Perfect ten ang ibinigay na marka ng defense panel sa kanilang naging performance sa cross-examination sa ikatlong araw ng impeachment trial ni Vice President Sara Duterte.
Ayon kay Atty. Michael Poa, naging maayos ang isinagawang pagtatanong ni Defense Counsel Atty. Carlo Narvasa at nakamit nila ang lahat ng layuning itinakda para sa pagdinig.
Bagama’t hindi maaaring talakayin ang merito ng kaso, sinabi ni Poa na layunin lamang nilang maipakita ang lawak ng isinagawang imbestigasyon at ang mga impormasyong lumabas mismo sa testimonya ng testigo.
Tumanggi rin ang abogado na tukuyin ang pinakamahalagang puntong nais nilang patunayan sa cross-examination dahil maaari umano itong makaapekto sa pananaw ng publiko habang nagpapatuloy ang paglilitis.
Nilinaw pa ng defense panel na normal na bahagi ng cross-examination ang pagsubok sa kredibilidad ng isang testigo upang matiyak kung may sapat itong kakayahan at batayan sa pagbibigay ng kanyang testimonya.
Gayunman, iginiit ng depensa na nasa Impeachment Court pa rin ang pagpapasya kung gaano kabigat at kapanipaniwala ang mga iniharap na testimonya at ebidensiya sa kaso.—sa panulat ni Jordan Gutierrez
