Judith Estrada-Larino

Nananatiling full capacity ang St. Luke’s Medical Center subalit nabawasan ang mga coronavirus disease 2019 (COVID-19) patient sa emergency room nito.

Ito, ayon kay Dr. Benjamin Campomanes, chief medical officer ng St. Luke’s, ay posibleng dahil sa dagdag na isolation facilities na pinagawa ng gobyerno, dagdag na COVID-19 beds sa ibang ospital, pagtaas ng tele-consult services at posibleng pagbaba ng COVID-19 cases matapos ang dalawang linggong enhanced community quarantine (ECQ) sa NCR Plus.

Sinabi ni Campomanes na kapansin-pansing nabawasan ang pila nil sa emergency ng mga mild to moderates cases.

Ang St. Luke’s aniya na mayroong 250 COVID-19 beds sa dalawang ospital nito sa Taguig at Quezon City ay tumatanggap lamang ng moderate to critical virus cases.

Inihayag ni Campomanes na wala silang inirereserbang kama para sa anumang kaso ng COVID-19 kaya’t mas mabuting tumawag muna bago magtungo sa kanilang ospital.

Kasabay nito, ipinabatid ni Campomanes na mayroon silang hiwalay na emergency room para sa non-COVID-19 patients.

Umapela ang PhilHealth sa publiko na kaagad ipaalam sa kanila ang anumang kaso ng ‘upcasing’ o uri ng health insurance abuse.

Kasunod na rin ito nang naglalabasang video posts kung saan ilang health care providers ang nakikipagtalo sa mga pasyente para ideklara ang minor respiratory symptoms tulad ng asthma bilang coronavirus disease 2019 (COVID-19) para makakuha ng mas mataas na benepisyo.

Kapag napatunayang totoo ang mga alegasyon, tiniyak ng PhilHealth na papanagutin ang sinumang sangkot sa ilegal na aktibidad.

Ayon sa PhilHealth, ang ‘upcasing’ ay tumutukoy sa anumang uri ng health insurance fraud na may katapat na P200,000 na multa sa kada bilang o suspensyon ng kontrata ng health care provider ng hanggang tatlong taon.

Nagpaliwanag ang medical adviser sa National Task Force Against COVID-19 hinggil sa tumataas na bilang ng mga namamatay na mild at asymptomatic cases.

Ipinabatid sa DWIZ ni Dr. Ted Herbosa ang tinatawag na death plan na kapag tumataas ang kaso ng coronavirus disease 2019 (COVID-19), mapapansing mababa ang death rate subalit makalipas ang dalawang linggo ay sadyang sisirit ang death toll dahil tumataas din o dumarami ang proportion ng critical at very severe cases.

Sinabi pa ni Herbosa naaakyat ang kaso ng mga nasawi matapos ang dalawang linggo dahil naa-intensive care unit (ICU) pa ilang pasyente hanggang pumapanaw na kung hindi na kayang magamot.

Tataas ‘yang deaths mo about 2 weeks later kasi maa-ICU pa sila, gagamutin sila, hahaba ang buhay nila, tapos eventually ‘yung mga talagang hindi magamot ‘yun ang namamatay, so, ito ‘yung period na ‘yon. Naalala mo March 1 tayo nagsimula ng pagbulusok ng mga kaso, pero ‘yung death rates natin hindi tumataas. So, ngayon nakikita natin medyo madami na tayong kakilala na pumapanaw kasi nga parang ang dami nung una, punong-puno ‘yung hospitals,” ani Herbosa.

Bukod pa ito, ayon kay Herbosa, sa mga pasyenteng huli nang maisugod sa ospital o ang ilan ay naghihintay pa ng resulta ng COVID-19 test na kalaunan naman ay positibo pala.

Tumataas pa ‘yung number at may ibang namamatay late na nadala sa emergency room or sa hospital at syempre suspect pa lang sila, ite-test pa sila, hiintayin pa ‘yung test, so, kung minsan ‘yung number of deaths nadadagdagan kasi nga lumalabas ‘yung result positive din pala sila sa COVID,” ani Herbosa. —sa panayam ng IZ sa Alas Sais

Umapela ang Teachers’ Dignity Coalition (TDC) sa Department of Education (DepEd) para ilabas ang datos ng coronavirus disease 2019 (COVID-19) cases sa mga guro at ilang personnel, gayundin ang assistance para sa mga empleyado ng ahensya na dinapuan ng virus.

