DINAGSA ng mga deboto ang Quiapo Church sa Maynila kasabay ng muling pagbubukas ng simbahan.
Maliban sa pisikal na misa, pinapayagan na rin ang pagdarasal at pagluhod ng mga deboto sa altar na maaari lamang gawin kapag walang misa o iba pang aktibidad.
Matatandaang dalawang linggong isinara sa publiko ang Quiapo Church matapos sumirit ang COVID-19 cases sa buong bansa.
Hindi na oobligahing magpakita ng vaccination card ang mga mananakay sa mga pampublikong transportasyon sa Metro Manila.
Ayon kay Transportation Assistant Secretary Goddes Hope Libiran, aalisin na kasi ang “no vaccination, no ride” policy ng Department of Transportation (DOTr) matapos isailalim sa Alert Level 2 ang National Capital Region (NCR) simula Pebrero 1 hanggang 15.
Matatandaang umani ng kaliwa’t-kanang kritisismo mula sa iba’t ibang sektor ang polisiya ng DOTr dahil isa umano itong uri ng diskriminasyon.
May alok na libreng scholarship ang France para sa mga Pilipino na gustong mag-aral sa kanilang bansa.
Ayon sa French Embassy, tumatanggap na ito ng mga aplikasyon para sa PhilFrance Scholarship Program at PhilFrance-DOST Scholarship Program para sa Academic Year 2022-2023.
Nabatid na gagawaran ng scholarship ang mga kwalipikadong kandidato na gustong kumuha ng master’s degree sa anumang private at public education institution sa France.
Nagpaalala sa mga employers ang Department of Labor and Employment (DOLE) ukol sa holiday pay sa susunod na buwan.
Sa isang labor advisory, hinimok ni Labor Secretary Silvestre Bello III ang pribadong sektor na mahigpit na sumunod sa tamang pay rules para sa Chinese New Year (Pebrero 1) at maging sa anibersaryo ng EDSA Revolution (Pebrero 25) na pawang special non-working holidays.
Ayon kay Bello, ang patakaran sa nasabing holidays para sa ginampanang trabaho ay dapat bayaran ang empleyado ng karagdagang 30% ng kanyang arawang sahod para sa unang walong oras.
Ang mga papasok naman sa holiday kahit dayoff ay dapat bayaran ng dagdag na 50% ng arawang sahod ng empleyado.
Hindi nakaporma sa Boston Celtics ang New Orleans Pelicans matapos itong gibain sa score na 107-97.
Si Jayson Tatum ang nanguna sa Celtics matapos makapagtala ng 38 points habang nagdagdag naman si Jaylen Brown ng 31 points.
Sa isa pang laro, pinadapa naman ng Dallas Mavericks ang Indiana Pacers sa score na 132-105.
Ipinagbabawal ng Philippine Institute of Volcanology and Seismology (PHIVOLCS) ang paglapit at pagpapalipad ng eroplano malapit sa Bulkang Taal.
Ginawa ng PHIVOLCS ang babala matapos magkaron ng tatlong mahihinang phreatomagmatic bursts na umabot ng tinatayang limang metro ang taas kagabi.
Ayon sa ahensya, posible pa ring magkaroon ng phreatic explosions mula sa bunganga ng bulkan.
Mas pinaigting pa ng Zamboanga City Health Office (CHO) ang anti-dengue drive sa lungsod.
Ayon kay assistant city health officer Dr. Cathy Garcia, tuloy-tuloy ang search & destroy strategy sa Barangay Putik na isa sa mga nakapagtala ng maraming kaso ng dengue sa siyudad.
Sa kasalukuyan, pumalo na sa 123 dengue fever cases ang naitala sa Zamboanga ngayong taon kung saan dalawa sa mga biktima ang nasawi.
Inanunsiyo ng Police Regional Office-CARAGA (PRO-13) ang pagkakaaresto sa isa pang dating lider ng New People’s Army (NPA) matapos ang mahigit tatlong taong pagtatago sa batas.
Ayon kay CARAGA Police Director Brig. Gen. Romeo Caramat Jr., nadakip ng pulisya si Reynaldo Gaan sa Barangay Mahaba, Agusan del Norte.
Sinasabing inaresto si Gaan sa bisa ng warrant of arrest na ipinalabas ng Butuan City Regional Trial Court (RTC) para sa kanilang attempted murder.
Sangkot umano si Gaan sa pananambang sa siyam na miyembro ng Citizens Armed Forces Geographical Unit (CAFGU) habang nagsasagawa ang mga ito ng combat patrol sa Agusan del Norte noong Nov. 29, 2018.
Makakatanggap ng kaukulang tulong ang tatlong dating rebelde at pitong militante sa ilalim ng Enhanced Comprehensive Local Integration Program (E-CLIP) at iba pang livelihood assistance programs mula sa pamahalaan.
Pinuri naman ni Cagayan de Oro City Police Office acting director Col. Aaron Mandia ang desisyon ng mga dating miyembro ng New People’s Army (NPA) at “Milisya ng Bayan”.
Isinuko rin ng mga dating rebelde ang isang M16 Rifle, apat na magasin, at anim na bala.
Ayon kay Mandia, magagamit ng mga surrenderees ang matatanggapo nilang tulong sa kanilang pagbabagong buhay.
Iniimbestigahan ngayon ng Department of Justice (DOJ) ang isang TikTok user matapos umanong mag-post ng komento kung saan binantaan nitong itutumba si presidential aspirant Ferdinand “Bongbong” Marcos Jr.
Ayon kay Atty. Charito Zamora, officer in charge ng DOJ Cybercrime Division, maituturing itong “serious threat” kaya’t nanawagan ito sa
TikTok Law Enforcement Outreach na imbestigahan ang usapin.
Maliban dito, sinabi ni Zamora na pinasisiyasat na rin nila sa NBI-Cyber Crime Division at PNP-ACG o Anti-Crime Group ang nasabing insidente.
Sa kabila ng natanggap nitong pagbabanta, inihayag naman ng tagapagsalita ni Marcos na si Atty. Vic Rodriguez na magpapatuloy ang mga campaign activities ng dating senador.