Judith Estrada-Larino

Sampung (10) recruitment agency ang sinususpindi ng POEA kada araw simula pa ng pandemya.

Ayon ito kay POEA Administrator Atty. Bernard Olalia, bilang parusa sa kawalang aksyon o bigong tumugon sa notice of repatriation nila kaugnay sa mga ipinapadalang OFW sa ibang bansa na nakakaranas nang pang aabusong pisikal lalo na ang mga domestic helper.

Sinabi ni Olalia, na hanggat hindi tumutulong at ginagawa ng mga suspendidong recruitment agency ang kanilang responsibilidad ay hindi makakapag proseso at makakapag-deploy ng OFW ang mga ito.

Kabilang aniya sa mga hindi natutugunan ng mga ahensya ay contract violation, sinasaktang OFW at OFW na maraming trabaho.

Hinimok ng OCTA Research team ang gobyerno na magpatupad ng mandatory quarantine period para sa mga bumabalik na Pilipino mula sa ibayong dagat.

Kasunod na rin ito ng report ng French authorities hinggil sa iniimbestigahan nitong coronavirus disease 2019 (COVID-19) variant mula sa Western Brittany Region na mahirap ma-detect sa PCR tests bagamat sa ngayon ay hindi pa naman ito mapanganib o nakamamatay.

Sinabi ni Professor Guido David, miyembro ng OCTA research na nakakabahala ang report ng French authorities kaya’t dapat ayusin ang international travel protocols ng Pilipinas tulad nang pagkakasa ng mandatory quarantine period para sa mga returning Pinoys o tourists.

Dapat din aniyang paigtingin pa ng gobyerno ang contact tracing at palakasin pa ang COVID-19 testing.

Makapagpapalakas pa ng tensyon ng Amerika at China, kung saan maiipit ang Pilipinas, ang Balikatan Exercises sa pagitan ng mga sundalong Amerikano at Pilipino na sinimulan noong Lunes.

Binigyang diin ito ni Bayan Muna Party-list Representative Carlos Isagani Zarate kaya’t pinakamainam na gawin ng Pilipinas ay igiit ang sovereign rights nito sa West Philippine Sea ng walang kinakapitan o pag-uumpugan ng super powers.

Ayon kay Zarate, kapag tumindi pa ang tensyon sa pagitan ng Amerika at China, walang tatakbuhan ang Pilipinas na tiyak na maiipit sa sitwasyon kaya’t dapat na pahupain ang tensyon sa West Philippine Sea at i-demilitarize ang area.

Ang Pilipinas aniya ang dapat manguna para isulong ang pagpasa ng code of conduct sa mga claimant countries sa South China Sea na dapat mahigpit na ipatupad.

Ang Nayong Pilipino Property sa Parañaque City ang magsisilbing unang malaking venue ng gobyerno o vaccination site para mapabilis ang pagbabakuna kontra coronavirus disease 2019 (COVID-19).

Kasunod na rin ito, ayon kay Health Undersecretary Maria Rosario Vergeire, nang nilagdaang kasunduan nina vaccine czar Carlito Galvez, Jr. at Department of Tourism (DOT) para magamit ang Nayong Pilipino Property para sa pagbabakuna.

Bukod dito, ipinabatid ni Vergeire na nakikipag-ugnayan na ang gobyerno sa pribadong sektor para sa posibleng paggamit ng iba pang malalaking venue bilang vaccination sites.

Para maabot ang target na 4-milyong Pilipinong dapat mabakunahan kada buwan, una nang inihayag ni Galvez ang plano ng gobyerno na gamitin ang mga stadium at coliseum bilang mega vaccination sites kung saan pwede mabakunahan kada araw ang 10,000 katao.

Tila last resort na lamang para kay Education Secretary Leonor Briones ang planong gawing vaccination centers ang mga public school.

Ayon kay Briones, uubra lamang gamiting vaccination centers ang mga pampublikong paaralan kung wala na talagang ibang lugar na mahanap ang isang local government unit, bagamat mayroon aniya silang polisiya na gamitin ang mga paaralan tuwing may kalamidad subalit huling option na lamang ito.

Sinabi pa ni Briones na sakaling gamitin ang mga nasabing paaralan bilang vaccination centers, dapat itong pareho rin sa panuntunan ng mga isolation centers ng Department of Health kung saan 1,212 na eskuwelahan ang nagsisilbi ngayong quarantine facilities.