Binigyang diin ni TDC National Chair Benjo Basas na responsibilidad ng DepEd na tiyakin ang tulong sa mga empleyado nito lalo na ang mga nangangailangan ngayong may health crisis.

Sinabi ni Basas na kahit pa hindi nakuha ang virus sa community transmission, responsibilidad pa rin silang mga guro ng DepEd na tumatayong employer nila lalo pang lantad sa infection ang mga grupo bilang frontliners sa edukasyon.

Ayon pa kay Basas, may mga natanggap silang report na maraming gurpo mula sa Region 2 ang nagpositibo sa COVID-19 na hindi pa nabibigyan ng tulong ng DepEd.

Dapat aniyang mabatid ng publiko kung ilang guro at kawani ng DepEd ang nahawahan ng COVID-19 at kung bakit sila nahawa na maaaring dahil sa physical reporting, home visitation, face to face meetings at seminars na iniutos naman ng DepEd.

Napasakamay na ng halos 1-milyong low-income Pinoys ang kanilang ayuda matapos maapektuhan ng dalawang linggong pagpapatupad ng enhanced community quarantine (ECQ) sa NCR Plus.

Ayon ito sa Department of Social Welfare and Development (DSWD) kung saan pumapalo sa mahigit P1-bilyon ang naipamigay na sa mga naapektuhan ng ECQ noong ika-29 ng Marso hanggang ika-11 ng Abril.

Ipinabatid ng Department of the Interior and Local Government (DILG) na mahigit P1.1-bilyong supplemental aid para sa ECQ areas ang ipinamahagi mula ika-7 hanggang ika-9 ng Abril.

Sinabi naman ng DSWD na tuluy-tuloy ang monitoring nila sa pay outs simula ika-7 ng Abril bilang bahagi ng technical assistance nito sa local government units (LGUs).

Patuloy anito ang pakikipag-ugnayan nila sa mga kinauukulang LGUs para matiyak na matatanggap ng halos 23-milyong low income individuals na apektado ng ECQ ang kanilang ayuda.

Naging bagyo na ang low pressure area (LPA) na binabantayan ng PAGASA sa silangang bahagi ng bansa.

Ipinabatid ng PAGASA na ang nasabing sama ng panahon ay pinakahuling namataan sa layong halos 1,700 kilometro, silangan ng Mindanao.

Taglay ng nasabing bagyo ang lakas ng hanging umaabot sa 45 kilometro kada oras at may pagbugso na 55 kilometro kada oras.

Ang naturang bagyo, ayon sa PAGASA, ay inaasahang papasok sa Philippine Area of Responsibility (PAR) sa darating na weekend o sa pagitan ng Biyernes ng gabi o Sabado ng umaga at papangalanan itong “Bising” na ikalawang bagyo sa bansa sa taong ito.

Sinasabing mababa ang tsansang posibleng tumama ng kalupaan ang naturang bagyo.

Lima pang manufacturer ng coronavirus disease 2019 (COVID-19) vaccine ang hindi pa nakakakuha ng emergency use authorization (EUA) sa Pilipinas.

Sa kanyang report kay Pangulong Rodrigo Duterte, sinabi ni Food and Drug Administration (FDA) Director General Eric Domingo na kabilang sa vaccine manufacturers na ito ang Bharat Biotech ng India, Johnson and Johnson at Sinopharm.

Ayon kay Domingo, ika-22 ng Enero nang mag-apply ng EUA ang Bharat Biotech subalit kulang pa ito ng patunay ng good manufacturing practice at posibleng matapos nila sa linggong ito ang pagbusisi sa EUA application ng Janssen ng Johnson and Johnson na isinumite nitong nakalipas na ika-31 ng Marso.

Wala pa naman aniyang naisusumiteng requirements ang Sinopharm para sa EUA application ng bakuna nito kontra COVID-19, bagamat nagpaabot na ito ng intensyong makakuha ng EUA.

