Pinalawig ng Land Transportation Franchising and Regulatory Board (LTFRB) ang “Libreng Sakay” program sa Baguio City.
Sa isang advisory, inanunsiyo ng Cordillera Administrative Region (CAR) na ang service contracting program ng rehiyon ay nasa third phase na at extended ito hanggang July 15.
Sakop ng extension ang mga public utility vehicles na nag-o-operate sa ilalim ng Gross Service Contracting (GSC) at Net Service Contracting (NSC).
Naging matagumpay ang unang bahagi ng pagsasanay ng Philippine Marine Corps at United States Marine Corps na bahagi ng PH-US Marine Aviation Support Activity 2022 o MASA 22.
Ayon kay BGen. Raul Jesus L. Caldez, Deputy Commandant at MASA 22 Exercise Director, ang unang bahagi ng training ay isinagawa sa Laoag City, Ilocos Norte at Puerto Princesa City, Palawan mula Hunyo 6 hanggang 16.
Nabatid na layon ng pagsasanay na mapahusay ang kapabilidad ng Marine Corps, kasama ang Philippine Navy at Air Force assets.
PATAY ang dalawang miyembro ng isang armadong grupo matapos umanong manlaban sa mga awtoridad nang silbihan ng warrant of arrest sa Barangay Bugasan Sur sa Matanog, Maguindanao province.
Kinilala ni Marine Battalion Landing Team-5 commander Maj. Melchor Gonzaludo ang mga napatay na suspek na sina Norodin Guimad at Puti Sumanday.
Sisilbihan sana ng warrant of arrest si Guimad dahil sa mga kasong murder at frustrated murder na kinakaharap nito.
Ngunit sa halip na sumuko ay nagpaputok umano si Guimad kaya’t napilitang gumanti ang mga awtoridad na nagresulta sa pagkamatay ng dalawa.
Narekober sa pinangyarihan ng engkwentro ang isang M-16 Armalite rifle, isang caliber .45 pistol, bandolier, ammunition, drug paraphernalia, at iba pang ebidensya.
Idineklara ng Malacañang bilang special non-working day ang Hunyo 20 kasabay ng pagdiriwang ng 75th founding anniversary ng Dagupan City.
Ito’y batay sa Proclamation No. 1398 na nilagdaan ni Executive Secretary Salvador Medialdea
Magkakaroon naman ng wreath-laying activity sa Eugenio Perez Shrine bilang pagkilala sa yumaong speaker ng House of Representatives na susundan ng isang commemorative program.
Naging chartered city ang Dagupan dahil sa Republic Act 170 na isinulat ni Perez at naging ganap na batas nang lagdaan ito ni dating Pangulong Manuel Roxas noong June 20, 1947.
Nakasungkit ng gintong medalya si Caloy Yulo sa 9th Artistic Gymnastics Asian Championships na ginanap sa Doha, Qatar.
Ang Southeast Asian Games champion ay humakot ng 14.9333 points sa men’s floor exercise.
Dahil dito, natalo ni Yulo ang mga pambato ng China, Korea at Japan.
Si Yulo ang kauna-unahang Pilipino na nakakuha ng ginto sa Asian Championships.
Tinatayang 20 milyong pisong halaga ng shabu ang narekober ng mga tauhan ng PNP Drug Enforcement Group (PDEG) sa isang joint buy bust operation kasama ang local police at Philippine Drug Enforcement Agency, sa Chinese Cemetery, Brgy. Careta, Cebu City Cebu.
Ayon kay PNP Officer in Charge Police Lt. General Vicente Danao Jr., sa nasabing operasyon, nasawi sa pakikipaglaban sa awtoridad si Mark Ronald Matig habang nakatakas naman ang kasamahan nito na si June Tuñacao.
Narekober mula sa mga suspek ang tatlong ng hinihinalang shabu at isang KG-9 machine pistol.
Suportado ng Armed Forces of the Philippines ang incoming Department of National Defense Officer-in-Charge na si dating AFP Chief Jose Faustino Jr.
Ginawa ni AFP Spokesperson Col. Ramon Zagala ang pahayag matapos italaga ni President-Elect Bongbong Marcos si Faustino bilang kapalit ni outgoing Defense Secretary Delfin Lorenzana.
Ayon kay Zagala, ang 38 taong pagseserbisyo sa militar ni Faustino na humantong sa kanyang pagiging AFP Chief ay nagbigay sa kanya ng “first-hand knowledge” sa sitwasyong panseguridad at pandepensa ng bansa.
Manunungkulan si Faustino bilang Senior Undersecretary ng DND at OIC ng kagawaran simula Nobyembre 13, pagkalipas ng isang taong appointment ban ng mga retiradong opisyal ng militar.
Pinadapa ng South Korea ang Gilas Pilipinas sa kanilang tune-up game sa score na 96-92 sa KB Kookmin Bank Invitational.
Nadikitan ng mga Pinoy ang mga kalaban sa fourth quarter, 87-82, sa tulong ng layup ni SJ Belangel at 3-point play ni Dwight Ramos.
Ngunit nanaig pa rin sa dulo ng laro ang mga South Koreans.
Muling maghaharap ang dalawang koponan sa isa pang tune-up match bilang bahagi ng kanilang paghahanda sa third window ng FIBA World Cup 2023 Asian Qualifiers.
Dinampot ng mga awtoridad ang isang 92 taong gulang na dating pari dahil sa pangmomolestiya ng isang menor de edad na naganap limang dekada na ang nakalilipas sa isang residential school sa Manitoba, Canada.
Ayon sa Manitoba Royal Canadian Mounted Police o RCMP, inaresto nila si retired Father Arthur Masse bunsod ng kinakaharap nitong indecent assault charges.
Batay sa rekord, naganap umano ang sex assault sa pagitan ng 1968 at 1970 sa Fort Alexander Residential School kung saan isang sampung taong gulang na batang babae ang biktima.
Tinatayang 150,000 children ang sapilitang pinag-aral ng Canada sa mga residential schools noong 1800s at 1990s.
Sa loob ng mga panahong iyon, bukod sa inilayo sa kanilang mga magulang ay nakaranas din umano ang mga bata ng psychological, physical at sexual abuses.
19 na drug suspects habang 17 milyong pisong halaga ng hinihinalang shabu ang nasabat sa limang araw na operasyon ng mga pulis sa Bangsamoro Autonomous Region in Muslim Mindanao (BARMM).
Ayon kay BARMM police director Brigadier Gen. Arthur Cabalona, mahigit 2,200 grams ng ipinagbabawal na droga ang nakumpiska sa mga probinsya ng Maguindanao, Lanao del Sur, Basilan, Sulu at Tawi-Tawi.
Maliban dito, may mga nabasabat din na sampung assorted loose firearms sa mga nasabing operasyon.