Nakatakdang sumabak si dating PBA big man Greg Slaughter sa Japan B.League.
Ayon kay Slaughter, lumagda na siya ng kontrata sa Rizing Zephyr Fukuoka sa B.League na tatagal ng dalawang season.
Matatandaang nagpahinga si Slaughter sa PBA matapos mapaso ang kontrata sa NorthPort Batang Pier.
Isiniwalat ng isang opisyal ng Technical Education and Skills Development Authority o TESDA na plano nilang bumuo ng isang cybersecurity training program kung saan maaaring maging katuwang nila ang ibang bansa.
Ayon kay TESDA officer in charge Rosanna Urdaneta, tututukan nila ang 5th Industrial Revolution na karamihan ay pumapatungkol o umiikot sa internet at computer software.
Gayunman, nilinaw ni Urdaneta na ang cybersecurity ay ‘multidisciplinary’ dahil kailangan ding pag-aralan ng mga estudyante ang phishing attacks at iba pa.
Sa kasalukuyan, iniaalok din ng TESDA ang ilang ICT-related courses tulad ng Broadband Installation, Cable TV Installation, Cable TV Operation & Maintenance, Game Programming, Telecom OSP & Subscriber Line Installation, Telecom OSP Installation o Fiber Optic Cable, Visual Graphic Design at Web Development.
Nadakip ng mga operatiba ng Southern Police District o SPD ang isang miyembro ng Abu Sayyaf Group na wanted sa kasong kidnapping sa ikinasang operasyon sa Ninoy Aquino International Airport o NAIA Terminal 3 sa Pasay City.
Kinilala ni SPD director Brig. Gen. Jimili Macaraeg ang suspek na si Hajar Binadbul Mubina na gumagamit ng mga alyas na “Abu Asrie”, “Mheiradz”, “Muadz”, at “Muhadz”.
Nabatid na umalis sa grupo si Mubina noong 2015 at nagtago sa Malaysia gamit ang pekeng ID card o permanent residence card.
Pansamantalang nakakulong si Mubina sa District Special Operation Unit ng SPD para sa proper disposition habang hinihintay ang commitment order mula sa korte sa Zamboanga.
Isinusulong ni Davao City Representative Paolo Duterte ang isang panukalang batas na layong magkaroon ng kahit isang e-learning center sa bawat lungsod o bayan sa bansa.
Ito’y upang mapaigting ang availability at accessibility ng online learning ngayong panahon ng pandemya.
Batay sa House Bill 453, binanggit na matindi ang epekto ng COVID-19 pandemic sa educational system ng bansa kaya’t mahalagang maiangat ang kalidad ng sistemang pang-edukasyon at maging ang kagalingan ng mga estudyante at guro sa pamamagitan ng mas accessible na ‘alternative modes of learning’.
Giit ni Duterte, maraming kabataan ang nawalan na ng ganang mag-aral o tumigil na sa pag-aaral dulot ng kaliwa’t kanang hamon na kinakaharap nila sa gitna ng krisis.
Muling inihain ni Sen. Ronald dela Rosa ang kanyang panukalang batas na layong patawan ng parusang bitay ang mga big-time drug traffickers at plunderers habang tatlo pang senador ang maghahain naman ng hiwalay na bersiyon.
Ayon kay dela Rosa, nilimitahan niya sa mga high-level drug traffickers ang itinulak niyang bill upang hindi ito ikonsidera bilang anti-poor.
Matatandaan na 11 death penalty bills ang inihain ng siyam na senador noong 18th Congress ngunit kahit isa sa mga ito walang natalakay ang Committee on Justice and Human Rights ni dating Sen. Richard Gordon.
Sa kabilang banda, isiniwalat naman ni presumptive Senate President Juan Miguel Zubiri na hindi prayoridad ng Marcos administration ang parusang kamatayan.
Itinalaga ng Department of Transportation o DOTr si Sonia Malaluan bilang officer-in-charge administrator ng Maritime Industry Authority o MARINA.
Ayon sa DOTr, natanggap na rin ni Malaluan ang kanyang appointment paper na may petsang July 1.
Si Malaluan ay 32 taon na sa MARINA at dati na itong nanungkulan sa ahensya bilang OIC-Deputy Administrator for Planning, direktor ng MARINA Regional Office-National Capital Region, at Maritime Attache sa London.
Mananatiling OIC ng MARINA si Malaluan hanggang July 31 o habang wala pang naitatalagang bagong opisyal.
Inihayag ni Deputy National Security Adviser Rommel Banlaoi na target nilang tapusin ang communist insurgency bago matapos ang anim na taong termino ni Pangulong Ferdinand “Bongbong” Marcos Jr.
Ayon sa respetadong political scientist at security expert, gagawin nila ito sa pamamagitan ng whole-of-nation approach kung saan magiging katuwang nila ang National Task Force to End Local Communist Armed Conflict o NTF-ELCAC.
Mahalaga aniyang maipagpatuloy rin ang kampanya upang makamit ang progreso at pag-unlad sa lahat ng lugar sa bansa.
Bukod dito, sinabi ni Banlaoi na agad ding maibabalik ang basic services kapag nabura na ang impluwensiya ng mga komunista sa mga barangay.
Dagdag pa ng opisyal, nasa dalawang libo na lamang ang bilang ng mga rebelde sa bansa kaya’t umaasa silang magbabalik-loob sa pamahalaan ang mga ito sa mapayapang pamamaraan.
Nilagdaan ni dating Pangulong Rodrigo Duterte ang batas na lilikha sa Iloilo City Hospital o ICH bago ito bumaba sa puwesto bilang Punong Ehekutibo.
Nakasaad sa Republic Act 11891 na dapat maglaan ng 500 million pesos bilang capital outlay para sa ospital na isasama sa budget ng Department of Health o DOH sa susunod na taon.
Ang 100-bed hospital ay itatayo sa Barangay San Pedro sa Molo district at pamamahalaan ng lokal na pamahalaan.
Nasabat ng mga elemento ng Bureau of Customs (BOC) ang P30M halaga ng smuggled poultry products sa Manila International Container Port (MICP).
Ayon kay Customs Commissioner Rey Leonardo Guerrero, ang kargamento na lulan ng limang 40-foot containers ay idineklara bilang ‘hot pot balls’ at nakapangalan sa Lycan Consumer Goods Trading.
Ngunit nang suriin ang shipment ay naglalaman ito ng iba’t ibang variant ng chicken products.
Nakatakdang maglabas ang BOC ng ‘warrant of seizure and detention’ laban sa kargamento habang sasampahan naman ng kaukulang kaso ang consignee at maging ang broker nito.
Patay ang isang hinihinalang miyembro ng Communist Party of the Philippines-New People’s Army (CPP-NPA) matapos makasagupa ng mga tropa ng pamahalaan sa Sta. Catalina, Negros Oriental.
Ayon kay LT. COL. Roderick Salayo, Commanding Officer ng 11th Infantry Battalion ng Philippine Army, hindi pa tukoy ang pagkakakilanlan ng nasawing rebelde na ang labi ay natagpuan sa encounter site sa sitio tamusi, barangay talalak.
Sa inisyal na report, tumagal ng walong minuto ang sagupaan sa pagitan ng mga komunista at government forces sa nasabing lugar.
Natagpuan sa pinangyarihan ng insidente ang isang kg-9mm rifle, ilang magasin at mga bala, isang bandolier, dalawang hand-held radios, isang backpack, at mga hinihinalang subversive documents.