Gilbert Perdez

Muling nanawagan ang Department of Foreign Affairs (DFA) sa mga Pilipino sa Europa na mag-ingat sa heat waves.

Ayon kay DFA Deputy Assistant Secretary Gonar Musor, wala pa namang naiuulat na nasawing Pinoy sa pagtaas ng temperatura sa kontinente.

Kasalukuyang nakakaranas ng heat waves at wildfires ang Europa na nagdudulot naman ng matinding polusyon sa hangin.

Sinabi pa ni Musor na patuloy naman nilang mino-monitor ang kagalayan ng Filipino community sa naturang lugar.

Hinikayat ng Department of Trade and Industry (DTI) ang mga retail store owners sa Antique na tumalima sa Automatic Price Freeze (APC) matapos ideklara ang state of calamity sa lalawigan dulot ng dengue outbreak.

Ayon kay DTI Development Specialist Glen Fernando, ang inilabas nilang APC ay ibinatay sa kasalukuyang presyo ng mga pangunahing bilihin bago ang deklarasyon.

Kasabay nito, nagbabala rin ang ahensya na araw-araw nitong imo-monitor ang presyo ng mga basic commodities upang matiyak na sumusunod dito ang mga tindahan.

Isa na namang miyembro ng Communist Party of the Philippines-New People’s Army (CPP-NPA) ang sumuko sa mga awtoridad sa Cataingan, Masbate.

Kinilala ni Maj. Malu Calubaquib,  tagapagsalita ng Police Regional Office in Bicol (PRO-5), ang surrenderer na si “Ka Ruben”, 41 taong gulang, at residente ng Cataingan.

Sinasabing bahagi si “Ka Ruben” ng Bicol Regional Party Committee (BRPC) ng CPP-NPA.

Tiniyak naman ni Calubaquib na makakatanggap ito ng mga benepisyo sa ilalim ng Enhanced Comprehensive Local Integration Program (E-CLIP) ng gobyerno.

Umakyat na sa tatlo ang bilang ng mga nasawi sa diarrhea outbreak sa Toril district sa Davao City.

Ayon kay City Health Office head Dr. Ashley Lopez, isang 32 taong gulang na lalaking titser at isang senior citizen ang pinakahuling nasawi sa sakit.

Una nang pumanaw ang isang sampung taong gulang na batang lalaki noong Hulyo 19.

Sinabi ni Lopez na mula noong Hulyo 15 ay sumirit na sa 233 ang diarrhea cases sa Toril district.