Gilbert Perdez

Hindi puwede ang pamumulitika sa graduation ceremony and recognition.

Ito ay matapos payagan ang pagsasagawa ng in-preson graduation march at ceremony sa mga lugar na nasa Alert Level 1 at 2.

Ayon kay Department of Education (DepEd) Assistant Secretary for Curriculum and Instruction Alma Torio, nakasaad kasi sa DepEd Order No. 48 series of 2018, dapat ligtas ang End-of-School-Year (EOSY) rites mula sa Electioneering at Partisan Political Activity.

Paliwanag nito, itinuturing kasi bilang solemn at dignified ang nasabing seremonya kaya hindi ito dapat gamitin para pag-usapan ang pulitika.

Aniya, dapat ang isasagawang seremonya ay nakatuon sa temang itinakda ngayong taon na “K to 12 Graduates: Pursuing Dreams and Fostering Resilience in the Face of Adversity”.

Samantala, mananatiling virtual ceremony ang graduation rites ng mga eskwelahan na nasa ilalim ng Alert level 3, 4 at 5.

Timbog ang dalawang wanted persons sa magkahiwalay na operasyon ng mga elemento ng SPD o Southern Police District sa Las Piñas at Parañaque.

Sa King Fisher St., Gatchalian Subd., Manuyo Dos, Las Piñas, huli si Dianna Joy Imperial na may kasong paglabag sa Batas Pambansa Bilang 22 o bouncing checks law kung saan aabot sa P6,000 ang itinakdang piyansa ng korte laban sa akusado.

Sa Saigon St., Brgy. Don Bosco, Parañaque, nadakip din ng mga kagawad ng Las Piñas Police ang isang Marlyn Pedrigal na may kasong estafa.

Aabot naman sa 30,000 pesos ang inirekomendang piyansa laban sa akusado.

Kusang-loob na sumuko sa awtoridad ang isang lalaki na sangkot sa kasong frustrated murder sa Muntinlupa City.

Ang suspek na si Benjamin Aliabo, 50 taong gulang, at truck driver ay sumurender sa mga pulis sa Alabang.

Nabatid na si Aliabo ang sinasabing bumaril sa biktimang si Ricky Celis sa Barangay Poblacion kamakailan bago nagtago.

Nakakulong na ngayon si Aliabo at nakatakdang sampahan ng kaukulang reklamo.

Dalawang lalaki ang natimbog matapos mahulihan ng umano’y ipinagbabawal na droga sa Kalayaan St., Brgy. Ususan, Taguig City.

Batay sa ulat ng Taguig PNP, nakilala ang mga suspek na sina Archie Andres at Cedrick Barquilla, kapwa residente ng Taytay, Rizal.

Nagpapatrolya sa lugar ang mga pulis nang mahuli ang dalawa dahil sa umano’y pag-iingat ng iligal na droga na tinatayang nagkakahalaga ng mahigit P3,000.

Mahaharap ang dalawang suspek sa reklamong paglabag sa Comprehensive Dangerous Drugs Act.

NAKARANAS ng pag-ulan na may kasamang mga butil ng yelo ang ilang bayan ng Abra.

Ayon sa Office of Civil Defense o OCD-Cordillera, ang hailstorm ay nangyari nitong Linggo ng umaga.

Sa isang post ng ahensya, makikita sa larawan ang sinasabing mga yelo mula sa ulan na mas malaki pa sa butil ng mais.

Karaniwan umanong nararanasan ang pag-ulan ng yelo o hailstorm kapag may thunderstorm.