Judith Estrada-Larino

Malaking paglabag sa batas ng Pilipinas ang pananatili ng mga sasakyang pandagat ng China sa Julian Felipe Reef sa West Philippine Sea.

Binigyang diin ito ni dating Department of Foreign Affairs (DFA) Secretary Albert Del Rosario matapos umanong ipatawag ng ahensya si Chinese Ambassador to the Philippines Huang Hilian dahil sa presensya ng Chinese vessels sa naturang bahura na bahagi ng exclusive economic zone (EEZ) ng Pilipinas.

Ayon kay Del Rosario, suportado niya ang hakbang ng DFA na ginawa ang constitutional duty nito para protektahan ang national sovereignty, territorial integrity at national interest ng bansa.

Sinabi ni Del Rosario na ang patuloy na pagtambay ng Chinese vessels sa Julian Felipe Reef ay malinaw na paglabag sa Philippine Fisheries Code of 1998 kung saan nakasaad na ang pagpasok ng anumang banyagang fishing vessel sa karagatan ng Pilipinas ay magsisilbing prima facie presumption na nangingisda ang mga ito sa karagatan ng bansa.

Ipinag-utos ni Department of Foreign Affairs (DFA) Secretary Teodoro Locsin, Jr. ang paghahain ng isa pang diplomatic protest kaugnay sa mahigit 200 Chinese vessels na namataang nakakalat sa West Philippine Sea (WPS).

Kasunod na rin ito ng report ng media hinggil sa patuloy na pagtambay ng mga barko ng China sa WPS bagamat wala pang nakukuhang official report mula sa National Task Force on the West Philippine Sea (NTF-WPS).

Una nang iniulat ng NTF-WPS na anim na barko ng Chinese Navy, kabilang ang tatlong warships, ay namataan ng mga barko ng Pilipinas sa WPS bukod sa dalawa pang navy vessels ng People’s Liberation Army ang nasa Bajo De Masinloc na bahagi ng anito’y ginagawang militarization sa lugar.

Sa 240 Chinese militia, 136 ang nasa Burgos Reef, siyam sa Julian Felipe Reef at Chigua Reef,  anim sa Panganiban Reef, tatlo sa Zamora Reef, apat sa Pag-asa Islands, isa sa Likas Island, lima sa Kota Island at 11 sa Ayungin Shoal.

Binigyang diin ng NTF-WPS na nasa 240,000 kilo ng isa ang ilegal na makukuha ng mga nasabing Chinese fishing vessels mula sa katubigang bahagi ng Pilipinas.

Pinababawi ng Commission on Audit (COA) ang mga SUV na ibinigay sa pitong directors ng Clark Development Corporation (CDC).

Pinakilos din ng COA si CDC President Manuel Gaerlan para mapa-evacuate ang board members mula sa siyam na villa na pag-aari ng korporasyon.

Ipinag-utos din ng COA ang pagbawas sa susunod na reimbursement ng sobrang fuel expenses ng dalawang director, base na rin sa nakasaad sa Executive Order 24-2011.

Humihingi ng pulong ang Alliance of Health Workers sa Pangulong Rodrigo Duterte kaugnay sa mga problema sa coronavirus disease 2019 (COVID-19) pandemic.

Kasunod na rin ito nang pagpapadala ng sulat ng grupo na pirmado ng 24 na union leaders mula sa Philippine General Hospital (PGH), National Center for Mental Health, Research Institute for Tropical Medicine (RITM), Philippine Heart Center at iba pa.

Binigyang diin ng healthcare workers na nais nilang makuha na ang mga benepisyong dapat nilang tanggapin sa kabila nang pagsasakripisyo nila simula pa nang maideklara ang pandemya.

Umaapela rin ang grupo ng malawakang recruitment ng health workers na mayroong permanent plantilla position dahil marami sa kanila ay halos wala nang pahinga sa trabaho.

Bumaba ang kaso ng coronavirus disease 2019 (COVID-19) sa Quezon City nang ipatupad ang dalawang linggong enhanced community quarantine (ECQ) sa NRC Plus.

Ayon ito kay Quezon City Mayor Joy Belmonte matapos maging stable ang COVID-19 cases sa lungsod.

Nakakaalarma aniya ang huling bahagi ng Marso kung kailan sumirit ang kaso ng COVID-19 sa Quezon City na umabot na sa 7,500 subalit naging kapansin-pansin ang pagbaba ng kaso nang pairalin ang ECQ mula ika-29 ng Marso hanggang ika-11 ng Abril.

Sinabi ni Belmonte na nagkaroon na ng downward trend at ang dating 1,100 na daily cases ay naging 924 na lang.

