission ng nasabing virus.

Dahil dito, isinusulong ng HPAAC ang pagbuo ng incident management team na mangangasiwa sa mga pagamutan sa gitna na rin nang pagdagsa ng mga pasyente sa mga ospital sa Metro Manila at mga karatig lalawigan ng Bulacan, Rizal, Laguna at Cavite.

Ipinanukula rin ng grupo sa mga mambabatas na bumuo ng hakbang para sa data sharing sa pamamagitan ng information and communications technology infrastructure dahil na rin sa inconsistencies sa digital contact tracing na nakakaapekto sa quarantine ng mga contact.

Kailangan din anitong ipatupad ng gobyerno ang “Apat, Dapat” o air circulation, ventilation, physical distancing, paggamit ng face mask at face shield at pag limita sa oras ng interaksyon o 30 minutes pababa, sa mga ahensya ng gobyerno, public transport, private workplaces, business establishments at iba pang public spaces.

Nasa 28 Chinese vessels na lamang ang nakakalat ngayon sa West Philippine Sea mula sa dating mahigit 200.

Ayon ito kay Armed Forces of the Philippines (AFP) Chief of Staff General Cirilito Sobejana kung saan anim sa mga barkong ito ng China Coast Guard ay namataan sa Pagasa Island, Ayungin Shoal at Bajo De Masinloc.

Ang 20 pang Chinese vessels, batay sa report ng Western Command (WESCOM) ay mga fishing boat at dalawang Chinese maritime militia.

Sinabi ni Sobejana na wala pang official report sa muling isinagawang maritime patrol kahapon ng C295 ng Philippine Air Force sa Julian Felipe Reef upang malaman kung mayroon pang mga barko ng China ang naka-angkla sa nasabing lugar.

Nagkaroon aniya nang malaking pagbabawas sa mga barko ng China na nakakalat sa exclusive economic zone (EEZ) ng Pilipinas lalo na’t hindi tumigil ang WESCOM kasama ang Philippine Navy at Air Force sa pagpapatroya sa West Philippine Sea, kahit pa limitado lamang ang mga barko ng AFP.

Tiniyak ni Sobejana na isusulong pa rin nila ang diplomatic ways sa pagresolba sa nasabing insidente.

Kaagad nag-adjust ng operating hours ang mga mall sa Metro Manila matapos ibaba sa modified enhanced community quarantine (MECQ) ang quarantine status sa Metro Manila at mga kalapit na lalawigan ng Bulacan, Rizal, Laguna at Cavite simula ngayong araw na ito hanggang sa ika-30 ng Abril.

Ayon sa advisory ng karamihan sa mga mall, alas-10 ng umaga hanggang alas-7 ng gabi ang operating hours nila sa buong panahong nasa MECQ ang NCR Plus.

Gayunman, nilinaw ng mga naturang mall na tanging essential stores lamang ang bukas tulad ng mga bangko, pharmacy, telecom shops, hardware stores at restaurants na mayroong al fresco dining, take out at delivery.

Muling ipinaalala ng mga mall ang mahigpit na pagpapapatupad ng pagsusuot ng face mask at face shield sa lahat ng mga papasok dito.

Unti-unti nang bumubuti ang lagay ng dating pangulong Joseph Estrada bagamat nananatili pa rin ito sa ospital.

Ayon ito kay dating senador Jinggoy Estrada, anak ng dating pangulo, na nagsabing wala nang lagnat ang ama, may improvement na rin batay sa chest x-ray nito at maganda na ang vital signs nito bukod sa inalis na rin ang mga nakalagay na tubo sa katawan nito.

Ipinabatid pa ni Jinggoy na kumanta pa ang ama ng paborito nitong awitin na ‘Always’.

Isang online mass ang isinagawa ni Father Jerry Orbos para sa dating pangulo at dinaluhan ito ng mga dati at kasalukuyang opisyal ng bansa.

Patuloy pa rin ang panawagan ng pamilya ng dating pangulo na ipagdasal ito upang tuluyan nang gumaling.