Judith Estrada-Larino

Pinalawig ng Land Transportation Office (LTO) ang validity ng mga lisensyang nag-expire na sa gitna nang pag-iral ng enhanced community quarantine (ECQ) at modified ECQ sa NCR Plus.

Ipinabatid ng LTO na mayroong hanggang ika-31 ng Hulyo ang mga may hawak nang nag-expire na student permit at driver’s license noong umiiral ang quarantine restrictions para magrenew ng kani-kanilang lisensya.

Samantala, extended naman ang validity ng registration hanggang ika-30 ng Hunyo para sa mga sasakyang ang plate number ay nagtatapos sa 3 at sa ika-31 ng Hulyo naman para sa mga nagtatapos sa ika-4.

Nagtakda na rin ang LTO ng lingguhang schedule para sa renewal upang maiwasan ang pagdagsa ng tao sa kanilang mga opisina at walang sisingiling multa o penalty.

Pinalaya na ang 15 crew members ng isang chemical tanker kung saan kabilang ang ilang Pilipino matapos dukutin sa Gulf of Guinea, isang buwan na ang nakakalipas.

Ayon ito mismo sa De Poli Tankers, Dutch Owner ng nasabing tanker, na nagsabing natutuwa sila dahil sabay-sabay na pinalaya nitong ika-11 ng Marso ang lahat ng 15 officers at crew members ng barko nitong Davide B.

Tiniyak ng Dutch owners na ligtas at maaari nang makauwi sa kani-kanilang mga pamilya sa Eastern Europe at Pilipinas at magsimulang makarekober sa karanasan nila ang mga seafarers.

Ang Maltese-registered chemical tanker ay naglalayag patungong Lagos sa Nigeria mula sa Riga, Latvia nang atakihin ito ng mga pirata at hinostage na ang crew nito.

Ayon sa International Maritime Bureau, mahigit 95% ng lahat ng maritime kidnappings noong isang taon ay nangyari sa Gulf of Guinea.

Pinatututukan ng OCTA Research group ang gobyerno sa pamamahagi ng limitadong suplay ng coronavirus disease 2019 (COVID-19) vaccines sa mga lugar na mayroong mataas na kaso tulad ng Metro Manila at CALABARZON.

Ayon ito kay OCTA Research Professor Ranjit Rye na nagsabing magsusumite sila sa gobyerno ngayong linggo ng sariling vaccine model kung saan maaaring gamitin ng pamahalaan ang risk-based approach.

Nangangahulugan ito aniya na unahin dapat na maturukan ang lahat ng health care workers, matatanda at mga indibidwal na mayroong comorbidities.

Sinabi pa ni Rye na dapat ding pagtuunan ng pansin ang National Capital Region (NCR) at CALABARZON para maabot ng bansa ang herd immunity at maabot ang posibilidad na bumaba ang kaso ng COVID-19.

Suportado rin ng OCTA Research ang risk-based approach para sa alokasyon ng mga bakuna subalit maaaring pairalin ng gobyerno ang pagre-allocate ng spaces dahil na rin sa kakulangan ng suplay ng bakuna at pagpilit na muling buksan ang ekonomiya ng bansa.

Inihayag ni Rye na maaaring magreklamo rito ang ibang rehiyon subalit maihahalintulad ang pandemic sa isang ahas na kung uunahing putulin ang ulo ay malaki ang tyansang magkaroon ito ng malawak na epekto sa laban kontra COVID-19.

Timbog ang isang lalaking lumabag sa curfew na nahulihan pa ng illegal drugs sa Quezon City.

Ayon sa mga opisyal ng barangay, ipinambili ng suspek na si Joven Llera ng shabu ang P1,000 ayuda na nakuha nito sa gobyerno.

Itinanggi naman ni Llera na galing sa ayuda ang ipinambili niya ng shabu.

Si llera ay nahaharap ngayon sa kasong paglabag sa comprehensive dangerous drugs act.

Inaasahan ng Philippine Red Cross (PRC) na magiging operational na sa susunod na linggo ang mga eskuwelahang ginawa nitong isolation centers sa Metro Manila.

Ito, ayon kay PRC Chairman at Chief Executive Officer, Senador Richard Gordon, ay para maiwasan na ring makahawa sa iba pang asymptomatic patient bagamat kailangan nilang tiyakin ang sanitation ng mga naturang paralan para na rin sa mga pasyente.

Kabilang sa mga nakakasa nang gamitin ng PRC bilang isolation facilities ang mga classrooms ng Ateneo De Manila University, UP Diliman, Dela Salle – College of St. Benilde at Adamson University.

