Judith Estrada-Larino

Pinawalang bisa na ng Pangulong Rodrigo Duterte ang ipinatutupad na moratorium sa pagmimina.

Sa nilagdaang executive order 130 ng Pangulong Duterte nakasaad na maaari nang pumasok muli ang gobyerno sa bagong mineral agreements batay na rin sa philippine mining act of 1995 at iba pang batas.

Dahil dito uubra nang ipagpatuloy ng denr ang pag- iisyu ng exploration permits sang ayon sa umiiral na batas at mga panuntunan.

Inatasan din ng Pangulo ang DENR na bumuo ng terms and conditions sa bagong mineral agreements kug saan magagamit ng gobyerno ang kita at shares nito sa produksyon kabilang ang posibilidad na ideklara ang mga naturang lugar bilang mineral reservations para makakuha ng kaukulang royalties.

Pinakilos din ng pangulo ang DENR para repasuhin ang existing mining contracts at mga kasunduan para sa posibleng renegotiation sa terms and conditions na kapwa magiging katanggap tanggap sa gobyerno at mining contractor.

Naghihintay pa ng dagdag na data ang DOH bago tumugon sa umano’y bagong variant ng coronavirus na na-detect sa France at hindi maaaring makita COVID -19 testing.

Ayon kay Health Secretary Francisco Duque III ,wala pang naire-report ang WHO hinggil sa naturang variant at kakaunti pa lang ang hawak nilang datos para malinawan o matiyak ang nasabing report ng bagong variant.

Naka antabay din aniya sila sa Global Initiative on Sharing Avian Influenza Data (GISAID) para ma calibrate ang tamang tugon sa napaulat na bagong corona variant.

Tila manok na naputulan ng ulo.

Ganito inilarawan ni Veteran Journalist Ramon Tulfo ang pagtugon ng gobyerno sa COVID -19 pandemic.

Tahasang inihayag ng special envoy to China na hindi maganda ang pagresponde ng gobyerno sa pandemya dahil kitang kita ang kawalang direksyon.

Sa 10 bilang pinakamataas  sinabi ni Tulfo na 4 ang ibibigay niyang grado sa COVID- 19 response ng gobyerno.

Kasabay nito , naniniwala si Tulfo na dapat ipaalam ng Pangulo sa publiko kung anuman ang sakit nito dahil kung hindi malalaman ng sambayanan  ang gobyerno ay parang barko na rudderless o walang timon.

Sumipa pa sa 904,285 ang kumpirmadong kaso ng COVID 19 sa bansa matapos pumalo sa 11,429 ang mga bagong kaso ng virus.

Dahil dito ipinabatid ng DOH na naitala sa 183,527 ang total active cases kung saan 96% ang mild, 2.8% ang asymptomatic, .5%  ang severe at .4%  ang critical condition.

Samantala sumampa na sa 705, 164 ang total recoveries kasama na ang 856 na mga bagong gumaling sa virus at nadagdag naman ang 148 patients na bagong nasawi sa virus sa ngayo’y nasa 15,594 total deaths.

Binalaan ni Davao City Mayor Sara Duterte-Carpio ang publiko laban sa mga gumagamit sa kanyang pirma sa mga dokumento para makapagbenta ng ari-arian.

Hinimok ni Carpio ang publiko na kaagad i-report sa mga otoridad kapag mayroong lumapit sa kanila na ginagamit ang kanyang pangalan.

Ang tinutukoy ng presidential daughter ay ang dokumentong mayroon umanong lagda niya bilang notary public sa isang property sa Taguig City na nabenta na.

Sinabi ni Mayor Sara na hindi na siya nagpapractice ng law at hindi siya notary public o nag-apply para maging mag-notario.

Dapat aniyang maging alerto ang taumbayan sa pakikipagtransaksyon lalo na kung may kinalaman sa pera sa mga gumagamit ng kanyang pangalan.

