Gilbert Perdez

Sinuportahan ng may – akda ng Reproductive Health o RH Law ang pahayag ng Department of Health (DOH) na maituturing nang “lifted” o wala nang bisa ang Temporary Restraining Order (TRO) ng Korte Suprema laban sa pamamahagi ng mga contraceptives.

Ayon kay Albay Representative Edcel Lagman, muli nang sinertipikahan ng Food and Drug Administration o FDA ang ilang kinukuwestiyong gamot at devices na nagsasaad na hindi naman nakapagdudulot ang mga ito ng aborsyon.

Giit pa ni Lagman, hindi na kailangang umakyat muli sa mataas na hukuman para buksan ang nabanggit na usapin.

Maging ang kataas – taasang hukuman aniya ay binigyang daan na ang “full implementation” ng RH Law matapos ang “recertification” na ginawa ng FDA.

Lusot na sa ikalawang pagbasa sa kamara ang isang panukalang batas na magpapabilis ng proseso ng land registration sa Department of Agrarian Reform o DAR.

Sa ilalim ng House Bill 6589, pinaaapura nito ang paglalabas ng clearance o permits mula sa DAR para sa mga magpaparehistro ng lupa na saklaw ng CARP o Comprehensive Agrarian Reform Program.

Ayon kay Speaker Pantaleon Alvarez, principal author ng bill, isinusulong niya ang panukala dahil sa aniya’y talamak na red tape sa mga proseso sa gobyerno  na kadalasa’y nagdudulot pa ng katiwalian.

Tiniyak ng Department of National Defense o DND na ginagawa nito ang lahat upang lalo pang mapataas ang moral ng mga sundalo at kani-kanilang mga pamilya.

Pahayag ni Defense Secretary Delfin Lorenzana, malaki ang maitutulong sa mga kawal ng pamahalaan ng CSBP o Comprehensive Social Benefits Program ang lahat ng aktibong sundalo at kanilang mga mahal sa buhay na kung saan sila ay pinagkakalooban ng mga benepisyo tulad na lamang ng pabahay, umento sa sahod, educational support sa kanilang mga anak, at marami pang iba.

Magugunitang ipinag-utos ni Pangulong Rodrigo Duterte ang paglalabas ng limang daang milyong piso (500-M) para sa pagpapagamot at rehabilitasyon ng mga military personnel na nasugatan sa limang buwang bakbakan sa Marawi City.