Gilbert Perdez

Inulan ng reklamo mula sa mga galit at nagtatakang pensioners ang Facebook page ng Social Security System o SSS dahil sa hindi pagpasok ng kanilang pensyon nitong katapusan.

Gayunman, giit ng SSS, Oktubre 17 pa nang magsimula silang mag-remit ng pensyon para sa Nobyembre bilang paghahanda sa undas holiday.

Makaraang mapag-alaman na ang mga nagkaaberya ay puro mula sa BPI ngunit nangako naman ang bangko na aayusin nila ang naturang problema.

Humingi din ng paumanhin ang BPI at inamin ang nagawang kapalpakan.

Sakaling sumama ang panahon, naglaan ng mga sasakyan ang Korte Suprema para sa mga sasabak sa bar examinations na magsisimula Nobyembre 5.

Batay sa contingency plan ng Supreme Court Public Information Office, magde-deploy ang mataas na hukuman ng sampung bus para ihatid at sunduin ang mga examinees sa venue ng pagsusulit sa University of Santo Tomas o UST sa Maynila.

Kabilang naman sa pick-up points ang Quezon City Memorial Circle (2 buses), Park and Ride, Lawton, Manila (1 bus), Supreme Court Compound, Taft Avenue, Manila (2 buses); EDSA – Magallanes Flyover, Pasay City (2 buses); Greenbelt at Glorietta, Ayala Center, Makati (2 buses); at Marikina Sports Complex (1 bus).

Ayon sa Korte Suprema, sakali namang abutin ng baha ang unibersidad, ihahatid ang mga bar examinees sa pupuntahan nilang examination buildings.

Pinaalalahanan naman ang mga examinees na isasara ang Roxas Boulevard sa Maynila sa Nobyembre 12, ang ikalawang linggo ng pagsusulit, dahil naman sa Association of Southeast Asian Nations o ASEAN Summit.

Mahalagang magkaroon ng batas na tututok sa pangangailangan ng mga pasyenteng may kanser.

Ito ang binigyang diin ni Senator Sonny Angara kasabay ng pagsusulong ng kanyang panukalang batas na naglalayong maglaan ang gobyerno ng 30 bilyong piso bilang cancer assistance fund.

Sa Senate Bill 1570 ni Angara, nakasaad na pitong Pinoy ang namamatay sa kanser kada oras, batay na rin sa report ng Cancer Coalition of the Philippines.

Giit ni Angara, napakalaking pera ang dapat ilaan para sa laboratory tests, mga gamot, medical supplies, nutritional supplements, at maging sa chemotherapy kaya’t mahalagang ayudahan ng pamahalaan ang mga may karamdaman.

Ayon sa panukala, mapupunta sa Cancer Control and Management Program ang 10 porsyentong kita ng gobyerno sa excise tax ng mga sigarilyo at alak.

—-