Ipinabatid pa ni Domingo na wala pang application para sa COVID-19 vaccine ang Moderna at Novovax samantalang nakapagbigay na ang FDA ng EUA sa Pfizer, AstraZeneca at Sinovac.

Sasagutin na ng Department of Labor and Employment (DOLE) ang sweldo ng 14,000 contact tracers matapos kapusin umano ng pondo ang Department of the Interior and Local Government (DILG) at Metropolitan Manila Development Authority (MMDA) para bayaran ang mga ito.

Kasunod na rin ito ng alok ni Labor Secretary Silvestre Bello III sa MMDA at DILG na akuin ang tatlong buwang suweldo ng contact tracers  sa ilalim ng Tulong Panghanapbuhay sa Ating Disadvantaged/Displaced Workers (TUPAD) Program.

Sinabi sa DWIZ ni Bello na mayroon pa naman silang budget para ipantulong sa mga apektado ng coronavirus disease 2019 (COVID-19) pandemic.

Nag-alok ako kay [DILG] Usec. Florece, inalukan ko ng 7,000 benepisyaryo ng TUPAD namin na gawing contact tracer at inalukan ko rin si [MMDA] chairman Benhur ng 5,000, so, 12,000 na benepisyaryo ng TUPAD namin ang gagawin nilang contact tracer. Pero humirit po si chairman Benhur Abalos, sabi nya ‘baka may mga lugar na mas kailangan pa’, sabi ko ‘sige, pare-pareho nalang, bigyan din kita ng 7,000′, ‘yung DILG 7,000, 14,000 na ‘yan,” ani Bello. —sa panayam ng Balitang Todong Lakas

Halos 17,000 ang naapektuhan o pansamantalang nawalan ng trabaho dahil sa dalawang linggong pagpapairal ng enhanced community quarantine (ECQ) sa NCR Plus o Metro Manila, Bulacan, Rizal, Laguna at Cavite.

Ayon ito kay Labor Secretary Silvestre Bello III kung saan galing mismo sa mga kumpanya  ang bilang ng mga naapektuhan ng ECQ sa NCR Plus.

Sinabi sa DWIZ ni Bello na kung tutuusin ay hindi nawalan ng trabaho ang karamihan sa mga ito at sa halip ay nabawasan lamang ang working hours o sumailalim sa flexible working arrangements.

Kasunod na rin ito ng report na nasa 250,000 ang nawalan ng trabaho sa nakalipas na dalawang linggong paghihigpit sa NCR Plus.

Nabawasan ang working hours nila, ‘yung tinatawag na flexible working arrangement. Imbes na pumasok ng limang araw sa isang linggo, ginagawa nalang dalawa o tatlong araw na lang,” ani Bello. — sa panayam ng Balitang Todong Lakas

E-Pray.

Ito ang tawag ng isang grupo ng mga pari sa naisip nilang itayong mala-call center na linya para patatagin ang pananalig sa Diyos sa gitna ng pandemya.

Sa pamamagitan ng E-Pray, tinatawagan ang volunteer priests ng mga coronavirus disease 2019 (COVID-19) patients para sa kanilang spiritual healing.

Ayon kay Reverend Father Luciano Felloni, social communications director ng Diocese of Novaliches, ang E-Pray ay paraang gamit ang teknolohiya para maabot ng tao ang mga pari at sila sa mga COVID-19 patients dahil hindi naman pinapapasok ang mga pamilya sa wards, lalo na sa intensive care unit (ICU).

Nagbibigay aniya sila ng blessing o basbas sa mga pasyente lalo’t napansin nila na bukod sa virus ay takot ang kalaban ng mga nahawahan ng sakit.

Ipinabatid ni Felloni na tawag sa cellphone, Messenger app o video call ang serbisyong alay ng 65 volunteer priests.

Sinabi ni Felloni na maaaring kontakin ang kanilang grupo sa E-Pray, AlmuSalita at Diocese of Novaliches o kaya naman ay magtext sa 0995 041 7199 at ilagay ang pangalan ng pasyente at numero at Messenger account nito na tatawagan ng mga pari.