Gilbert Perdez

Naghananap ng mga dayuhang english teachers at teaching assistants ang Taiwan.

Ito’y matapos ilunsad ng Ministry of Education (MOE) ng Taiwan ang Taiwan Foreign English Teacher Program (TFETP) bilang bahagi ng pagpapalawak ng kanilang recruitment program.

Layon nitong makalikha ng mas marami pang oportunidad sa trabaho sa mga primary at secondary schools habang target din nito na gawing secondary language ang english sa kanilang bansa simula sa taong 2030.

Tinatayang 450 teaching positions ang bubuksan sa mga pampublikong paaralan sa mga dayuhang guro ng ingles na magandang oportunidad din para sa mga pinoy.

Sa ilalim ng programa, nasa P115K ang magiging buwanang suweldo para sa mga english teachers sa taiwan.

Tinatayang 1.8M indibidwal na nasa hanay ng targeted population ang nabakunahan sa ika-apat na bugso ng national vaccination drive ng pamahalaan.

Ayon kay Dr. Krezia Lorraine Rosario ng National Vaccination Operations Center (NVOC), mahigit 255K na mga bata at nasa 90K senior citizens na ang naturukan ng bakuna kontra COVID-19 sa “bayanihan, bakunahan” na umarangkada noong Marso 10 at natapos noong Marso 18.

Sinabi ni Rosario na mahalaga na gawing mas convenient at accessible ang bakunahan lalo na sa mga matatanda at maging ang pagkakaroon ng house-to-house vaccination at social preparations.

Aminado rin si rosario na marami pa ring pinoy ang takot at may agam-agam o pag-aalinlangan sa pagpapabakuna kontra COVID-19.

Patay ang tatlong rebelde matapos maka-bakbakan ang mga tropa ng pamahalaan sa bayan ng Claveria sa Misamis Oriental.

Kinilala ang mga nasawi na sina Agay Taquin alyas Kerby, Andrew Odiongan alyas Dave, at Joan Pajardo alyas Amirgo.

Ayon kay Lt. Col. Ricky Canatoy, commanding officer ng 58th Infantry Battalion o 58IB ng Phil. Army, ang tatlong gerilya ay mga miyembro ng Communist Party of the Philippines-New People’s Army (CPP-NPA).

Sinabi ni Canatoy na nagsasagawa ng military operations ang mga sundalo sa Barangay Plaridel nang matunton ng mga ito ang kuta ng mga rebelde at doon na naganap ang sagupaan.

Natagpuan naman sa pinangyarihan ng insidente ang isang KG9 automatic rifle, isang M16 rifle, isang Carbine rifle, limang makeshift tents, at iba pang kagamitan at dokumento ng mga rebelde.

Samantala, sinabi ni Canatoy na wala namang nalagas sa panig ng militar.