Gilbert Perdez

Dumating na sa Japan ang mahigit 200 Filipino caregivers at nurses para magtrabaho sa mga ospital at caregiving institutions doon.
Ayon sa Japanese Embassy sa Maynila, ang grupo ay kinabibilangan ng 18 nurses at 213 caregivers na nakakuha ng trabaho sa ilalim ng Japan-Philippines Economic Partnership Agreement o JPEPA.
Bago isabak sa trabaho sa kani-kanilang mga employer ay isasalang muna sa anim na buwan na intensive Japanese language training ang mga Pinoy workers.
Maliban sa tatanggaping allowance, binanggit ng embahada na libre rin ang nasabing pagsasanay.

Itinutulak ng ilang mambabatas ang isang panukalang batas na layong pagkalooban ng fixed salaries at iba pang mga benepisyo ang mga barangay officials tulad ng tinatamasa ng mga regular government employees.

Base sa House Bill 502 nina ACT-CIS Party-list Representatives Edvic Yap, Jocelyn Tulfo at Jeffrey Soriano; Benguet Rep. Eric Yap, Quezon City Rep. Ralph Tulfo, at Davao City Rep. Paolo Duterte, isinusulong nito ang pagbibigay ng ‘fixed’ na sahod para sa mga opisyal ng barangay at idineklara ang mga ito bilang mga regular na empleyado ng gobyerno upang makatanggap ng maayos na kompensasyon at benepisyo.

Ayon sa mga kongresista, ang barangay ay nagsisilbi bilang ‘office of the first resort of the people’ at marami silang isyu na dapat tugunan maliban sa regular nilang tungkulin at responsibilidad.

Sa explanatory note ng bill, binanggit na panahon na upang ibigay sa mga barangay officials ang nararapat para sa kanila at kilalanin ang mahalagang papel na ginagampanan nila sa pagseserbisyo sa mga komunidad.

Bilang basic political unit, ang barangay ay nagsisilbi rin bilang pangunahing ‘planning and implementing unit’ ng mga proyekto, programa at polisiya ng pamahalaan.

Katunayan, ayon sa mga mambabatas, karamihan sa mga hakbang na ginagawa ng national government ay nangangailangan ng suporta at intervention ng barangay dahil sila ang mas malapit sa tao na ‘form of government’.

Maliban sa fixed salaries, itinutulak din sa ilalim ng bill ang pagbibigay ng PhilHealth, Pag-Ibig at GSIS benefits sa mga barangay officials.

Sa kasalukuyan, tanging ang mga barangay chairperson at mga kagawad lamang ang nakakatanggap ng kompensasyon sa porma ng honorarium at hindi ‘fixed salary’ na nakapaloob sa compensation system.

Nagsagawa ng malawakang random drug testing ang Metro Rail Transit Line 3  (MRT-3) sa mga manggagawa ng sistema.

Ayon sa pamunuan ng MRT-3, ito’y bilang pagtalima sa kautusan ng Civil Service Commission (CSC) upang matiyak ang epektibo at angkop na paghahatid ng serbisyo sa publiko.

Batay sa CSC resolution No. 1700653, obligadong sumalang sa mandatory rehabilitation o counseling program ang sinumang public official o employee na magpopositibo sa paggamit ng iligal na droga, depende kung gaano ito kalala o katalamak.

Mahaharap naman sa kasong administratibo ang sinumang tatangging magpa-rehab.

Inanunsiyo ng Department of Social Welfare and Development (DSWD) na ina-update na nito ang nationwide list ng mga benepisyaryo ng Pantawid Pamilyang Pilipino Program (4Ps).

Ayon sa DSWD, ito’y upang matiyak na matatanggal sa programa ang mga hindi kwalipikado o ineligible beneficiaries.

Matatandaang ipinag-utos ni Secretary Erwin Tulfo na tanggalan ng benepisyo ang mga kasama pa rin sa listahan kahit nakumpleto na ng kanilang anak ang education requirements.

Nilinis ng Sandiganbayan sa kasong graft ang ilang opisyal sa isang bayan sa Benguet na nag-ugat sa umano’y iregularidad sa pagbili ng P1M halaga ng insecticides at fungicides.

Batay sa desisyon ng 7th Division ng anti-graft court, walang nakitang sapat na basehan ang korte na magdidiin sa mga akusadong sina Buguias municipal treasurer Anecita Suyat, municipal accountant Marcelino Endi, at agricultural officer Asano Aban sa kasong paglabag sa Republic Act 3019 o Anti-Graft and Corrupt Practices Act.

Ayon sa korte, hindi sapat ang mga inilatag na ebidensya ng prosekusyon na magpapatunay na nabigyan ng unwarranted advantage ang PMB-Agro Goods and Services nang igawad dito ang kontrata noong 2004.

Una nang naabswelto si dating Mayor Apolinario Camsol nang pumanaw ito noong July 2019 o halos dalawang buwan matapos itong patawan ng suspensiyon ng Sandiganbayan habang nakaupo bilang provincial board member.

Abswelto sa kasong katiwalian ang 11 provincial officials ng Bataan na nag-ugat sa pagbili ng isang patrol boat na nagkakahalaga ng P142,000 nang walang public bidding noong 2006.

Kabilang sa mga nilinis ng Sandiganbayan sina agriculturist Imelda Inieto, accountant Alicia Magpantay, treasurer Emerlinda Talento, private supplier Ernesto Asistin Jr., at bids and awards committee members at local officials na sina Ludivina Banzon, Enrico Yuzon, Evangeline Diaz, Godofredo De Guzman, Pedro Baluyot, Angelina Villanueva, at Francisco Caparas.

Matatandaang nakalusot sa kaso noon pang 2012 sina dating Bataan governor Enrique Garcia at agriculturist Danilo Abrera habang naabswelto naman si provincial administrator Rodolfo De Mesa matapos itong pumanaw noong 2020.

Halos 60 criminal at administrative complaints ang naihain ng Bureau of Customs (BOC) laban sa ilang mapagsamantalang negosyante at brokers sa unang anim na buwan ng taong kasalukuyan.

Ito’y batay sa inilabas na report ng Bureau’s Action Team Against Smugglers (BATAS) kung saan ang 57 kaso ay isinampa sa Department of Justice (DOJ).

Sa kabuuan, 46 criminal cases ang naihain ng BOC laban sa 145 importers, exporters, at customs brokers dahil sa paglabag sa Republic Act 10863 o Customs Modernization and Tariff Act at iba pang batas.

Samantala, may ilang licensed customs brokers din ang sinampahan ng kasong administratibo sa Professional Regulation Commission (PRC).