Gilbert Perdez

NAKATANGGAP ang Pilipinas ng 48.7 million pesos na halaga ng cold chain equipment at iba pang assistance mula sa Australia sa pamamagitan ng United Nations Children’s Fund o Unicef Philippines.

Ayon kay Health Secretary Francisco Duque III, matagal nang kaibigan ng bansa ang Australian government na naghahatid ng ayuda mula pa noong unang bahagi ng COVID-19 pandemic.

Kabilang sa mga natanggap na donasyon ng Pilipinas ay tatlumpung solar-powered vaccine refrigerators, walong walk-in cold rooms na may generators, mahigit isang daang spare parts, at dalawampung sets ng personal protective equipment.

HANDA ang Philippine National Police o PNP na magpatupad ng “warrantless arrests” laban sa sinumang mapatutunayang nagbabanta sa buhay ng mga mamamahayag sa panahon ng eleksyon.

Ginawa ni PNP Spokesperson Col. Roderick Augustus Alba ang pahayag matapos italaga ng Department of the Interior and Local Government o DILG ang pulisya bilang “media security focal persons” o “media security vanguards.”

Pero sinabi ni Alba na iba-validate muna ang sumbong at kapag nakakuha ito ng sapat na basehan ay agad nila itong aaksyunan.

Samantala, isiniwalat ni Presidential Task Force on Media Security Executive Director Joel Egco na may tatlong report sila na mino-monitor at ito ang tinututukan nila ngayon.

NAGPASALAMAT sa mga sundalo ang isang 23-anyos na dating rebelde matapos siyang iligtas ng mga ito kasunod ng naganap na engkwentro sa Golden Valley Mabini, Davao de Oro.

Ayon kay Daniel Moses Dellosa, dating kalihim ng Guerilla Front 2 Sub-Regional Committee ng Southern Mindanao Regional Command ng New People’s Army, hindi siya itinuring na kaaway ng militar kundi binigyan pa siya ng first aid at dinala sa ospital.

Nabatid na matapos masugatan ay inabandona si Dellosa ng iba pang mga miyembro ng komunistang grupo.

Batay sa report ng 10th Infantry Division ng Philippine Army, si Dellosa ay lumahok sa CPP-NPA noong labingwalong taong gulang pa lamang ito at nasa ikatlong taon ng kanyang kursong BS Applied Physics student sa University of the Philippines-Diliman.

Si Dellosa ay sinasabing miyembro rin ng League of Filipino Students noong panahong iyon.