Judith Estrada-Larino

Muling magkakasa ng taas presyo ang mga kumpanya ng langis sa kanilang mga produkto ngayong Martes.

Ang dagdag presyo ayon sa sources ay ika-limang sunod na linggo nang dinagdagan ang presyo ng oil products matapos humina ang piso kontra sa dolyar habang umaakyat ang demand o pangangailangan ng langis sa Amerika, Europa at China.

Ipinabatid ng Shell, Cleanfuel, Petrogazz, Seaoil at PTT Philippines na epektibo mamayang alas sais ng umaga ang pisong dagdag sa presyo ng kada litro ng kanilang gasolina habang 65 centavos naman sa kada litro ng diesel maliban lamang sa caltex na una nang nag adjust ng presyo kaninang alas dose uno ng hatinggabi sa pareho ring presyo.

Pitumpong sentimo naman ang dagdag sa presyo ng kada litro ng kerosene ng Shell, Caltex at Seaoil.

Alas kuwatro uno naman mamayang hapon ang dagdag presyo ng cleanfuel.

Binalaan ng PHIVOLCS ang mga residenteng nakatira malapit sa Taal caldera matapos maitala ang Volcanic Smog.

Ang Taal caldera ay lawang nakapaligid sa bulkang taan at sinasabing bahagi ng orihinal na anyo ng naturang bulkan.

Sakop ng Taal caldera ang mga bayan ng Talisay, Laurel, Agoncillo, Sta Teresita, San Nicolas, Alitagtag, Cuenca, Balete at Mataas na Kahoy.

Ayon sa PHIVOLCS, umabot ng hanggang halos 5,000 tonelada kada araw ang ibinugang sulfur dioxide ng bulkan kahapon samantalang nasa 30°C ang atmospheric temperature ng bulkan at 75% ang humidity ng hangin.

Binalewala ni Vice President Leni Robredo ang akusasyon ni Davao City Mayor Sarah Duterte na pamumulitika sa 2022 elections ang dahilan ng pagpuna nito sa mataas na kaso ng COVID-19 sa Davao City.

Ito ay matapos ipabatid ni Robredo na dadalhin ng Office of the Vice President (OVP) ang covid vaccine express program sa Visayas at Mindanao bilang tugon sa tumataas na kaso ng COVID-19 sa rehiyon.

Ang hakbang ni Robredo ay kasunod na rin ng apela ni Congressman Rufus Rodriguez na palawigin ni Robredo ang drive thru vaccination program nito sa Visayas at Mindanao kung saan sumisirit ang kaso ng COVID-19.

Una nang nagpasalamat si Rodriguez sa isang twitter post dahil sa mabilis na pag aksyon ni Robredo.

Nabatid na sa unang araw ng vaccine express initiative ni Robredo ay mahigit 2,000 tricycle, pedicab drivers at delivery riders ang nabigyan ng bakuna bukod pa sa P500 na fuel incentive at nakatakdang isunod ang mga vendor.

Magugunitang nagparinigan sina Robredo at Mayor Duterte nang umalma ang Presidential daughter sa payo ng Pangalawang Pangulo na pag aralan ng Davao City ang COVID-19 approach ng Cebu City.

Asahan na ang pagbuhos ng COVID -19 vaccines na gawa ng Pfizer at Moderna sa mga susunod na araw.

Tiniyak ito sa DWIZ ni Philippine Ambassador to the US Jose Manuel Babes Romualdez matapos dumating kagabi ang 250K doses ng Moderna vaccines.

Ayon kay Romualdez,  sa susunod na linggo ay mapapasakamay din ng bansa ang 100K doses ng Moderna vaccines na ikalawang batch at sa kalagitnaan naman ng Hulyo ang panibagong supply ng Pfizer vaccines ang makukuha ng bansa.

Papalo aniya sa lima hanggang walong milyong doses ng Pfizer vaccines ang mapapasakamay ng bansa simula sa buwan ng Agosto.

Tutol ang bayan sa panukala ng Pangulong Rodrigo Duterte na armasan ng mga sibilyan bilang force multiplier para sa mga sundalo at pulis.

Ayon kay Renato Reyes, Secretary General ng bayan  mapanganib ang nasabing hakbangin at maraming pang-aabuso na ng paramilitary groups ang naitala.

Tinukoy ni Reyes ang pagpatay sa paring si Tullio Favali ng grupong tadtad noong panahon ng rehimeng Marcos at Ampatuan massacre nuong panahon ng dating Pangulong Gloria Arroyo.

Sinabi ni Reyes na sadyang nakakapangamba ang naturang panukala lalo nat walang training at hindi matitiyak ang disiplina ng civilian organizations kayat hindi malayong mauwi ito sa pang-aabuso.

Magmi mistula aniyang wild wild west ang Pilipinas kapag pinayagan ang pag-aarmas ng civilian organizations na magdudulot ng kaliwat kanang pagpatay at gagamitin ng PNP at AFP sa black propaganda operations nito na hindi nila kayang panindigan dahil sa pagiging iligal.

Kontra si Vice President Leni Robredo sa panukala ng Pangulong Rodrigo Duterte na pag-a armas sa civilian organizations bilang tulong sa mga pulis.

Ayon kay Robredo delikado at malaki ang tsansang maabuso ang nasabing hakbangin tulad nang nangyari nuong mga nakalipas na panahon.

Sinabi ni Robredo na maraming paraan naman para maresolba ang isang problema na hindi idinadaan sa pagdadala ng mga armas.

Napasakamay muli ng bansa ang panibagong batch ng Sinovac vaccines mula sa China.

Bandang 7:30 kaninang umaga nang dumating ang isang milyong doses ng Sinovac vaccines sa NAIA terminal 2 sakay ng Cebu pacific flight mula sa Beijing.

Ang panibagong batch ng Sinovac vaccines ay sinalubong nina Health Secretary Francisco Duque III, Vaccine Czar Carlito Galvez, Testing Czar Vince Dizon at Valenzuela Mayor Rex Gatchalian.

Pasado alas-11 kagabi nang dumating sa bansa ang kauna-unahang supply ng halos 250K COVID-19 vaccines mula sa moderna.

Mahigpit na tinututukan ni Senador Panfilo Lacson ang panukala ng Pangulong Rodrigo Duterte na armasan ang ilang civilian organization partikular ang tinaguriang anti-crime volunteers.

Iginiit ni Lacson na ang nasabing hakbang ay magpapataas lamang ng krimen lalo nat kung walang ramang training at hindi maayos ang pag-iisip nang paghahawakin ng armas.

Binigyang diin ni Lacson na mas epektibong solusyon sa patuloy na paglaganap ng krimen ang mas mahigpit na gun control measure o kaya ay kanselahin ang permits to carry firearms outside residences.

Nuong panahon aniya niya bilang PNP Chief ay nilimitahan niya ang pag i-isyu ng permits to carry firearms outside residences at tanging nakakakuha nito ay mga pumapasa sa mga alintuntunin na kinabibilangan ng gun safety seminars, practical at neuro psychiatric tests at pinakamahalaga ay ang personal appearance ng mga aplikante.— ulat mula kay Cely-Ortega-Bueno (Patrol 19)