Nagpasalamat naman si Gordon sa mga presidente ng higher education institutions dahil sa boluntaryong pag-alok sa kanilang pasilidad para maging coronavirus disease 2019 (COVID-19) isolation facilities.

Tanging ang mga gamot lamang na rehistrado sa Food and Drug Administration (FDA) ang maaaring ibigay ng mga doktor sa kanilang mga pasyente.

Ayon ito ni Health Undersecretary Maria Rosario Vergeire dahil may mga batas sa bansa na nagsasabing ang mga gamot lamang na FDA-registered ang uubrang ireseta ng mga doktor sa kanilang mga pasyente, sa gitna na ito ng mga report na pagbibigay ng ilang doktor ng Ivermectin sa kanilang pasyente.

Nilinaw naman ni FDA Director General Eric Domingo na ang compassionate special permit (CSP) na ibinigay nila sa isang ospital para gamitin ang Ivermectin ay hindi nangangahulugan ng product registration nito.

Batay sa probisyon ng CSP, sinabi ni Domingo na tanging ang mga ospital lamang ang puwedeng gumamit ng Ivermectin kaya’t ang mga doktor lamang sa partikular na ospital ang maaaring magbigay nito sa mga pasyente na mula rin sa parehong ospital.

Para lamang aniya sa veterinary use o panghayop ang tanging produkto ng Ivermectin sa Pilipinas na nakarehistro sa FDA.

Mas praktikal ang ginawa ng Department of Education (DepEd) para makaraos sa school year na ito dahil sa coronavirus disease 2019 (COVID-19) pandemic.

Ayon ito kay Senate Committee on Basic Education Chair Sherwin Gatchalian bagamat nakukulangan siya sa sistema ng pag-aaral sa kasalukuyang school year.

Kaya nga, sinabi sa DWIZ ni Gatchalian na isinusulong niyang bumalik na sa face-to-face learning para kumpleto ang mga matutunan ng mga estudyante na mayroong epekto sa susunod na level ng knanilang pag-aaral.

Marami talagang hirap. Kaya ako tinutulak ko yung face-to-face learning dahil ito po yung talagang magpapalalim sa pag-aaral ng bata. Kaya kung meron tayong pagkakataong bumalik sa face-to-face [classes], dapat po tayong bumalik. Pero, ang tingin ko itong darating na Mayo, sa pagtatapos po ng pag-aaral natin, marami po talagang hindi malalim, ika nga, alam nila pero hindi po malalim ang kanilang kaalaman sa iba’t ibang mga paksa. Ito po ay nakakabahala dahil ito po ay makakaapekto po naman sa kanilang mga susunod na pag-aaral,” ani Gacthalian. —sa panayam ng IZ sa Alas Sais

Sapat, subalit maraming bagay pa ang maaaring mapalakas, para maging epektibo ang paglaban kontra coronavirus disease 2019 (COVID-19).

Ito ang pananaw ni Senador Sherwin Gatchalian, sa gitna na rin nang patuloy na pagsirit ng kaso ng c COVID-19 sa bansa.

Sinabi sa DWIZ ni Gatchalian na hindi man tuluyang mapigil ang virus , uubra naman aniyang malimitahan ang pagkalat nito.

Kaya nga’t para sa kanya ay dapat palakasin ang contact tracing at hospital capacity.

Talagang mahina po ‘yung contact tracing po natin. Isang tao na ‘yung nakalipas pero tingin ko hindi nag-improve noong ang-umpisa tayo hanggang ngayon. Pangalawa ‘yung ating hospital capacity. Napakahirap pa rin, hindi natin ma-predict, hindi natin makita kung ano yung mangyayari, kaya kung sumisipa po [ang kaso ng COVID-19], lagi tayong kulang pagdating sa kapasidad ng ospital at maraming namamatay sa labas na ng ospital. So, ang ibig sabihin po dito, dapat tulut-tuloy pa rin tayong nagpapatayo ng kapasidad, kahit na ‘yung tinatawag nating field hospital, mga nasa labas po ng ospital, patuloy po tayong magpatayo,” ani Gacthalian. —sa panayam ng IZ sa Alas Sais

Sisimulan na sa Sabado, Abril 17 ang pinaikling oras ng biyahe ng LRT line 2 o alas-6 ng umaga hanggang alas-6 ng gabi.

Ito ayon sa LRTA ay para masiguro ang kaligtasan ng commuters sa gitna nang patuloy na pagsirit ng kaso ng COVID-19 sa bansa.

Balik ang regular operating hours ng LRT 2 sa Mayo 1.