Gayunman, ipinaalala ni Belmonte sa mga residente na hindi dapat maging kampante sa pagbaba ng kaso ng COVID-19 sa lungsod.

Ang Quezon City ang nakapagtala ng pinakamataas na kaso ng COVID-19 sa Metro Manila.

Tinambakan ng bagong dolomite sand ang Manila Bay kaninang umaga.

Bago magbukang-liwayway ay nagtatrabaho na ang ilang back hoe operators para magbuhos at ayusin ang bagong dolomite sand.

Magugunitang 500 tonelada ng dinurog na dolomite rocks ang inilagay ng gobyerno noong isang taon sa bahagi ng Baywalk area sa Manila Bay bago binuksan sa publiko noong Setyembre.

Una nang inihayag ng Department of Environment and Natural Resources (DENR) na malaking bagay ang P389-million project para mahimok ang publiko na huwag magkalat o magtapon dito ng basura. —ulat mula kay Aya Yupangco

Tuluy-tuloy pa ang pag-aaral ng Department of Science and Technology  (DOST) sa Virgin Coconut Oil, Tawa-tawa at Lagundi bilang gamot kontra coronavirus disease 2019 (COVID-19).

Ayon ito kay Dr. Jaime Montoya, executive director ng Philippine Council for Health Research and Development, bagamat inaasahan nilang matatapos ang mga nasabing pag-aaral sa buwan ng Hunyo.

Nakadepende aniya ang usad ng trial sa mga volunteer subjects.

Sinabi sa DWIZ ni Montoya na mas mabilis ang recruitment nila ng volunteers kasunod nang pagtaas ng kaso ng COVID-19 sa bansa.

Mabilis nga po ang pagrecruit ng mga volunteer… may mga quarantine facility po at mga ospital na kasama po sa trial na ito. Sila po ay tinatanong kung okay lang po silang sumali sa ating trial, pag po pumayag, doon po magsisimula ang pag-eexamine sa kanila, pakikipag-usap, at isasali sa trail,” ani Montoya. —sa panayam ng Serbisyong Lubos sa 882

Halos P600-milyon pa ang standby at stockpile funds ng Department of Social Welfare and Development (DSWD).

Ipinabatid ito ni DSWD Secretary Rolando Bautista kaya’t mayroon sila aniyang sapat na resources para tulungan ang local government units na naapektuhan ng coronavirus disease 2019 (COVID-19) pandemic.

Sinabi ni Bautista na P517.9-milyon ang standby fund ng DSWD Central Office at tig-P3-milyon ang standby fund para sa DSWD-NCR, Central Luzon at CALABARZON.

Inihayag ni Bautista na nasa P54.4-milyong halaga ng food packs ang handa nang maipahagi.

Isinusulong ni Senador Joel Villanueva ang pagsama sa media workers sa priority list ng gobyerno para mabakunahan kontra coronavirus disease 2019 (COVID-19).

Tinawag ni Villanueva ang media workers bilang information frontliners lalo’t kailangan sa mga panahong ito ng pandemya ang press freedom at access sa mga tunay na impormasyon kayat dapat mapasama ang media sa A4 list.

Binigyang diin ni Villanueva na matinding panganib ang hinaharap ng media workers na lumalabas at nag-iiba-iba ng lugar para makakuha ng balita at iba pang impormasyon.

Ayon kay Socio-Economic Planning Undersecretary Rosemarie Edillon, kabilang sa a4 sector ang market vendors, frontline workers sa grocery at supermarkets, mga empleyado sa manufacturing ng food, beverage, medical and pharmaceutical products, hotel workers, religious leaders, construction workers, security personnel at Overseas Filipino Workers (OFWs) na nakatakda nang umalis ng bansa sa loob ng dalawang buwan.

Nakikipagnegosasyon na ang Pilipinas para sa 20-milyon hanggang 40-milyon doses ng coronavirus disease 2019 (COVID-19) vaccine ng Pfizer BioNTech.

Ipinabatid ito ni vaccine czar Carlito Galvez, Jr. kaya’t natutuwa sila sa naging commitment ng Pfizer.

Pinasalamatan ni Galvez si Philippine Ambassador to the US Jose Manuel Babes sa tulong nito para isulong ang negosasyon sa Pfizer.

Bukod dito, sinabi ni Galvez na nag-alok din ang Amerika na ibigay ang sobrang COVID-19 vaccines nito sa mga kaalyadong bansa tulad ng Pilipinas at posibleng mangyari ito sa ika-4 ng Hulyo kung kailan inaasahang matatapos ang pagbabakuna sa Estados Unidos.