Patay ang isang obrero makaraang bumigay ang ika-limang palapag ng ginagawang mall sa Bacolod.
Ayon sa mga awtoridad, nakilala ang nasawi na si Heracleo Abraham, 36-anyos, isang construction worker, at nakatira sa nabanggit na lugar.
Hinihinalang may mga natitira pang trabahador na naiipit sa loob ng gumuhong gusali kaya’t patuloy ang search and rescue operation.
Wala pang inilalabas na pahayag ang management ng ginagawang gusali.
Kalunos-lunos ang sinapit ng isang batang babae matapos matagpuang walang saplot sa katawan at halos madurog na ang bungo sa isang rantsohan sa Barangay Tambler, General Santos City.
Ayon kay Police Sr. Insp. Fernando Manuel, hepe ng police station 7, huwebes pa ng gabi nang i-ulat sa kanila na nawawala ang hindi pinangalanang bata na magdiriwang sana ng kanyang ika-8 na kaarawan.
Gayunman, nauwi ito sa pagluluksa dahil sa brutal na pagpaslang sa bata.
Itinuturing namang suspek sa krimen ang isang Mark Engkong na nakita umanong nilalabhan ang kanyang mga damit na may bahid ng dugo at hinihinalang ginahasa pa ang biktima bago pinatay.
Pinatulog ni dating WBA Champion Randy Petalcorin ang kanyang kalabang si Oscar Raknafa sa kanilang bakbakan sa Malvern Town Hall sa Melbourne, Australia.
Sa unang round pa lamang ng laban ay pinaulanan na ni Petalcorin ng mga suntok si Raknafa at hindi na ito nakaganti pa kaya’t iginawad sa kanya ng referee ang knockout win.
Dahil dito, nasungkit ni Petalcorin ang kanyang limang magkakasunod na panalo at ikatlong knockout victory naman ngayong taon.
Nakalabas na ng Philippine Area of Responsibility o PAR ang bagyong Salome.
Gayunman, nag-iwan ito ng pinsala sa ilang lugar sa CALABARZON habang sa Bicol ay nasagip ang dalawang mangingisdang inabutan ng bagyo sa laot.
Samantala, may binabantayan namang Lower Pressure Area o LPA ang PAGASA na nasa layong 595 kilometro sa silangan ng General Santos City, South Cotabato.
Inaasahang maghahatid ito ng katamtaman hanggang sa kung minsan ay malakas na pag-ulan at thunderstorm sa mga rehiyon ng CARAGA, Davao, SOCCSKSARGEN at Misamis Oriental na maaaring magdulot ng mga pagbaha at pagguho ng lupa.
Isang batalyong pulis ang idineploy ng Philippine National Police o PNP mula sa Bicol para tumulong sa pagbabantay sa 31st ASEAN Summit sa Metro Manila.
Ayon kay Sr. Insp. Maria Luisa Calubaquib, tagapagsalita ng Police Regional Office–Region 5, 800 police officers ang ipinadala nila upang maging mapayapa at maayos ang summit.
Sinabi ni Calubaquib na madalas magpadala ang PRO-5 ng augmentation force sa PNP katulad na lamang noong bumisita ang Santo Papa sa Maynila at gayundin sa Peñafrancia Festival sa Naga city At Daragang Magayon Festival sa Albay.
Iwasan munang tumungo sa Pilipinas dahil sa matinding banta ng terorismo.
Ito ang babala ng pamahalaang Australia sa kanilang mamamayan sa pamamagitan ng inilabas nitong travel advisory.
Batay sa abiso, binalaan nito ang kanilang citizens na huwag munang bumiyahe patungo sa Pilipinas dahil sa “high threat” ng terrorist attack, kabilang ang Maynila na siyang kabisera nito.
Maliban dito, ang mga Australian naman na kasalukuyan nang nasa bansa ay pinaiiwas sa pagbiyahe sa Central, Eastern at Western Mindanao dahil pa rin sa mataas na banta ng kidnapping, terrorist attacks at bakbakan ng mga armadong grupo.
Pinalaya na ng mga hinihinalang miyembro ng bandidong Abu Sayyaf Group o ASG ang dalawang negosyante matapos ang isang buwang pagkakabihag sa Barangay Muti, Zamboanga City.
Batay sa report ng Police Regional Office 9, nakilala ang mga biktima na sina Rome Gambe at Jonathan Timbog; pawang naninirahan sa lungsod na sinasabing pinakawalan ng mga kidnaper sa Barangay Muti.
Matatandang dinukot ang dalawa ng mga armadong kalalakihan sa Barangay Nala, Sibuco, Zamboanga del Norte noong Setyembre 31, 2017.
Ayon sa mga awtoridad, inaalam pa nila kung nagbayad ng ransom ang pamilya ng mga biktima.
Malaki ang posibilidad na makalusot sa preventive suspension ang mga opisyal ng gobyerno na may kasong katiwalian.
Ito ay sa sandaling maisabatas ang isang panukala na isinusulong ni House Speaker Pantaleon Alvarez na pasok na sa ikalawang pagbasa ng Kamara.
Batay sa House Bill No. 6590 ni Alvarez, mayroong exception sa mga opisyal na maaaring mapatawan ng preventive suspension sakaling makasuhan ng paglabag sa Anti – Graft Law.
Nakasaad dito na hindi kailangang suspendihin ang opisyal na may kasong graft kung ito ay nasa ibang posisyon na at wala na sa dating puwesto kung saan nangyari ang sinasabing katiwalian.
Ipinanawagan ng isang mataas na opisyal ng Vatican sa Iglesia Katolika na payagang umakto bilang pari kahit ang mga kasal na lalaki sa malalayong rehiyon sa Amazon.
Ginawa ni Bishop Erwin Krautler ang pahayag sa gitna na din ng napaulat na kakulangan ng mga pari sa Amazon na naging dahilan upang magpatawag si Pope Francis ng special meeting.
Kasama sa mga sakop ng rehiyon ng Amazon ay ang ilang bahagi ng Bolivia, Brazil, Colombia, Ecuador, French Guiana, Guyana, Peru, Venezuela at Suriname.
Ayon kay Krautler, kalihim ng Commission on the Pan-Amazon Region, nais niyang matalakay ang usaping ito sa gaganaping pagpupulong sa Vatican sa 2019.
Maging si Brazilian Cardinal Claudio Hummes, pangulo ng Bishops Commission for the Pan-Amazon, at malapit na kaibigan ng Santo Papa, ay sinasabing suportado din ang nabanggit na panukala.
Patay ang 4-anyos na batang babae matapos masagasaan ng trak sa Barangay Tabucan Airport, Iloilo City.
Idineklarang dead on arrival sa Qualimed Hospital ang hindi pinangalanang biktima habang inoobserbahan naman sa ospital ang tiyahin ng bata na si Roselyn Dapolog.
Sinasabing kabababa lamang ng taxi at tatawid sana ang biktima kasama ang kanyang kapatid na si Jasnen, tiyuhing si Jerry, at tiyahin na si Dapolog nang mahagip ng humaharurot na delivery truck.
Agad namang nahuli ng mga pulis ang drayber ng trak na kinilalang si Ronald Draper at mahaharap ito sa kasong Reckless Imprudence Resulting in Homicide at Serious Physical Injuries.