Tatlumpung (30) vials ng coronavirus disease 2019 (COVID-19) vaccine ang nadamay sa sunog sa Provincial Health Office ng Misamis Oriental.

Ipinabatid ito ni Department of Health (DOH) Region 10 Director Dr. Jose Llacuna bagamat hindi naman makakaapekto ang mga nasunog na bakuna sa vaccination program ng lalawigan.

Ayon kay Llacuna, gagawin nila ang lahat para mapalitan ang mga nasabing bakuna.

Kasabay nito, sinabi ni Llacuna na walang nasugatan o nasawi sa nasabing sunog sa kanilang Provincial Health Office.

Ang Pangulong Rodrigo Duterte at hindi ang sinumang miyembro ng gabinete nito ang dapat magsalita sa isyu nang nagaganap na tensyon sa West Philippine Sea (WPS).

Ayon ito kay dating Supreme Court Associate Justice Antonio Carpio ay dahil ang China ay nakikinig lamang sa pinakamataas na lider ng bansa.

Sinabi ni Carpio na minamaliit pa rin ng Malacañang ang presensya ng Chinese vessels sa WPS, sa kabila nang matitinding pahayag nina Department of Foreign Affairs (DFA) Secretary Teodoro Locsin, Jr. at Defense Secretary Delfin Lorenzana sa naturang usapin.

Isa aniya napakahalagang isyu ang presensya ng Chinese vessels sa WPS lalo pa’t nakasalalay dito ang soberanya ng Pilipinas kaya’t dapat nang magsalita ng Pangulong Duterte at panindigang pag-aari ng Pilipinas ang lugar.

Gayunman, inihayag ni Carpio na hindi naman garantiya ang pagsasalita ng pangulo sa WPS issue na aalis ang mga barko ng China, subalit mararamdaman aniya ng Asian powerhouse ang init dahil mawawalan sila ng isang kaibigan.

Sisimulan na sa Sabado, ika-17 ng Abril, ang pinaikling oras ng biyahe ng LRT Line 2 o alas-6 ng umaga hanggang alas-6 ng gabi.

Ito, Ayon Kay LRTA Spokesperson Atty. Hernando Cabrera, ay para masiguro ang kaligtasan ng commuters sa gitna nang patuloy na pagsirit ng kaso ng coronavirus disease 2019 (COVID-19) sa bansa, matapos halos 300 empleyado ng kumpanya ang nagpositibo sa COVID-19.

Sinabi sa DWIZ ni Cabrera na isang shift ng kanilang workforce ang apektado kaya’t pagkakasyahin na lamang nila ang dalawang shifts sa kanilang pinaikling operasyon.

Balik aniya ang regular operating hours ng LRT-2 sa ika-2 ng Mayo.

This coming Saturday babaguhin natin ang ating schedule… ang dahilan dito is that nagkaroon tayo ng mass testing sa ating lahat ng mga personnel, mga empleyado ng LRTA, mga personnel ng maintenance, security personnel kasama, janitorial kasama,” ani Cabrera. —sa panayam ng IZ sa Alas Sais

Naipamahagi na ng gobyerno ang halos 93% ng 3-milyong coronavirus disease 2019 (COVID-19) vaccine sa iba’t ibang bahagi ng bansa.

Ipinabatid ng National Task Force (NTF) na naipamahagi na hanggang nitong ika-13 ng Abril ay nasa 2,801,020 doses ng COVID-19 vaccine

Sinabi ng NTF na sa loob lamang ng isang linggo ay naipamahagi na sa lahat ng rehiyon ang halos 900,000 dose ng bakuna na patunay anito ng kahandaan ng Pilipinas sa vaccination program.

Samantala, aabot naman sa 1, 093, 651 individuals ang nabakunahan na ng kanilang first dose at nasa 162,065 naman ang  naka kumpleto na ng doses; pawang kabilang sa A1 hanggang A3 category kung saan kabilang ang healthcare workers, senior citizens at persons with comorbidities.