Wala pang rekomendasyon ang mga expert mula sa Department of Health (DOH) kaugnay sa posibleng paghahalo ng iba’t ibang brand ng bakuna kontra coronavirus disease 2019 (COVID-19).

Ayon ito kay Health Undersecretary Maria Rosario Vergeire dahil pinag-aaralan pa ng mga experts ang posibleng paghahalo ng bakuna bukod pa sa walang sapat na ebidensya para payagan ang naturang hakbangin.

Binigyang diin ni Vergeire ang rekomendasyon pa rin nang pagturok ng parehong brand ng bakuna para sa una at ikalawang dose.

Una nang inihayag ng vaccine experts panel (VEP) ang pag-aaral sa posibleng mixing of vaccines na anito’y very practical o realistic scenario sa gitna na rin ng kakulangan ng suplay ng bakuna sa bansa.

Lumakas pa ang bagyong may international name na Surigae habang papalapit sa Pilipinas.

Ayon sa PAGASA, ang sentro ng Bagyong Surigae ay pinakahuling namataan sa layong mahigit 1,000 kilometro sa silangan ng Mindanao.

Sinabi ng PAGASA na inaasahang papasok sa Philippine Area of Responsibility ang Bagyong Surigae bukas o sa Biyernes at papangalanan itong ‘Bising’.

Inihayag pa ng PAGASA na mababa ang tyansang tumama sa kalupaan ang bagyo at posibleng lumapit sa Eastern Visayas at Bicol Region bago lumiko o mag-recurve pabalik sa Dagat Pasipiko.

Gayunman , patuloy ang babala ng PAGASA sa mga taga-Mindanao na maghanda pa rin.

Isang bagong cabinet level office ang binuo ng Pangulong Rodrigo Duterte para pabilisin ang pagproseso at pagbabawas ng red tape sa executive branch at local government units.

Nakasaad sa Executive Order No. 129, ang pagbuo ng pangulo ng Office of the Presidential Adviser on Streamlining of Government Processes (OPASGP) na pinamumunuan ng Presidential Adviser na may rank at sahod na katulad ng isang Cabinet Secretary subalit hindi pa tinukoy ang nasabing opisyal.

Kabilang sa mga tungkulin ng bagong Presidential Adviser ang magbigay ng rekomendasyon sa pangulo at maging sa Anti-Red Tape Authority (ARTA) hinggil sa evidence-based policies, programs, measures at strategies na magiging daan para simplehan ang proseso at wakasan na ang red tape sa executive branch at mga lokal na pamahalaan.

Responsibilidad din ng opisyal ang magrekomenda sa ARTA at iba pang ahensya ng gobyerno na mag-imbestiga o tugunan ang anumang non-compliance ng sinumang opisyal ng gobyerno o empleyado.

Ang operation funds ng OPASGP ay huhugutin mula sa existing budget ng Office of the President.

Bumaba ang kaso ng African Swine Fever (ASF) sa unang quarter ng taong ito dahil sa tuluy-tuloy na pagpapatupad ng Department of Agriculture ng localized programs.

Ayon kay Agriculture Secretary William Dar, naitala na lamang sa 935 ang kaso ng ASF mula Enero hanggang Marso ng taong ito, kumpara sa 3, 060 cases na naitala sa third quarter ng 2020.

Sinabi ni Dar na malaking tulong ang modified protocols na pinaiiral ng ahensya pagdating sa managing, containing at controlling ng ASF sa bansa tulad na lamang ng pagkakaroon ng local veterinary quarantine checkpoints, disease investigation at surveillance sa tulong ng iba’t ibang grupo sa kada rehiyon at kinauukulang local government unit.

Kabilang dito aniya ang ‘Bantay ASF sa Barangay’ program na naglalayong protektahan ang ASF free small holders at commercial swine farms at pagandahin pa ang security at pro-active surveillance at sure aid program na magbibigay ng livelihood assistance sa mga hog raisers na apektado ng ASF.

Naniniwala si Dar na makakatulong din ang mga nasabing programa sa repopulation ng mga baboy sa bansa na naapektuhan ng ASF at aalamin ang financial support facilities para sa mga alternatibong livelihood projects sa ASF-affected farmers.